11
Josua ly Jabin samrang hawi ni i amsawi amnai asa naichi ai tiu nai
1 Hazaw samrang Jabin ly Israela chengchi tavai eaung nai satang thai nai khala, ni ly mymy hawi amsawi amnai asa nai samrangchi napi nai Madon samrang Jobab, Simron samrang hawi, Arkhase samrangchi teng y py,
2 Tosyh mang i mawi aheung meingtym, Kalili ang tokalawi mang i Jordan tavo jawn, mawi kheutang hawi nidym mang Dora khu ka-peang y awm nai samrangchi teng y py, satang thai hai nai ne.
3 Huni bo y ni ly Jordan tavo peang y awm nai Kanan chengchi, Amori chengchi, Perizi chengchi, mawitleaung pri y awm nai Jebusi chengchi, Mizapa pri Heramon mawi kheutang y awm nai Hivit chengchi teng y py satang thai hai bo.
4 Nichi ly pangli peang y awm nai sa-ichi jirei nawi nai tavaimi risachi hawi tavai thau u bo. Nichi teng y keaungngo hawi keaungngo ka-ri neangneang abawi.
5 Huni samrangchi ly amkawm u iy, Israela chengchi ai tiu ai nai Merom micheaung peang y tai u bo.
6 Areng my Josua teng y, “Nichi ai jei moh. Khawndam hini neng y kai ly nichi bawibawi ai, Israela chengchi i kiu y kadei au ai. Nang ly nichi i keaungngochi kheu athovui leu hai iy, tavai ka-richi ai mai leng pawn ai nai tla,” nanai leu pei bo.
7 Hunai deaungkho y Josua hawi ni i risa bawibawichi ly Meron micheaungra y Tai u nai paleung ka-echi ai tiu u tamangtang i,
8 Areng ly Israela chengchi teng y paleung ka-echi tlang tleaung y eaung hai bo. Nichi ly tosyh mang Sidon mary hawi, Misrhoth Maim marychira y tym pa-rei py, nisi mang Mizapa leaunghawi y tym pa-rei py, paleung ka-echi ai tiu u i, leaungrei py tleaung y pa-rei padei u bo.
9 Josua ly Areng my leu pei nai kamta, paleung ka-echi i keaungngo kheu athovuichi leu iy, tavai ka-richi ai mai leng pawn bo.
10 Naibaly Josua ly alengli teang iy, Hazaw mary ai tiu chum baly huni mary i samrang ai tleh veng nai ne. (Huni neng khala Hazaw ly huni prichi theung y sa thau naira awm keh nai pri ne.)
11 Nichi ly mary i awm nai khumichi ai, leaungrei py tleaung y pa-rei padei pawn i, mary ai py mai leng u veng bo.
12 Josua ly huni samrang bawibawichi hawi, nichi i awm nai marychi ai tiu pajau iy, Areng i miseaung Mosi my leu pei nai kamta, mary i khumi bawibawichi ai leaungrei py, tleaung y pa-rei tleh pawn nai ne.
13 Na i py Israela chengchi ly Hazaw mary ny y baly, mawi salo y sa nai takhra marychi ai ly mai leng y, Hazaw mary harei ai naini, Josua my mai leng vui nai ne.
14 Israela chengchi ly huni marychira i vawnsai ngiereichi hawi si, beram tawnbawichi ai mymychi i vui la u. Mary i khumichi ai ly leaungrei py tleaung y pa-rei, tamyh u pawn nai ne.
15 Areng ly mymy i miseaung Mosi teng y leu pei nai kamta, Mosi ly Josua teng y leu pei pateang bi nai ne. Josua my py Mosi my leu pei nai kamta sa. Areng my Mosi teng y leu pei nai ngierei ai Josua ly sa nai ne.
Josua my tiu iy nga nai khu ka-peang
16 Josua ly tosyh mang y awm nai mawi aheung meingtym hawi mawi kheutang meingtymchi, tokalawi mang y awm nai mawi aheung meingtymchi hawi mawi kheutang meingtymchi, Kosen pri verei hawi huni i tokalawi mang y awm nai khutaha meingtym, Jordan tavo leaunghawi dengdairei pri verei ai tiu i peangvui nai ne.
17-18 Israela chengchi my peang vui nai khu ka-peang ly tokalawi mang Edom pri sahawi Halet mawi dengdairei, tosyh mang Heramon mawi tokalawi mang, Lebanon leaunghawira awm nai Balakat mary tym pa-rei kau nai ne. Josua ly huni khu ka-peang y peang nai samrangchi hawi, neng kra parai pa-rei tavai atiu; na i py ni ly huni samrang bawibawichi ai patiu iy padei pawn nai ne.
19 Israela chengchi ly Kibeon mary y awm nai Hivit chengchi hawi naini, ka-dyh ka-dawi leu sumneang akhai u; takhra marychi ai ly tiu iy peang vui bo.
20 Huni khumi bawibawichi ai pahen y naimy tleh pawn ai nai, Areng ly huni khumichi ai ham parai naimy, Israela chengchi ai tiu hai bo. Huni khumichi ai tamyh pawn ai nai tla nai ly Mosi dengdairei Areng my leu pei yb nai deaungkho y ne.Ref 11.20: Leu thui 7.16
21 Huni neng khala Josua ly Hebron mary, Debira mary, Arnet mary, Juda mawi aheung meingtym, Israela mawi aheung napi nai mawi aheung meingtymchira y awm nai tlumtlang len nai Anakim chengchi awm naira mang y tavai thau u bo. Josua ly Anakim chengchi ai leaungrei py tleaung y pa-rei padei iy, nichi i marychi ai py maitlawi kaleung hai bo.
22 Hunai deaungkho y Israela pri y Anakim cheng napi nai leaungrei py by y. Na i py Kaza mary, kath mary hawi Asadod marychira naini, Anakim chengchi awm rai nai ne.
23 Areng ly Mosi dengdairei leu pei nai kamta, Josua my huni pri verei ai tiu i peang vui bo. Ni i Israela cheng theaung bawibawichi ai peang hai ai nai, huni pri ai khu paji pi bo.
Naibaly pri verei ly tlamsa naimy awm nai ne.