3
Israela chengchi Jordan tavo angpeang nai
1 Huni bo i kani khawn angthodyh y Josua hawi Israela cheng bawibawichi ly Akasia Taira i dengdairei Jordan tavo mang y theu u bo. Tavo angpeang y rai khala, tavo peang y tai u.
2 Kani thomrei bo y lu sa naichi ly Tai mang y amki i,
3 khumichi teng y, “Nangchi i Areng Tameuh i Leu Maikawm Pawm ai, pathyp pi nai keungchi my angjeaung nai niu nai khala, nangchi ly Tai vym iy, nichi nithun abang u ai nai tla.
4 Nangchi ly hini lam y tlenrei py tako u vai y nai deaungkho y, nichi my lam ang patei pi ai. Na i py nangchi ly Leu Maikawm Pawm sahawi y chei u moh. Pawm nithun mang miu sangnyhrei ka-khan y abang u ai nai tla,” nanai thui pi bo.
5 Naibaly Josua my khumichi teng y, “Khawndam ly Areng my nangchi teng y lyh ai awm nai ka-ma-ra patei ai i, nangchi ngan tlang apachai u,” napi.
6 Naibaly ni my pathyp pi nai keungchi teng y Leu Maikawm Pawm angjeaung iy mipuichi mo mang tako hai nai kamta, nichi ly tako u nai ne.
7 Areng ly Josua teng y, “Israela chengchi i mo y vaini dengdairei, nang ai kaimy tahm kang pasang ai. Kai ly Mosi hawi vanrei awm nai kamta, nang hawi py vanrei awm, nanai nichi pany u ai.
8 Leu Maikawm Pawm angjeaung u nai pathyp pi nai keungchi ly tavo peang y tym u nai khala, nichi ly tui theung y angdo u ai nai thui pi,” nanai leu pei bo.
9 Naibaly Josua ly mipuichi teng y, “Jeu u, nangchi i Areng Tameuh my leu pei nai ngierei tangai u.
10 Nangchi amsa u nai khala, Tameuh ly Kanan cheng, Hiti cheng, Hivit cheng, Perizi cheng, Kirakashi cheng, Amori cheng hawi Jebusi chengchi ai patheu takengkei ai.
11 Khaileaung pri verei ai peang nai Areng i Leu Maikawm Pawm ly nangchi ai lu sa iy, Jordan tavo angpeang nai khala, Tameuh kangheng ly nangchi theung y awm, nanai nangchi pany u ai.
12 Vai ly Israela cheng theaung harei y khumi leaung leaungrei, khumi leaung holai nyhreichi ai vawi u takhra.
13 Khaileaung pri verei ai peang nai keung Areng i Leu Maikawm Pawm angjeaung nai pathyp pi nai keungchi, tavo tui ai chiu phai chiu baly tavo syh mang leaung kathiu nai tui ly anawn iy, meingtymrei y am-eng cheng vui ai,” napi.
14-15 Huni neng ly choh katui neng ne i, tavo tui len nai neng py ne. Khumichi ly Jordan tavo angpeang ai nai Taira i dengdairei theu u nai khala, pathyp pi nai keungchi ly nichi mo mang Leu Maikawm Pawm ajeaung naimy tako u bo. Pathyp pi ai keungchi ly tavo theung y satla u nai dengdairei,
16 tui leaung nai anawn vui i, tavo syh mang palo kyh naira y awm nai Zarethan mary ahawi i Adam mary y tui am-eng cheng nai ne. Pangli kadei tym pa-rei leaung nai tavo tui ly kang vui nai deaungkho y, khumi bawibawichi ly Jeriko mary sahawi i tavo vai mang y angpeang u thai nai ne.
17 Khumi bawibawichi tako u nai pajau pa-rei, Areng i Leu Maikawm Pawm angjeaung nai pathyp pi nai keungchi ly Jordan tavo umtang phuirawm naira y angdo u bo.