17
Nidym Manase
1 Josepha i chapo chalu Manase i kangpreang dengtheung phyreichi py, Jordan tavo nidym mang i khu ka-peang phyrei amtym u nai ne. Kilead i ampo Makhira ly Manase i chapo chalu ne; tavaimi sorai risa py ne. Hunai deaungkho y ni ly Jordan tavo nisi mang i Kilead khu hawi Basen khuchi ai nga bo.
2 Jordan tavo nidym mang i khu ka-peang ai ly Manase kangpreang phyrei dengtheungchi nga u. Huni dengtheungchi ly; Sejhem dengtheung, Hepha dengtheungchi hawi Shemida dengtheungchi ne.
3 Manase i katu pa-thom, Makhira i katu palyh, Kilead i katu, Hepha i chapo Zalopheh ly chapo by y, chaniuchi naini awm khyh. Huni chaniuchi i amyn ly; Malah, Noah, Hokalah, Milaka hawi Tirzahchi ne.
4 Nichi ly pathyp pi nai keung Elaza, Nun i chapo Josua hawi lu sa naichi teng y ahihawi iy, “Kaichi ai py, kaichi i amjo amnau ka-bi cheng theaungchi ai py, amtym ai nai khaileaung pei ai nai tla, nanai Areng my Mosi teng y leu pei nai awm,” nanai takeng nai deaungkho y, Areng my leu pei nai kamta, nichi ly mychi i amjo amnau ka-bi chengchi kamta, khaileaung nga u nai ne.Ref 17.4: Kati 27.1-7
5 Hunai deaungkho y Manase theaung ly Jordan tavo nisi mang y Kilead khu hawi Bashan khuchi bo y, phy horei nga.
6 Manase theaung neampachy hawi neampachochi ly khu ka-peang nga u nai deaungkho y, awm asai nai takhra Manase kangpreangchi ly Kilead khu nga u.
7 Manase khu ka-peang i khujyh ly Asha i khu ka-peang dengdai Sejhem mary nisi mang y awm nai Michmetha mary ryrei ne. Huni bo i khujyh ly tokalawi mang y takoleu iy, Entapuah mary y awm naichi py abawi.
8 Entapuah mary ly Manase i khu ka-peang theng y abawi i py, mary tengpang y awm nai khaileaung ly Ephraim khu ka-peang theng y awm.
9 Huni bo i khujyh ly Kanah micheaung mang y ang vum kathiu nai ne. Huni micheaung tokalawi mang i marychi ly Manase i khu ka-peang theung y awm teu i py, Ephraim theaung my peang. Manase khu ka-peang khujyh ly Kanah micheaung jeungrei tako baly, Mrethe pangli y tem.
10 Ephraim khu ka-peang ly micheaung tokalawi mang y awm iy, Manase khu ka-peang ly micheaung tosyh mang y awm. Mrithe pangli ly huni khu ka-peang nyhrei i nidym khujyh ne. Nidym tosyh ngan y Asha khu ka-peang awm iy, nisi tosyh ngan mang y, Isakha khu ka-peang awm nai ne.
11 Manase theaung ly Isakha hawi Asha khu ka-peangchi theung y awm nai Beth Shan mary, Ibalam mary hawi tengpang y awm nai marychi bo y, Dora mary (pangli peang y awm nai ne), Adora mary, Taanch mary,Mekido mary hawi, tengpang sahawi y awm nai marychi ai peang bo.
12 Manase theaung ly huni marychira y awm nai, Kanan chengchi ai patheu pajau y nai deaungkho y, nichi ly huni meingtymchira y awm u jojo.Ref 17.12-13: Tara chih 1.27-28
13 Israela chengchi ly naira awmryh awmryh teu i py, Kanan chengchi ai patheu y naimy, mymychi teng y miseaung kalop sa hai bo.
Ephraim hawi Manasechi my khaileaung meingtym hnei panawi bi nai
14 Josepha i kangpreangchi my Josua teng y, ‘Areng ly kaichi ai amtheaung naira pei nai deaungkho y, khumi khri pa-rei peung nai ne. Nang ly ati mana nai kaichi ai khaileaung phy harei pei khyh lawh mo?” nanai deng u bo.
15 Josua my, “Nangchi ly khumi neangneang peung nai deaungkho y, Ephraim i vui pei nai mawi aheung meingtym theang lawh baly, Perizi hawi Riphaim chengchi awm nai meingtymra i, daichichi tapyh iy awm u,” nanai pathang.
16 Huna nai khala nichi my, “Mawi aheung ly kaichi awm ai nai theang ala nai ne. Beth Shan hawi deaungpa marychi sahawi i adymra py, Jezarela leaunghawira py awm nai khala, Kanan chengchi ly tamo tavai ka-richi awm u nai ne,” napi u.
17 Josua my Ephraim hawi nidym Manase theaungchi teng y, “Nangchi ly meitang khyp, khumi vuikanai nawi iy atho awm u bo. Hunai deaungkho y nangchi ai ly phy harei nga hai panawi bi ai.
18 Mawi aheung meingtym nangchi teng y kang pei ai. Huni meingtym ly daichi thengreung ne i py, nangchi ly daichi pachai iy awm u. Kanan chengchi teng y tavai tamo ka-richi awm iy haiho hawi teu i py,nangchi ly nichi ai patheu u pajau ai,” napi.