10
Amori chengchi tavai sum nai
1 Jerusalem mary i samrang Adonizedek ly Josua my Jeriko mary tiu vui iy samrang ai padei nai kamta, A-i mary ai tiu vui iy samrang ai py, padei vui nai satang thai nai ne. Huni bo y Kibeon mary i khumichi ly Israela chengchi hawi ka-dyh ka-dawi leu sumneang asa iy, vanrei awm u nai satang py thai nai ne.
2 Jerusalem mary i khumichi ly khri pa-rei jei u na bo. Ati mana nai mo na baly Kibeon mary ly samrang awm nai mary puichi kamta, apu parai nai mary ne nai deaungkho y py, A-i mary tleaung y len iy, mary i khumichi ly tavai atiu kawp parai nai deaungkho y py ne.
3 Hunai deaungkho y Jerusalem mary i samrang Adonizedek ly Hebron samrang Hoham, Jamuth samrang Piram, Lakhisa samrang Japhia, Ekalon samrang Debirachi teng y savaichi pato iy,
4 “Kibeon mary i khumichi ly Josua, Israela chengchi hawi ka-dyh ka-dawi leu sumneang akhai u nai deaungkho y, Kibeon mary ai tiu ai nai kai ai sabawm u,” nanai thui hai bo.
5 Hunaibaly Jerusalem mary, Hebron mary, Jamuth mary, Lakhisa mary hawi Ekalon mary i Amori chengchi ai peang nai samrang leaung pangreichi ly amkawm u iy, mychi i tavaimi kanghuchi hawi amsa u i, Kibeon mary ai tiu u bo.
6 Huna nai khala Kibeon mary i khumichi ly Kilakala meingtym y awm nai Josua teng y khumi pato i, “Nang i miseaungchi ai khai su moh; jeu kaliki ly kaichi ai atleu kyh ba. Mawi tleaung mang i Amori samrang bawibawichi ly amkawm iy kaichi ai tiu u bo,” nanai satang thai hai bo.
7 Naibaly Josua ly vawi patyp nai risachi abawi nai Israela tavaimi kamkawm verei hawi, Kilakala mary i dengdairei amsa u bo.
8 Areng my Josua teng y, “Nichi ai jei moh. Kai ly nichi ai nang i kiu y kang au bo. Ami py nang ai amtang pajau y leang,” napi.
9 Josua ly Kilakala mary i dengdairei, Kibeon mary mang y vumtorei tavai amsa i, Amori tavaimichi ai tiu tamangtang nai ne.
10 Areng ly paleung ka-echi ai ahei phro iy preang hai bo. Huna nai khala Israela risachi ly Kibeon mary theung y, paleung ka-e neangneangchi ai tleh iy, Bethoron mawi aleaung palem i, tokalawi mang Azeka mary hawi Mekeda marychi khrairei tiu u nai ne.
11 Israela risachi my tiu nai deaungkho y, Amori risachi ly mawi aleaung lam mang y preang u nai khala, Azeka mary tym pa-rei, lam jeungrei kani mang i ji amai kalen puichi, nichi i tlang tleaung y Areng my tla hai bo. Ji amai tla hai nai deaungkho y dei naichi ly Israela chengchi my padei iy dei nai tleaung y nawi keh nai ne.
12 Amori tavaimichi ai Israela chengchi kiu y, Areng my au nai kani y Josua ly
“Aw kanito awi, Kibeon mary salo y anawn ba;
aw lo awi, Akalon mary leaunghawira y anawn ba,” nanai Israela chengchi i mo y thui bo.
13 Israela chengchi my paleung ka-echi ai tiu nai pajau y ryrei ly kanito hawi lo ly asyh y naimy anawn jo nai ne. Huni satang ly Jasa i cha-iu theung y tajiu typ bo. Kani khengrei kanito ly avah y naimy, kani laileaung y anawn jo nai ne.
14 Areng ly khumicho leaungrei i leu ai, huni kani y tangai pi nai ne. Huna nai kamta tlenrei py awm vai y, mo mang py awm ai ny y. Areng ly Israela chengchi mang y sabawm iy, tavai tiu pi lawh ly!
15 Huni bo baly Josua hawi Israela chengchi ly Kilakala Tai naira mang y vawi u ali teang bo.
Josua my Amori samrang leaung pangreichi ai patiu nai
16 Amori samrang leaung pangreichi ly tleaung u i, Mekeda tapiu theung y aheu u nai ne.
17 Khumi leaungrei ly huni samrangchi aheu nai niu i, Josua teng y thai hai bo.
18 Josua my, “Tapiu pa-kho y lengseaung pui pali tawp ly tamcheaung py khai.
19 Nangchi ly huni meingtym y awm u moh. Paleung ka-echi ai hui u iy, nithun mang tiu u. Marychi theung y kun vui moh sy! Nangchi i Areng Tameuh ly paleung ka-echi ai nangchi i kiu y ang au bo,” nanai Israela chengchi teng y thui pi bo.
20 Josua hawi Israela chengchi ly paleung ka-e neangneangchi ai tleh u bo. Na i py paleung ka-e phyreichi ly tleaung iy, lengseaung apai tapang nai theung y aheu u nai deaungkho y tleaung u nai ne.
21 Naibaly Israela tavaimi bawibawichi ly phrumai by y naimy, Josua awm nai Mekada Tai naira y vawi u ali teang bo. Huni pri y ami py Israela chengchi ai kado theu hai nai leu malawn py, katheu u vam y nai ne.
22 Naibaly Josua my, “Tapiu pa-kho paeaung iy, samrang leaung pangreichi ai kai teng y jeu hai u,” nanai leu pei bo.
23 Nichi ly Jerusalem samrang, Hebron samrang, Jamuth samrang, Lakhisa samrang hawi Ekalon samrangchi ai tapiu theung i nai patheu iy,
24 Josua teng y hawi u nai ne. Huna nai khala Josua ly Israela cheng bawibawichi hawi, mymy hawi vanrei tavai tiu nai luchi ai mymy teng y palau bo. Tavai luchi teng y, “Huni samrangchi i kaneaung y kheu hawi chiu u,” nanai leu pei nai kamta, nichi ly kheu hawi chiu u bo.
25 Josua my tavai luchi teng y, ‘Areng ly nangchi i paleung ka-e ngiereichi ai, hina nai kamta sa nai deaungkho y jei u moh; paleung phra u moh; atho sa iy paleung sorai naimy awm u,” napi.
26 Hunaibaly Josua ly samrang leaung pangreichi ai haisau hawi tleh iy, veuchi ai dengkeaung keung pangrei salo y, kani dym nai ryrei bang hau bo.
27 Kani avah nai khala Josua my, veuchi ai dengkeaung keung tleaung i nai pala iy, nichi i aheu nai tapiu theung y aphi su ai nai leu pei bo. Naibaly tapiu ai lengseaung puichi hawi pali hai tawp i, vaini khrairei huni lengseaung puichi ai niu pajau nai ne.
Josua my Amori chengchi i khu ka-peangchi peang vui bi nai
28 Huni kani y my Josua ly Makedah mary ai tiu pajau iy, Makedah samrang ai patiu vui bo. Mary i khumichi ai py, leaungrei py takhawi y naimy tleh chauchau nai ne. Jeriko samrang ai padei nai kamta, Makedah samrang ai py padei teang bo.
29 Naibaly Josua hawi Israela tavaimichi ly Makedah mary i dengdairei, Libana mary mang y tavai thau u bo.
30 Areng huni mary hawi huni mary i samrang ai py, Israela chengchi i kiu y au bo. Nichi ly mary i khumichi ai, leaungrei py tleaung y pa-rei tleh pawn nai ne. Jeriko samrang ai padei vui nai kamta, Libana samrang ai py padei vui bo.
31 Naibaly Josua hawi ni i risachi ly Libana mary i dengdairei, Lakhisa mary mang y amsa i, mary ai katanmeuh iy tiu u bo.
32 Areng ly atiu nai pa-nyh kani y, Lakhisa mary ai Israela chengchi i kiu y au bo. Nichi ly Libana mary i khumichi ai sa nai kamta, Lakhisa mary i khumi bawibawichi ai py, leaungrei py tleaung y na pa-rei tamyh pawn bo.
33 Kizar samrang Horam ly Lakhisa samrang mang y asa hai nai tavai atiu i py, Josua ly ni hawi ni i tavaimi kamkawm ai tiu nai pajau i, leaungrei py tleaung y pa-rei tamyh bo.
34 Huni bo y Josua hawi Israela risachi ly Lakhisa mary i dengdairei, Ekalon mary mang y amsa i, mary ai katanmeuh iy tiu u bo.
35 Nichi ly huni kani y my, mary ai tiu nai pajau i, Lakhisa mary i khumichi ai sa nai kamta, Ekalon mary i khumichi ai py, leaungrei py tleaung y pa-rei padei pawn teang.
36 Huni bo y Josua hawi Israela risachi ly Ekalon mary i dengdairei, mawi aheungra awm nai Hebron mary mang y amsa u i huni mary ai tiu iy,
37 pajau u vui nai ne. Nichi ly Hebron samrang hawi mary i khumi bawibawichi ai py, sahawi y awm nai marychi ra i khumi bawibawichi ai py, tleh u pawn nai ne. Josua ly Ekalon mary ai taphra kamlang nai kamta, Hebron mary ai py taphra pawn teang. Ami py kangheng tleaung nai by y.
38 Hunaibaly Josua hawi Israela risachi ly Debira mary y ali teang i, huni mary ai tiu u bo.
39 Nichi ly samrang hawi vanrei mary ai py, tengpang sahawi y awm nai mary ngierei ai py tiu vui iy, huni marychira y awm nai khumi bawibawichi ai tamyh u pawn bo. Josua ly Hebron mary, Libana mary hawi, hunichi i samrangchi ai sa nai kamta, Debira mary hawi huni i samrang ai py sa teang nai ne.
40 Josua ly pri verei ai tiu nai eaung bo. Ni ly mawi tleaung pri i samrangchi, nisi mang mawi aheung hawi, nidym mang mawi kheutangra y awm nai samrangchi hawi, tokalawi mang i khutaha meingtymra y awm nai samrang bawibawichi ai py tiu i eaung nai ne. Huni pri i khumi bawibawichi ai leaungrei py tleaung y pa-rei tamyh pawn bo. Israela chengchi i Areng Tameuh my leu pei nai saho y hina nai sa nai ne.
41 Josua ly tokalawi mang i Kadesabana mary dengdairei, pangli peang sahawi y awm nai Kaza mary y tym pa-rei py, Kosen pri dengdairei tosyh mang i Kibeon mary tym pa-rei py, tavai thau u bo.
42 Israela chengchi i Areng Tameuh ly Israela chengchi mang y asa hai nai deaungkho y, Josua ly huni samrang bawibawichi hawi, nichi i prichi ai tiu i eaung veangveang nai ne.
43 Huni bo y Josua hawi Israela risa bawibawichi ly Kilakala Tai naira mang y vawi u teang bo.