31
Israela chengchi ly mychi i pri y vawi u nai
1 Areng my, “Kai ly Israela cheng bawibawichi i Tameuh lawm iy, nichi py kai i khumichi lawm u ai nai neng kani ly tym dudu bo.
2 Kai ly daichi ka-vym y deira i tleaung u nai khumichi ai kapahen pi bo. Israela khumichi ly anawn naira kadeaung u nai khala y,
3 kai ly nichi teng y kamlo mang dengdairei amteng pi nai ne. Aw Israela khumichi awi, kai ly nangchi ai kang tamen jojo nai deaungkho y, nangchi ai kai i tamen naira khaw parai nai kang patei pi bo.
4 Kai ly nangchi ai kang palum ali teang ai. Nangchi ly katyn kapauchi beu iy, amo theu naimy lam u ai.
5 Nangchi ly Samari mawichi saleung y kreip akhochi sa u teang ai i, huna nai sa nai khumichi ly huni akhochira i theu nai athaichi cha u ai.
6 ‘Jeu u, achi i Areng awm naira Zion mawi y chei u sina,’ nanai Ephraim mawichi saleung i tamcheaungchi my aeu nai neng kani ly ang tym angchi khyp ai,” napi.
7 Areng my,
Khumi cheng cheaungkhangchi theung y len keh nai
Israela chengchi i vui amo theu parai naimy khulym thui u.
‘Areng ly mymy i khumichi ai atleu nai ne.
Israela cheng theung i heng rai naichi ai atleu bo,’
nanai palo nai khulym thui u.
8 Kai ly huni khumichi ai tosyh mang dengdairei kapahawi ai.
Nichi ai khaileaung katem i nai kapahawi ai.
Nichi hawi vanrei mei kamjuchi hawi, kheu kambaichi py,
neampachy jeubomchi hawi tapen enten nai neampachychi py abang u ryp ai.
Nichi ly cheng kalenchi kamta ang vawi u ai.
9 Nichi ai kaimy kapahawi ali teang nai khala y,
kai i khumichi ly chiu sa naimy vo tangam u iy ang vawi u ai.
Kai ly nichi ai tuino leaung nai meingtymchi hawi,
nichi athei y, avah y ai nai lam kahawi mang kapahawi ai.
Kai ly Israela chengchi i ampo ne iy,
Ephraim cheng theaung ly kai i chapo chalu ne.”
10 Areng my,
“Aw khumi cheng cheaungkhangchi awi, kai i leu pei nai tangai u iy,
kai i leu ai pangli vai pri kamlochira y thai hai u.
Israela chengchi ai ahei hai nai keung kai ly nichi ai kachu ai.
Beram typ nai keung ly my i beram kanghuchi ai kry nai kamta, kai ly nichi ai kry ai.
11 Kai ly Israela chengchi ai miseaung i nai lawi hai bo.
Nichi ai atho len nai khumi chengchi kiu i nai atleu pi bo.
12 Nichi ly jeu iy Zion mawi salo y amo theu nai khulym thui u ai.
Kai i amtheaung naira kapei pi nai
choh, kreip hang, olive asitui,
beramchochi hawi si, painochi molam y amo theu u ai.
Nichi ly tui hawihai palai nga nai akhobai kamta ne iy,
mo mang y mana khala py paleung bi u ai ny y.
13 Hunaibaly chaniu anglochi ly amo theu naimy lam u ai.
Miteaung hawi thawndeangchi py, amo theu u sau ai.
Kai ly nichi ai awm hai nem ai i, nichi i vo tangam nai ly amo theu naira mang y,
nichi i paleung mawn nai ly kawn nai hawi amo theu naira mang y lawm hai ai.
14 Kai ly pathyp pi nai keungchi ai, teicha teinei kahawi hawi bym pa-rei kapacho iy,
kai i khumichi avaw nai ngierei ai angym pa-rei kapei pi ai.
Hini ly kai, Areng i thui nai leu ne,” napi.
Israela chengchi tlang tleaung y Areng i pahen nai
15 Areng my,Ref 31:15: AA 35:16-19; Mt 2:18
Ramah meingtym y raawi thai;
huni raawi ly khri pa-rei paleung si vo nai raawi ne.
Rakeli ly my i chanauchi i vui vo hai nai ne.
Nichi ly by y pawn veng bo i,
ni ly paleung awmnemra py ngai y bo,” napi.
16 Nang ly vo nai anawn iy
nangmy i mei katuichi py tamui.
Chanauchi i vui y nang i sa nai bawibawichi ly
jawm sum ai ny y.
Huni khumichi ly paleung ka-echi pri i nai ang vawi u ali teang ai,” napi.
17 Nang ly mo mang i vui athang khai naira awm;
Nang i cho chanauchi ly yhm y vawi u ali teang ai.
Hini ly kai, Areng i thui nai leu ne.
18 “Israela chengchi i paleung si naimy takeng nai ly kai thai bo.
‘Aw Areng, kaichi ly aveng nai sicho hawi atawm;
na i py nang ly kaichi ai leu tangai ai nai patiu pi nai ne.
Kaichi ai pahen ali teang kyh ba.
Kaichi ly nang teng y vawi ali teang ai nai angveirym bo.
Nang ly kaichi i Areng Tameuh ne.
19 Kaichi ly nang teng i nai hi vui teu i py,
kra y naimy nang teng y vawi ali teang ai nai ka-dawn u vau bo.
Nang i parip nai dawn pany vau nai khala
kaichi ly paleung atum naimy paleung ama u nai ne.
Kaichi ly deaungdi kala kamngo kasa u nai deaungkho y
kangji nga iy tahm anem u bo.’
20 “Israela awi, nang ly kai i ngai keh nai chapo hawi,
kai i tamen keh nai chapo py ne.
Kai ly nang i amyn kathui nai tleirei,
nang ai aawi jojo nai ne.
Kai i paleung ly nang teng y apei keh nai ne i,
kang pahen ai.
21 Ka-ma-rachi leng iy lam ma kheng;
Nangchi i theu jo nai lam hau u ali teang.
Israela khumichi awi, vawi u ali teang jau;
Nangmychi i khai u su nai mary y vawi u jau.
22 Ka-ym by y nai khumichi awi, nangchi ly mana tanrei kakra aninaw u ai rai mo?
Neampachy my neampacho ai ama hai pajau nai ly rengrang nai kamta,
kai Areng ly atiti takhra kangmeng kangtha sa nai ne,” napi.
Tameuh i khumichi mo mang y nang chawn ai nai
23 Israela chengchi i ati cheaungkhang sa thai nai keung Areng Tameuh my, “Hini khumichi ai mychi i pri y kaimy pahawi ali teang nai khala,
‘Areng ly mymy i awm nai meingtym kachai,note 31:23\xk meingtym kachai : samrang yhm hawi Achura yhm awm nai meingtym kupraw nai, Jerusalem mary theung i Zion mawi aheung thui nai ne.\x*napi nai Jerusalem mawi kachai ai amtheaung hai sy,’ nanai
nichi ly Juda pri marychira y thui u taleang bi ai.
24 Khumichi ly Juda pri meingtym tleirei y awm u ai. Li hlau sa naichi hawi beram kanghuchi ai typ nai keungchi py awm u ai.
25 Kai ly paha nai khumichi ai khesere pa-rei atho awm hai iy, kajeu alam nai deaungkho y atho bai nai khumichi ai bym pa-rei pacho ai.
26 Hunaibaly khumichi my, ‘Kaichi ly i nai bo y, khesere naimy anglaw bo,’ nanai thui u ai.
27 “Kai, Areng my, Israela pri hawi Juda pri y khumichi, tawnbawichi kawi hai nai neng kaimy tym hai ai,” napi.
28 Kai ly nichi ai akyn, panawi, taphra, paleang patlau, phra hai nai kamta, vai ly kapalum kapachai ali teang ai.
29 Huni neng tym nai khala lyRef 31:29: Ezek 18.2
‘Amhm ampochi ly kreip athai katho cha iy, cho chanauchi ly ho kyn u bo,’ nanai
thui achih nai leu ai khumichi my thui u ali ai ny y.
30 Kreip athai katho cha nai ngiereichi ly mychi kypkyp ho kyn u ai. Khumi luteng py mychi i kamngo molam y dei u ai,” napi.
31 Areng my, “Kai ly Israela khumichi, Juda khumichi hawi Leu Maikawm kangtha asa nai neng tym ai.Ref 31:31: Mt 26.28; Mk 14.24; Lk 22:20; 1 Kor 11:25; 2 Kor 3:6Ref 31:31-34: Heb 8:8-12
32 Huni Leu Maikawm ly nichi i amsi pajochi ai Aikupta pri i dengdairei patheu nai thym khala i, nichi hawi asa nai Leu Maikawm hawi atawm ai ny y. Kai ly nichi i juvo kamta ne teu i py, nichi ly kai hawi asa nai Leu Maikawm ai patawm u y.
33 Nichi hawi kai asa nai Leu Maikawm kangtha ly hini ne. Kai ly kaimy i reita leu ai nichi i paleung theung y kapakun pi ai. Kai ly nichi i Tameuh lawm iy, nichi ly kai i khumichi lawm u ai.Ref 31:33: Heb 10:16
34 Areng ai pany ai nai mary i khumichi tengtawi, pri i khumichi tengtawi apachei leungtang ai nai aly ngai y ai. Ati mana nai mo nabaly katheang keh i dengdairei kalen keh y khrairei, kai ai pany u ai; kai ly nichi i kamngo pahen pi ai. Nichi i sa tamang naichi py kaimy pany pi ali ai ny y. Hini ly kai, Areng i thui nai leu ne,” napi.Ref 31:34: Heb 10:17
35 Areng ly kanithun khala angvang ai nai kanito py,
vum y angvang ai nai lo hawi ka-sichi py ka-vo sa pi nai ne.
Mymy ly pangli ai tahawi piu iy tui sampyh amsau hai bo.
Mymy i amyn ly ati cheaungkhang sa thai nai Areng ne.
36 Mymy ly Israela pri ai kani hawi khaileaung cheaungkhang kari awm nai ryrei ly
awm jojo ai nai adeu pi bo.
37 Khumichi ly kani khusang ai saju angka pata pajau iy
khaileaung i sangum langdeng ai hau nai niu khala naini,
mymy ly Israela khumichi ai
nichi i sa nai kamngochi molam y kaimy khai su ai.
Hini ly kai, Areng i thui nai leu ne.
38 Areng my, “Mary pui verei ai Hananela angdeangra i ka-so, mary taki i katheu pa-kho khrairei, palum teang ai nai neng ly ang tym ai.
39 Khujyh patleh naira ly huni meingtym i dengdairei, nidym ngan Kareb mawi saleung khrairei tym iy, Koah mawi y taki prei ai.
40 Khumi kadei veuchi up nai hawi, anyn angso aphi nai leaunghawi verei py, nisi ngan keaungngo katheu pa-kho khrairei, Kidron micheaung ka-neang i angdym angdeang bawibawi py, kai i vui meingtym kachai lawm ai. Hini mary pui ai ly mana khala py, panawi iy taphra bi ai ny y,” napi.