32
Jeremia ly li harei van nai
1 Areng ly Juda samrang Zedekiah i samrang y atheng nai saneng horei khala y kai teng y leu ang pei nai ne. Huni saneng ly Babulon samrang Nebukhadnezar i samrang atheng nai saneng holai tajarei saneng ne.Ref 32:1: 2 Areng 25:1-7
2 Huni neng khala y Babulon samrang i tavaimichi ly Jerusalem mary ai tiu nai ne. Kai ai py samrang yhm apai theung y ang paeung.
3 Samrang Zedekiah ly hu y kai ai theaung pala nai bo y, “Hini mary ai Babulon samrang teng y kapei ai; ni ly hini mary ai peang vui ai.
4 Samrang Zedekiah ly Babulon khumichi kiu i nai tleaung ai ny y. Babulon samrang i kiu y tym ai i, samrang hawi mo atha iy theaung theung y leu arum ai.
5 Zedekiah ai ly Babulon pri y hawi vui ai i, ni ai chih y ryrei ly huni mary y awm jo ai. Ni ly Babulon chengchi ai tiu ali teu i py eaung ai ny y. Hini ly kai, Areng i thui nai leu ne,” nanai ati mana nai y thui lawh mo, na iy ang thui tamawn nai ne.
6 Areng my kai teng y,
7 nang i amprang Shalum i chapo Hanamela ly nang teng y ang jeu iy, Benjamin khujyhra i Anathora y awm nai ni i li harei van ai nai, nang teng y ang thui pi ai. Ati mana nai mo nabaly nang ly ni hawi kasa keh nai amjo amnau ne iy, huni khaileaung van ai nai avo nai khumi ne,” napi.
8 Hunaibaly Areng i thui nai kamta, kai i amnau Hanamela ly kai i awm nai theaung theung y ang jeu iy, “Benjamin khu ka-peang theung y awm nai kai i li van ba. Nang ly kai hawi abi keh nai amjo amnau ne nai deaungkho y, huni khaileaung van ai nai avo keh,” napi. Huna nai khala y kai ly huna sa ai nai Areng my leu pei nai kapany i,
9 Hanamela teng i li van nai, ni ai tangka neh iy pei pi bo. Huni li vang ly tangka chang holai saryhrei ne.
10 Kai ly pany hai nai keungchi i mo y sumneang akhai nai cha lamai nip iy, pajawp typ nai ka-ma-ra nip chum baly, tangka ly sie y neh iy pei pi nai ne.
11 Hunaibaly kai ly leaung nyhrei paleung ka-dyh sumneang akhai iy, pajawp typ nai ka-ma-ra nip nai harei hawi, pajawp typ nai ka-ma-ra nip y nai harei la iy,
12 Maseja i katu Neriah i chapo Baru i kiu y kapei pi bo. Kai ly huni sumneang akhai nai chachi ai Hanamela i mo y py, Ka-jo ka-van sa nai khala pany hai nai keung y lamai nip nai khumichi i mo y py, theaung apai theung y ateh u nai Hebrai chengchi i mo y py, Baru teng y kapei pi.
13 Kai ly huni khumi bawibawichi i mo y Baru teng y,
14 “Israela chengchi i Tameuh, ati cheaungkhang sa thai nai keung Areng my nang ai, ‘Hini pajawp typ nai ka-ma-ra nip nai, khaileaung van nai sumneang cha hawi, pajawp typ nai ka-ma-ra nip y nai sumneang cha ai la mei iy, saneng neangneang kra i py phra thai y ai nai, alai laawm theung y khai ai nai leu pei bo.
15 Israela chengchi i Tameuh, ati cheaungkhang sa thai nai keung Areng my hini pri y yhmchi, lichi hawi kreip akhochi ai vai mo mang y ka-jo ka-van sa u bi ai, nanai leu pei bo,” napi.
Jeremia i chiu sa nai
16 Kai ly khaileaung ka-jo ka-van sumneang akhai nai cha ai, Neri i chapo Baru teng y pei pi nai bo baly, Areng teng y chiu kasa.
17 “Aw Areng Tameuh, nang ly nang parai nai phum-ang hawi, kani hawi khaileaung ai sa bo. Nangmy so thai y ai nai pa-rei rai naira ha py by y.
18 Nang ly khumi sang neangneangchi teng y khaw parai nai tamen naira patei pi bo. Na i py khumichi ai mychi amsi pajochi i kamngo molam y pajeng nai ne. Nang ly nang parai nai hawi sa thai naira kawi angym nai Tameuh ne. Nang ly ati cheaungkhang sa thai nai keung Areng ne.
19 Nang i ka-dawnchi ly lyh ai hawi parai iy, sa naichi py len parai tlai nai ne. Nang ly khumichi i sa nai ngiereichi ai niu nai ne i, nichi ai mychi i sa nai kamta kawn vang pei pi bo.
20 Nang ly Aikupta pri y lyh ai hawi naichi hawi, rengrang ka-ma-rachi patei pi. Vaini khrairei huni atitichi ai Israela chengchi theung y py, khumi cheng cheaungkhangchi theung y py, patei pi nai deaungkho y nang i satang ly meingtym tleirei y ahei nai ne.
21 Paleung ka-echi ai jei hyn hai ai nai rengrang ka-ma-rachi hawi lyh ai awm naichi hawimy, nang ly nangmy i sa thai nairachi teaung iy nang i khumi Israela chengchi ai Aikupta pri dengdairei theu hai bo.
22 Nang ly nichi i amsi pajochi teng y leu adeu nai kamta, nang chawn iy amti amjang thawn nai hini pri ly nichi ai pei nai ne.
23 Na i py nichi ly hini pri y tiu iy amtym u nai khala ly nang i leu pei nai tangai u y; thui parip naichi py patawm u y. Nang i sa hai naichi ly harei py so u y. Hunai deaungkho y nang ly hini ka-jeirachi ai nichi i tlang tleaung y tym hai bo.
24 “Babulon khumichi ly hini mary ai katanmeuh iy tiu vui thai ai nai, abyhra amkeuchi mary kamki sa u. Nichi ly tiu u dudu bo. Tavai takai, tahum takang hawi no kanghawichi deaungkho y, hini mary ly nichi i kiu y tym vui ai. Aw Areng, nang ly nangmy i leu pei nai ngiereichi teng khyp, nanai niu nai ne.
25 Na i py aw Areng Tameuh, hini mary ai Babulon khumichi my peang vui enten nai khala malawn py, nang ly kai ai pany hai nai keungchi i mo y, li khaileaung van ai nai leu pei lawh ly” napi.
26 Huna nai khala Areng my kai teng y,
27 “Kai ly khumi bawibawichi i Areng Tameuh ne. Kai i so thai y ai nai rai naira ha py by y.
28 Hunaibaly kai ly hini mary ai Babulon samrang Nebukhadnezar hawi, ni i tavaimichi teng y pei vui ai. Nichi ly hini mary peang vui ai.Ref 32.28: 2 Areng 25:1-11; 2 Neng 36:17-21
29 Hini mary ai tiu nai Babulon khumichi ly jeu iy mai leng u ai. Yhm amphuchi salo y Bala tameuh teng y mui katui leng patlum nai molam py, tameuh takhrachi i vui y kreip hang talam nai molam py, khumichi my kai ai kado patheu nai yhmchi hawi vanrei, hini mary verei kang ai.
30 Israela hawi Juda khumichi ly jangni khala i ka-so, kai i ngai y nai atitichi naini sa u lawh. Israela khumichi ly mychi i sa nai mynchi hawi, kai ai kado theu hai u bo.
31 Hini mary ai palum khyp khala i dengdairei, mary i khumichi ly kai ai khrikhri pa-rei kado patheu u nai ne.
32 Israela khumichi hawi Juda khumichi, samrangchi hawi bangtangchi, pathyp pi nai keungchi hawi amochi, Juda pri hawi Jerusalem mary y awm nai khumichi i hawi y sa nai molam y kai ly hini mary taphra ai nai dawn yb bo.
33 Nichi ly kai ai nithun thun u bo. Kai ly nichi ai kaparip akheng teu i py, nichi ly tangai ai nai ngai u y; thui parip nai py ngai u y.
34 Nichi ly kai i amyn y sa nai Achura yhm theung y amso ngai hawi nai mynchi khai iy chai nem hai y bo.Ref 32:34: 2 Areng 23:10; Jer 7:30-31, 19:1-6
35 Nichi ly mychi i cho chanauchi ai Mole tameuh teng y apathyp ai nai hinnom leaunghawira y, Bala tameuh i vui maichamchi sa u. Hini kalopchi sa ai nai kai ly nichi ai pacheang y. Nichi ly Juda khumichi ai hina nai kamngo sa ai nai lam patei pi ai, nanai mana khala py kai ka-dawn awm vai y,” napi.Ref 32:35: Lev 18:21; 2 Areng 23:10; Jer 7:31
Athang khai naira pei nai leu ka-deu
36 Israela chengchi i Areng Tameuh my, “Jeremia awi, hini mary ly tavai takai, tahum takang hawi, no kanghawichi deaungkho y Babulon samrang i kiu y tym ai, nanai khumichi thui u nai ne. Kaimy leu pei bi nai ly vai tangai u.
37 Kai ly khrikhri pa-rei kado theu nai y nichi ai ahei hai nai prichira i dengdairei, kapangym ali teang ai. Naibaly nichi ai hini meingtym y kapahawi ali teang iy, chymme naimy awm hai ai.
38 Naibaly nichi ly kai i khumichi lawm iy, kai py nichi i Tameuh lawm ai.
39 Kai ly nichi ai mychi i hawi naira, mo mang i deung kangthauchi hawi naira molam y, ka-dawn harei hawi heng hai ai. Huni ka-dawn ly kai ai jei kaji naimy tahm khai u jojo ai nai ne.
40 Kai ly nichi hawi deungtasarei Leu Maikawm asa ai. Nichi ai amtheaung hai jojo ai. Nichi ly kai ai mana khala py khai su y ai nai, nichi i paleung theung y kai ai jei kaji naimy tahm khai nai paleung ka-dawn nga hai ai.
41 Nichi teng y hawi naira pei ai naini kangai khyh; hini pri y awm jojo ai nai meingtym sa pi ai.
42 “Kai ly hini ka-jeira nichi i tlang tleaung y tym hai pi nai kamta, nichi teng y kaimy adeu pi nai hawi naira bawibawichi nga hai ai.
43 Hini pri ly khumi angso hawi tawnbawichi by y nai, khutaha daichi ka-vym lawm ai, nanai py, Babulon khumichi i kiu y tym ai, nanai py, khumichi ly thui u lengleang nai ne. Na i py hini pri i li khaileaungchi ai, ka-jo ka-van sa u bi ai.
44 Khumichi ly lichi van iy ka-jo ka-van sa nai sumneang chachi ai, pany hai nai keungchi i mo y lamai nip iy pajawp typ nai ka-ma-ra nip typ ai. Nichi ly hini atitichi ai Benjamin khu hawi Jerusalem mary tengpang sahawi i avangchira py, Juda pri marychi hawi avangchira py, mawitleaung pri, mawi kheutang hawi tokalawi ngan Juda prira py, ka-jo ka-van sa u ai. Kai ly khumichi ai mychi i pri y kapahawi ali teang ai. Kai, Areng i leu pei nai ne,” napi.