37
Jeremia teng y Zedekiah my ahui nai
1 Babulon samrang Nebukhadnezar ly Jehojakim i chapo, samrang Jehojakhin i jeng y, samrang Josia i chapo Zedekiah ai samrang y palyn bo.Ref 37:1: 2 Areng 24:17; 2 Neng 36:10
2 Na i py Zedekiah ly my i bangtangchi hawi khumichi ly kai teng y Areng my leu pei nai tangai u y.
3 Samrang Zedekiah ly Shelemiah i chapo Jehuka hawi Maaseiah i chapo pathyp pi nai keung Zephaniah nini ai kai teng y pato nai deaungkho y, nini ly kai teng y, “Achi i pri i vui, achi i Areng Tameuh teng y chiu so pi,” nanai thui hawi.
4 Huna nai khala y kai ly theaung tlo y leang rai; kai ly khumichi hawi tlamsa naimy amkawm ai nai nga rai.
5 Huna nai thym khala samrang Pharao i tavaimichi ly Aikupta pri i dengdairei tavai amsa u bo. Huna nai tavai amsa nai thai u nai khala y, Jerusalem mary ai takanmeuh nai Babulon tavaimichi ly tavai athawn u pan veng nai ne.
6 Naibaly Israela chengchi i Areng Tameuh my
7 kai teng y pato nai keung Zedekiah teng y, “Nang ai sabawm ai nai vai, amsa nai Pharao samrang i tavaimichi ly mychi i awm nai Aikupta pri y vawi u ali teang ai.
8 Huna nai khala Babulon chengchi ly ang jeu teang ai i, hini mary ai tiu nai peang vui iy mai leng vui ai.
9 Babulon chengchi ly ang jeu u takengkei ai. Hunai deaungkho y nichi ang jeu u ali teang ai ny y, nanai nangchi i ka-dawn tamang y ai nai, kai Areng my kang pany hai nai ne.
10 Nangchi ly nangmychi ai tiu nai Babulon tavaimichi vereichi ai tiu pajau iy tamo kalem nga naichi naini, mychi i kanih yhm y awm khyh bo na lawh teu i py, huni khumichi ly ang thau u iy, hini mary ai mai leng vui ai,” napi.
Jeremia ai patiu vui nai hawi theaung pala nai
11 Aikupta tavaimichi ly sahawi y kasa dudu nai deaungkho y, Babulon tavaimichi ly Jerusalem mary i nai athawn pan veng nai ne.
12 Huna nai khala y kai Jeremia ly kaimy i yhm dengtheungchi hawi yhmtheaung katuichi la iy, Jerusalem mary i dengdairei Benjamin khu ka-peang mang y preang bo.
13 Na i py Benjamin katheu pa-kho y tym nai khala ly Hananiah i katu, Shelemiah i chapo Irijah napi nai tamcheaung my, “Nang ly Babulon chengchi mang y preang nai khumi ne lo-oh!,” napi.
14 Kaimy, “Nang i thui nai kamta ny y! Kai ly preang nai ny y leang,” nanai pathang i py Irijah ly kai i leu tangai y i, kai ai patiu iy samrang i bangtangchi teng y hawi nai ne.
15 Huni khumichi ly kai ai khri pa-rei kado theu hai nai deaungkho y, pakhau chum baly samrang i secretary Jonathan i yhm y paeung bo. (Huni yhm ai ly theaung palawn nai ne.)
16 Kai ly khaileaung theung i kaveng theung y tym i, kra parai na pa-rei aeung ai nai tla bo.
17 Naibaly samrang Zedekiah ly kai ai samrang yhm y palau i, “Areng teng i leu pei nai sai sairei awm a?,” nanai kangviu y angdeang.
Kaimy, “Awm chy, nang ly Babulon samrang i kiu y tym ai,” nanai kapathang pi.
18 Huni bo y kaimy, “Kai ly nang hawi, nang i bangtangchi, ti y baly khumichi ai ati hawi y nai kasa iy nang ly kai ai theaung y paeung nai mo?
19 Babulon samrang ly nang ai py, hini pri ai py tiu ai ny y, nanai ang thui pi nai keung nang i amochi ly ma mang y awm u pawn mo?
20 Samrang awi, kai i leu tangai iy kai i thui nai kamta sa ai nai kang takeng. Kai ai ly nang i tau pei nai keung Jonathan yhm i theaung y pato teang moh kyh; pato teang lawh baly kai ly huni yhm y kadei angchi khyp ai,” napi.
21 Hunaibaly samrang Zedekiah ly samrang yhm apai theung y kai ai deaungki thiu iy khai ai nai leu pei bo. Kai ly mary i takochi khei nai pa-rei, tako paawp naira i tako kanirei y phi harei kanga. Huna nai kamta kai ly samrang yhm apai theung y kaawm nai ne.