5
1 Jordan tavo nidym mang y peang nai Amori samrangchi hawi Mrethe pangli peang jeungrei y peang nai Kanan samrang bawibawichi ly Israela chengchi Jordan tavo angpeang chum nai ryrei, Areng my tavo tui kang hai nai satang thai u bo. Hunai deaungkho y nichi ly Israela chengchi ai jei u i, paleung phra atho di u bo.
Kilakala meingtym y lengkhym takip u nai
2 Areng ly Josua teng y, “Lengseaung achochi si iy, Israela chengchi ai lengkhym takip pi,” nanai leu pei bo.
3 Huna nai y Josua ly “Lengkhym takip nai mawi” nanai amyn pathi nai meingtym y, Israela chengchi ai lengkhym takip pi bo.
4-6 Aikupta pri i dengdairei theu nai neampacho bawibawichi ly lengkhym takip chum nai ne. Na i py Israela chengchi ly daichi ka-vym y saneng vui palyhrei amki nai thym khala, tapen nai neampacho deaungdichi ly lengkhym takip y leang rai. Huni saneng vui palyhrei nai bo khala, Aikupta pri i dengdairei theu nai tavai thau pajau nai neampacho bawibawichi ly Areng i reita leu pei nai tangai u y nai deaungkho y dei u be bo. Areng my nichi i amsi pajochi teng y pei ai adeu nai, paitiu khuta hawi iy teicha teinei avaw y nai pri nichi niu ai ny y, nanai pasawi kheih nai ly niu u y nai ne.Ref 5.6: Kati 14.28-35
7 Nichi i chapochi ly lengkhym takip y rai nai deaungkho y, Josua my huni neampachochi ai lengkhym takip ai nai ka-vo sa pi bo.
8 Lengkhym takip pi chum nai bo y Israela cheng bawibawichi ly tamo tha y ryrei ly Tai theung y awm u bo.
9 Naibaly Areng ly Josua teng y, “Aikupta pri y nangchi i miseaung achei nai kangji ly vaini kaimy tama hai bo,” napi. Hunai deaungkho y huni meingtym ai Kilakala,note 5:9\xk Kilakala: Hebrai leu y “kangji tama hai nai” nanai sai ne. *\x* nanai amyn pathi nai ly vaini khrairei amyn lo jo nai ne.
10 Israela chengchi ly Jeriko mary sahawi i adym y awm nai, Kilakala meingtymra Tai u nai thym khala, angchei lo kani holai palyhrei kani dym y Katlen Vui Nai pawi sa u bo.Ref 5.10: Theu 12.1-13
11 Khawn mang y nichi ly Kanan pri i choh hawi sa nai tako hawi, angbo abawi y nai tako cha u angchei bo.
12 Huni kani dengdairei kani mang i Manna tako palo pi y nai deaungkho y, Israela chengchi ly Manna tako cha ai nai ngo u y leang bo. Huni neng dengdairei nichi ly Kanan pri i theu nai thengthai, amti amjangchi cha u nai ne.Ref 5.12: Theu 16.35
Josua hawi haisau pah nai khumi
13 Josua ly Jeriko mary sahawi y tym nai thym khala, my i mo y tlenrei khyhmy haisau pah nai khumi leaungrei angdo nai niu bo. Josua ly huni khumi teng y chei iy, “Nang ly kaichi mang y asa hai nai khumi a? ti y baly paleung ka-e a?” nanai deng.
14 Huni khumi my, “Nangchi mang i py ny y, paleung ka-e py ny y, kai ly Areng i tavailu areng ne,” nanai pathang.
Huna nai khala Josua ly khaileaung y ambeu naimy chiu iy, “Areng awi, nang i miseaung kai ai leu pei ba,” nanai takeng.
15 Naibaly Areng i tavailu areng my, “Nang i phainai aleng; nang i amchyn nai khaileaung ly kachai ne,” napi. Ni i leu pei nai kamta Josua ly sa bo.