18
Awm rai nai khu ka-peang phy pi nai
1 Pri verei tavai tiu pajau nai bo y Israela chengchi ly Siloh mary y tym angym u i, Areng i awm nai Tabynako sa u bo..
2 Israela theaung saryhreichi ai, khu ka-peang phy pi y leang rai.
3 Hunai deaungkho y Josua my Israela chengchi teng y, “Nangchi i amsi pajochi i Areng Tameuh my, nangchi ai pei nai pri theung y kun u y naimy, mana tanrei ajeng u jo ai mo?
4 Nangchi i theaung harei y leaung thomrei vawi takhra ly kai teng y jeu hai u. Huni khumichi ly mychi i vui ngai nai khu ka-peang phy takhra pi ai nai, nichi ai pri verei y kaimy pato ai. Nichi ly huna nai khu ka-peangchi phy pi takhra chum baly, kai teng y vawi u ali teang ai nai tla.
5 Huni pri ai phy saryhrei phy ai. Juda theaungchi ly mychi i tokalawi mang khu ka-peang y py, Josepha theaungchi ly mychi i tosyh mang khu ka-peangra y py, awm ai nai nga u ai.
6 Khu ka-peang phy saryhreichi ai kamtleh tahyh iy, kai teng y jeu hai u. Huni bo y kai ly achi i Areng Tameuh i kangai lawm ai nai, tambe va iy phy pi ai.
7 Levi theaungchi ly Areng i pathyp pi nai kalopchi sa ai nai deaungkho y, nangchi kamta khu ka-peang phy nga u ai ny y. Kad theaung, Ruben theaung hawi nisi Manase theaungchi ly Areng i miseaung Mosi my phy pi nai kamta, Jordan tavo nisi mang i khu ka-peang nga u bo,” napi
8 Josua my pato nai kamta nichi ly khu ka-peang patleh takhra ai nai chei u bo. Josua my, “Nangchi ly pri verei y chei u iy, khu ka-peangchi patleh takhra u. Naibaly kai teng y vawi teang ai nai tla. Huna nai khala kai ly hini Siloh mary y nangchi nga ai nai khu ka-peangchi, Areng i kangai lawm ai nai tambe va iy, kang phy pi ai,” nanai leu taviu bo.
9 Hunai deaungkho y nichi ly pri verei y chei iy, abawi nai marychi vuikanai hawi vanrei, khu ka-peang saryhrei patleh takhra iy, Siloh mary taira y awm nai Josua teng y vawi u teang bo.
10 Josua py Areng i kangai lawm ai nai tambe va iy, Israela theaungchi ai khu ka-peangchi phy pi nai ne.
Benjamin theaung ai phy pi nai khu ka-peang
11 Benjamin theaung yhm dengtheungchi nga ai nai khu ka-peang phy pi manme nai ne. Nichi i vui khu ka-peang ly Juda theaung hawi Josepha theaungchi i khu ka-peangchi sala y awm.
12 Nichi i khu ka-peang tosyh mang khujyh ly Jordan tavo dengdairei amteaung iy, Jeriko mary tosyh mang i mawi aheung mang y lyn kalau baly, nidym mang Bethavan daichi ka-vym ryrei, mawi aheung y tako prei nai ne.
13 Huni bo y Luza mary (Bethela mary, nanai py palau), tokalawi mang i mawi aheung mang y lyn iy, Tlawi Beth Horon mary tokalawi mang, mawi salo i Ataroth Addar mary y tym.
14 Huni bo i khujyh ly huni mawi nidym mang dengdairei, Juda theaungchi i Kiria Bala mary (ti y baly Kiriajarim mary) tym pa-rei, tokalawi mang y ang vum kathiu nai ne.
15 Tokalawi mang khujyh ly Kiriajarim mary katem dengdairei amteaung iy, Nipha daichi tuikhochi mang y tym.
16 Hunaibaly Riphaiah leaunghawi tosyh mang i Hinnom leaunghawi sahawi i mawi kheutang mang y tym. Huni bo y Jebusi mawi tokalawi mang i Hinnom leaunghawi tako prei iy, tokalawi mang Enrokela avang y tym.
17 Huni bo baly tosyh mang i Ensimai avang mang y amhi iy, Adumim mawi aleaung phei mang y awm nai, Kelilut avang y tym. Huni bo y Bohan i lengseaung (Bohan ly Ruben i chapo ne) mang y satla kathiu baly,
18 Jordan tavo leaunghawi sahawi i mawi aheung ban tosyh mang dengdairei en tako prei bo. Huni bo y,
19 Beth Hokalah mawi aheung ban dengdairei tako prei iy, tavo leaunghawi mang satla kathiu baly, pangli kadei tosyh mang Jordan tavo vumra tem nai ne. Hini ly tokalawi mang i khujyh ne.
20 Jordan tavo ly huni khu ka-peang i nisi mang khujyh ne. Salo mang i khujyh ly Benjamin theaung yhm dengtheungchi amtym nai khu ka-peang khujyh ne.
21 Benjamin theaung yhm dengtheungchi i khujyh theung y awm nai marychi ly; Jeriko mary, Beth Hokalah mary, Emek Kezi mary,
22 Beth Arabah mary, Zemaraim mary, Bethela mary,
23 Avim mary, Parah mary, Ophara mary,
24 Khepharammoni mary, Ophani mary hawi Keba mary napi nai mary kalen holai nyhrei hawi, hunichi i tengpang y awm nai mary katheang kalenchi ne.
25 Huni bo y Kibeon mary, Ramah mary, Beroth mary,
26 Mizapa mary, Khephirah mary, Moza mary,
27 Rekem mary, Irapela mary, Taralah mary,
28 Zela mary, Elet mary, Jebusi mary (ti y baly Jerusalem mary), Kibeah mary, Kiriajarim mary napi nai mary kalen holai palyhrei hawi, hunichi i tengpang y awm nai marychi py abawi. Huni khu ka-peang ly Benjamin theaung yhm dengtheungchi i khu ka-peang ne.