36
Achura yhm theung y Baru my cha aeang phain nai
1 Samrang Josia i chapo Juda samrang Jehojakim i samrang y atheng nai palyh saneng, Areng ly kai teng y,Ref 36:1: 2 Areng 24:1; 2 Neng 36:5-7; Dan 1:1-2
2 “Nang ly cha aeang harei la iy Israela pri, Juda pri hawi pri tleireichi molam y kai i leu pei naichi tajiu typ ba. Samrang Josia deung y kai i leu pei nai tangai u nai neng dengdai vaini khrairei, nang teng y leu kang pei nai bawibawi tajiu typ ba.
3 Juda khumichi ly mychi i vui kaimy dawn yb nai ka-jeira satang thai u lawh baly, mychi i hawi y naira khai su tan khai u su lym ai. Huna nai khala y kai ly nichi i hawi y sa nai kamngochi pahen pi ai,” napi.
4 Hunai deaungkho y kai ly Neriah i chapo Baru ai palau iy, mymy ly Areng i leu pei nai ngiereichi tajiu typ ai nai labeaung mang thui pi nai ne. Baru my py cha aeang hareira y tajiu typ bo.
5 Naibaly kai ly Baru teng y, “Kai ly Achura yhm theung y kun ai nai ngo y.
6 Na i py vai tlenrei khumichi biu hai u nai khala y, kai ly nang ai Achura yhm y kang chei hai ai nai ngai. Areng my kai teng y leu pei nai deaungkho y, kaimy nang ai labeaung mang kang thui pi nai ngiereichi ai khumichi thai bawi pa-rei, nang ly huni cha aeang ai athorei my phain pi ai nai tla. Nangmychi mary hawi avangchira i jeu u nai Juda khumichi raurei, hu y awm nai khumichi thai pa-rei, nang ly hini cha aeang phain pi.
7 Areng ly hini khumichi ai kaso tahyn theu ai hawi nanai kado theu naira hawi pajei pahyn nai deaungkho y, khumichi ly mychi i hawi y nairachi khai su iy, Areng teng y chiu sa u tan chiu sa u lym ai,” nanai leu pei bo.
8 Hunai deaungkho y Baru ly my teng y kaimy thui pi nai kamta, Achura yhm theung y Areng i leu pei naichi hawihai palai phain pi tanga bo.
9 Josia i chapo Juda samrang Jehojakim i samrang atheng nai pa-ngo saneng, takawrei lo y, Israela khumichi ly Areng y meimai nga ai nai molam, biu hai ai nai neng thai hai nai deaungkho y, Jerusalem mary i khumi bawibawichi py, Juda mary tleirei i jeu u nai khumi bawibawichi py, biu hai u bo.
10 Huna nai khala y Baru ly cha aeangra i, kaimy labeaung mang thui pi nai ngiereichi ai, Achura yhm theung y awm nai khumichi thai pajau nai meingtym mang phain pi bo. Ni ly Kemaria i chapo, samrang ai tau pei nai keung Shaphan i takun mang my huni cha phain pi nai ne. Huni takun ly Achura yhm katheu pa-kho kangtha kunra sahawi, salo kangtheng theung y awm nai ne.
Samrang i bangtangchi teng y cha aeang phain pi nai
11 Kemaria i chapo, Shaphan i katu Mikaia ly huni cha aeangra y awm nai Areng i leuchi Baru my phain nai thai baly,
12 samrang yhm theung i bangtangchi ka-vum sa nai, samrang ai tau pei nai keung i takun mang y chei bo. Huni meingtym y samrang ai tau pei nai keung Elishama, Shemaiah i chapo Delaiah, Akhabo i chapo Elanathan, Shaphan i chapo Kemaria, ananiah i chapo Zedekiah hawi takhra samrang i bangtangchi awm u nai ne.
13 Mikaia ly khumi mipuichi teng y Baru i phain pi naichi theung i, my i thai nai ngiereichi huni khumichi teng y thui pi bo.
14 Huna nai khala y samrang i bangtangchi ly Kushi i kati, Shelemiah i katu, Nethaniah i chapo Jehudi ai Baru teng pato iy, Baru ai my i khumichi teng y phain pi nai cha aeang syn nai my jeu ai nai taviu bo. Baru py huni khumichi teng y chei nai ne.
15 Huni khumichi ly Baru ai ateh ai nai thui pi chum baly, “Hini cha aeang ly kaichi teng y phain pi,” napi i, Baru ly phain pi bo.
16 Phain pi chym baly samrang i bangtangchi ly athengra nai meimai hawi leaung leaungrei akhen u leungtang iy, “Hini satang ly samrang teng y kaichi thai hai ai nai tla ai,” nanai Baru teng y thui pi bo.
17 Naibaly nichi my Baru teng y, “Nang ly ati mana nai y hini leu bawibawichi nga iy tajiu typ nai mo? Hunichi ai nang teng y Jeremia my labeaung mang thui pi nai a?,” nanai deng u.
18 Baru my, “Hini leu bawibawichi ly Jeremia my labeaung mang ang thui pi iy, kaimy chatui hawi hini cha aeangra y katajiu nai ne,” nanai pathang pi.
19 Naibaly samrang i bangtangchi my, “Nang hawi Jeremia ly preang iy aheu hawi ai nai tla. Nangni i awm naira ly ami ai py pany hai moh,” nanai Baru teng y thui pi u bo.
Samrang my cha aeang mai leng vui nai
20 Samrang i bangtangchi ly huni cha aeang ai, samrang i secretary Elishama i takun y khai jo iy, samrang yhm y chei u i, samrang teng y huni satang bawibawichi amti pi.
21 Naibaly samrang ly Jehudi ai pato iy cha aeang la hai bo. Jehudi py Elishama takun i, huni cha aeang la iy samrang hawi vanrei, samrang i sahawi y taki teungtareung nai bangtangchi i mo y phain pi nai ne.
22 Huni neng ly kaseih neng ne i, samrang ly my i kaseih neng y awm nai yhm theung i takeang mai mo y ateh.
23 Jehudi my chang thom chang palyhrei phain chum nai hawimy samrang ly huni chengchi ai acho hawi kalabaw iy mai theung y thun vui bo. Ni ly hina nai kamta cha aeang verei mai y kang keng na pa-rei sa nai ne.
24 Na i py cha aeangra abawi nai leu sai bawibawichi thai nai samrang py, bangtangchi py jei hyn y, uikheih nai ka-ma-ra py patei u y.
25 Elanathan, Delaiah hawi Kemariachi my huni cha aeang mai y leng y ai nai samrang teng y takeng u teu i py, samrang ly nichi i takeng nai tangai pi y.
26 Naibaly samrang ly Azariela i chapo Seraiah, Abadela i chapo Shelemiahchi hawi vanrei, my i chapo Jeramela teng y, kai hawi kai i secretary Baru ai patiu ai nai leu pei bo. Na i py Areng ly kaini ai heu vui nai ne.
Takhra cha aeang hareira y Jeremia my tajiu hai nai
27 Baru teng y kaimy labeaung mang thui pi nai cha aeang ai samrang my mai leng veng nai bo y, Areng ly kai teng y,
28 “Nang ly takhra cha aeang harei la iy, samrang Jehojakim my mai leng veng nai cha aeangra y abawi nai leu sai ngiereichi ai tajiu ba.
29 Samrang Jehojakim ai py Areng my, “Nang ly cha aeang ai mai leng vui chum baly Jeremia teng y, Babulon samrang ly hini pri y ang jeu ai i, hini pri y taphra iy khumichi hawi tawnbawichi padei pawn ai, nanai ati mana nai thui lawh mo?, nanai deng bo.
30 Hunai deaungkho y nang i kangpreangchi ly mana khala py, Davida i areng atehra y samrang atheng ai nai nga u ai ny y, nanai kai Areng my kang thui pi bo. Nang i veu py kanithun y ly kanibi ajai iy, vum y ly kadam tla hai ai nai aphi u su ai.
31 Nangchi i sa tamang nai kamngochi deaungkho y, kai ly nang hawi nang i katu chanauchi ai, nang i bangtangchi hawi vanrei kapajeng ai. Nang hawi Jerusalem mary i khumichi, Juda khumichi ly kaimy pany hai naichi ai tahm khai u y. Hunai deaungkho y kai ly kaimy kang pajei, kang pahyn nai ka-jeira ai nangchi i tlang tleaung y kang tym hai ai, nanai leu pei nai amti pi,” napi.
32 Huna nai khala y kai ly takhra cha aeang harei la iy, kai i secretary Baru teng y pei pi. Baru ly samrang Jehojakim my mai leng vui nai cha aeangra y abawi nai cha ngiereichi ai, kaimy labeaung mang thui pi nai kamta tajiu bo. Kaimy labeaung mang thui pi nai ka-tawm leuchi tajiu panawi bi nai ne.