39
Jerusalem mary anawi nai
1 Juda samrang Zedekiah i samrang atheng nai takawrei saneng, lo horei khala, Babulon samrang Nebukhadnezar ly my i tavaimi kamkawm pui harei hawi tym iy, Jerusalem mary ai tiu nai ne.
2 Zedekiah i samrang y atheng nai holai harei saneng, palyh lo, kani takawrei kani y mary apaichi anawi bo.
3 (Jerusalem mary ai peang vui nai khala Nerkala sareza, Shamka Nebo, Sarsekhim hawi takhra Nerkala Sarezachi raurei, Babulon samrang i bangtangchi ly umtang i katheu pa-kho mang y chei iy ateh u bo.)
4 Hina naichi ai Juda samrang Zedekiah hawi tavaimi risachi my niu baly, vum y mary theung i dengdairei preang ai nai atho sa u bo. Nichi ly akho bai lam mang, mary apai nyhrei sala i katheu pa-kho mang theu iy, Jordan leaunghawi mang y preang u bo.
5 Na i py Babulon tavaimichi ly nichi ai hui nai patiu iy, Jeriko adym sahawi y Zedekiah ai patiu u bo. Hunaibaly ni ai Babulon samrang Nebukhadnezar i awm nai Hamath khu, Riblah mary mang y hawi u bo. Huni mary y Nebukhadnezar ly Zedekiah ai tara chih bo.
6 Riblah mary y my, Babulon samrang ly Zedekiah i mei ka-niu y, ni i chapochi ai padei hai bo. Ni ly Juda samrang i bangtangchi ai py padei hai nai ne.
7 Zedekiah i mei ai py tha pawn bo. Hunaibaly ni ai Babulon mary mang y pahawi ai nai sengkry hawi thang hai.
8 Huna nai thym khala y Babulon chengchi ly samrang i yhm hawi khumichi ai mai leng iy, Jerusalem mary apaichi panawi u bo.
9 Kangkhym y tavailu areng Nebuzaradan ly mary theung y awm rai nai khumichi ai, mymy teng y preang u naichi hawi vanrei langheng palawn iy, Babulon mary y hawi vui nai ne.
10 Ni ly ati sai py by y nai khumi kamawn phyreichi ai, kreip akhochi hawi li hlauchi pei iy Juda pri y daw jo bo.
Jeremia theaung i lawi nai
11 Babulon samrang Nebukhadnezar ly tavailu areng Nebuzaradan ai,
12 “Nang chei ly Jeremia ai palau iy hawihai kry ba; ni ai ano moh. Ni i ngai nai kamta sa ai nai pei pi,” nanai leu taviu bo.
13 Hunai deaungkho y Nebuzaradan, samrang i bangtang kalen Nebushazaban hawi takhra bangtang kalen Nerkal Sareza napi nai Babulon samrang i bangtang bawibawichi ly
14 kai ai samrang yhm apai theung i nai pahawi u bo. Hunaibaly nichi ly kai ai chymme naimy yhm y tym teang ai nai Shanphan i katu, Ahikam i chapo Kedalia i kiu y au bo. Hunai deaungkho y kai ly kaimy i chengchi hawi vanrei, awm ali teang ai nai nga bo.
Ebedmeleh i vui athang khai naira
15 Kai ly samrang yhm apai theung y theaung tla nai thym khala, Areng ly kai ai leu ang pei nai ne.
16 Mymy ly “Nang ly Ethiopia cheng Ebedmeleh teng y, Israela chengchi i Tameuh, ati cheaungkhang sa thai nai keung Areng my, kai ly vaichi khala y thui pi yb nai kamta, hini mary phra seaungkhrang hai ai. Hini mary ai nang chawn hai ai ny y. Neng tym nai khala y hini atitichi tym nai niu ai nai nang ly huni mary y awm ai.
17 Na i py nang ai kai, Areng my kang kry ai nai deaungkho y, nang ly nangmy jei hyn nai khumichi i kiu y tym ai ny y.
18 Kai ly nang ai chymme naimy kang khai ai nai deaungkho y, nang ai ly padei ai ny y. Nang ly kai ai ym cheng nai deaungkho y, nang ly tlang heng naira nga ai. Hini ly kai, Areng i thui nai leu ne,’ nanai leu pei nai thui pi,” napi.