38
Jeremia ly tui by y nai tuikan theung y tym nai
1 Mattan i chapo Shephatiah, Pashura i chapo Kedalia, Shelemiah i chapo Jehukal hawi, Malakhia i chapo Pashhurchi ly khumi mipuichi teng y, kai i leu thui naichi thai hai u bo.
2 Kai ly khumichi teng y Areng i leu thui pi nai ly “Hini mary y awm jojo naichi ly tavai takai, tahum takang, no kanghawichira y dei u ai. Na i py Babulon chengchi teng y chei iy, kasum apei nai ngiereichi ly dei u ai ny y. Nichi ly ati py ne sy, kangheng tleaung u ai.
3 Kai ly hini mary ai Babulon samrang i tavaimichi teng y kapei ai; nichi my py hini mary la vui ai,” napi.
4 Naibaly bangtangchi ly samrang teng y, “Hini khumi ai padei i naini hawi ai. Ni ly hini leuchi thui nai deaungkho y, mary theung i tavaimi risachi ai atho di hai bo. Mary theung y awm rai nai khumi bawibawichi py, hinai kamta lawm hai bo. Ni ly khumichi hawi ai nai hau y, hawi y naira naini hau khyh,” napi u.
5 Hunaibaly samrang Zedekiah my, “Hawi mang, ni ai nangmychi ngaingai so u; nangchi ai kam y leang mang,” napi.
6 Hunai deaungkho y bangtangchi ly kai ai pahawi iy, samrang yhm apai theung y awm nai samrang i chapo Malakhia i tuikan theung y, vuinawn hawi pala kathiu bo. Huni tuikan theung y ly tui by y, aneaung kapan awm khyh nai deaungkho y, kai ly aneaung kapan theung y a-up nai ne.
7 Naibaly samrang yhm y kalop sa nai Ethiopia cheng tlip chum nai Ebadameleh ly hina nai kamta huni khumichi my tuikan theung y pala jo bo, nanai thai u. Huni neng khala y samrang ly Benjamin katheu pa-kho sahawi y, leu ka-rum pui sa u bo.
8 Hunai deaungkho y Ebadameleh ly samrang yhm i nai, huni meingtym y chei iy samrang teng y,
9 “Samrang awi, hini khumichi i sa naichi ly tamang bo. Nichi ly Jeremia ai tuikan theung y pala u veng bo. Ni ly kajeu kanglam y dei angchi ai. Mary theung y py teicha teinei by y bo,” napi.
10 Naibaly samrang ly Ebedmeleh ai huni meingtym y awm nai khumi leaung thomrei palau hai i, Jeremia dei y rai khala my tuikan theung i atheu kalau ai nai leu pei.
11 Hunai deaungkho y Ebedmeleh ly khumichi ai palau iy, huni samrang yhm i vawnsaichi khai nai takun theung y kun; hu y awm nai ateaung kamawnchi la achu iy, tuikan theung y awm nai kai teng y vuinawnchi hawi vanrei pala pi bo.
12 Naibaly Ebadameleh ly kai teng y, “Nang ai vuinawnchi my ngan abei y ai nai, hini ateaung kamawnchi ai nang i takaja anui y takem ba,” napi. Kai ly hunai kamta kasa.
13 Naibaly nichi ly kai ai vuinawnchi hawi atheu iy, tuikan theung i nai ang palawi piu bo. Huni bo y kai ly samrang yhm apai theung y awm ai nai nga bo.
Zedekiah ly Jeremia teng y tau hnei nai
14 Samrang Zedekiah ly kai ai Achura yhm pa-thom i katheu pa-kho mang y ang pahawi iy, “Nang ai leu sairei kang deng ai; kai teng y ati sai py apha moh ba,” napi.
15 Kaimy, “Kai ly kateng khyp kang thui pi lawh baly nang ly kai ai padei ai. Kai ly tau kang pei i py, nang my tahm khai ai ny y leang,” napi.
16 Hunai deaungkho y samrang Zedekiah my kai teng y, “Achi ai hengra pei nai keung Tameuh ly Tameuh kangheng ne nai deaungkho y, kai ly nang ai padei y leang. Nang ai padei ai ngai nai khumichi kiu y py au y leang mang,” nanai kangviu y adeu bo.
17 Huna nai khala y kai ly samrang Zedekiah teng y, Israela chengchi i Tameuh, ati cheaungkhang sa thai nai keung Areng my, ‘Nang ly Babulon samrang i bangtangchi teng y kasum apei baly nang heng ai; hini mary py mai my kang ai ny y; nang hawi nang i yhm dengtheungchi py heng u bawi ai.
18 Na i py nang kasum apei y lawh baly, hini mary ly Babulon chengchi i kiu y tym ai. Nichi my py hini mary ai mai leng vui ai. Nang py nichi kiu i nai tleaung ai ny y,’ nanai leu ang pei,” nanai thui pi.
19 Na i py samrang Zedekiah my, “Babulon chengchi mang y preang u nai Juda chengchi ai kai ly jei. Kai ly nichi i kiu y aau lawh ai nabaly, kai ai khri pa-rei ana u ai,” napi.
20 Kaimy, “Nang ly nichi i kiu y tym ai ny y. Nang teng y kaimy kang thui pi nai Areng i leu phai tangai iy, sa ai nai kang takeng nai teu. Hina nai kamta sa baly cheaungkhangra hawi ai i, nang ly hengra nga ai.
21 Na i py nang ly kasum apei ai nai akhi vui lawh teu baly, ati leaungsaichi tym ai mo, nanai Areng ly kai ai leu pei nai ne.
22 Juda samrang i yhm y awm rai nai neampachy ngiereichi ai, Babulon samrang i bangtangchi teng y hawi u vui ai. Nichi ly hina nai theu u nai thym khala,
‘Samrang i ahawi hawi keh naichi ly ni ai li-tapawp iy,
ni i tlang tleaung y peang rau bo.
Vai ly samrang i kheuchi ly aneaung kapan theung y a-up vui bo i,
huni ahawi kahawichi ly ni ai khai u su bo,’ nanai thui u ai,” napi.
23 Huni bo y kaimy, “Babulon chengchi ly nang i ajuchi hawi cho chanau bawibawichi ai hawi pawn ai. Nangmy kypkyp py nichi kiu i nai tleaung ai ny y; Babulon samrang my ang patiu ai. Hini mary py mai y kang vui ai,” kanapi.
24 Samrang Zedekiah my py, “Vai, ani i thui nai leuchi ami py pany moh sy. Huna i naini nang ly deira i nai law tleaung ai.
25 Kai ly nang hawi leu arum nai kai i bangtangchi my thai nai khala, nichi ly nang teng y jeu iy, ani i arum naichi ang deng u ai. Nichi my, ‘Kaichi teng y thui pi baly nang ai kaichimy kang padei y leang,’ nanai adeu u ai.
26 Na i py nang ly nangmy dei y ai nai Jonathan i yhm y tha teang moh kyh, nanai takeng nai khyh, nanai nichi teng y thui pi,” napi.
27 Naibaly samrang i bangtang bawibawichi ly kai teng y jeu u iy, leu deng u bo. Na i py kai ly samrang my kai ai leu pachei yb nai kamta naini, pathang pi khyp bo. Ami py samrang kaini i arum nai leuchi thai nai khumi by y nai deaungkho y, nichi ly ati sai py so u thai y bo.
28 Kaimy py paleung ka-echi i kiu y Jerusalem mary tym nai kani ryrei, samrang i yhm apai theung y awm ai nga nai ne.Ref 38:28: Ezek 33:21