33
Athang khai naira pei nai takhra leu ka-deu
1 Kai ly theaung apai theung y aeung nai thym khala y, Areng ly kai teng y leu ang pei bi nai ne.
2 Khaileaung ai sa iy meingtym karira y khai nai keung Areng ly kai teng y leu ang pei. Areng my,
3 “Kai ai palau; kang pathang pi ai. Lyh ai awm iy rengrang nai atitichi kang patei pi ai.
4 Jerusalem mary i yhmchi hawi Juda samrang i yhmchi ly katanmeuh iy tiu naira avum nai deaungkho y phra ai, nanai Israela chengchi i Tameuh kai, Areng my leu pei nai ne.
5 Babulon chengchi ai khumi phyreichi my tiu u ai. Kai ly khri pa-rei kado theu nai deaungkho y, kaimy padei ai nai khumi veuchi hawi, nichi ly hini mary y kawi hai ai. Mary i khumichi i sa tamang nai molam y, kai ly hini mary i nai meimai kahi pi vui ai.
6 Na i py kai ly mary hawi mary i khumichi ai hawi sa pi ai i, noso hawi u ali teang ai. Mary i khumichi ai tlamsa naira hawi chymme naira nga hai ai.
7 Kai ly Israela pri hawi Juda pri y nang chawn hai ai. Huni prichi ai jangni i kamta, kasa pi palai teang ai.
8 Khumichi my kai i tlang tleaung y sa tamang nai kamngochi paju pachai pi ai. Nichi i kamngochi hawi nichi i tiu naichi molam y kapahen pi ai.
9 Jerusalem mary ly kai i amo theu naira, tahm asang naira hawi amlyh naira lawm ai. Khaileaung pri i khumi cheng cheaungkhangchi ly huni mary ai kaimy peang nai hawi nairachi py, huni mary y kaimy tym hai nai nang chawn nairachi py, thai u nai khala ly kaso theu u ai,” napi.
10 Areng my, “Hini meingtym ly khutaha daichi ka-vym kamta khumi angso, tawnbawichi by y naira ne, nanai khumichi thui u lengleang nai ne. Juda marychi hawi Jerusalem mary lamchira y khumi angso, tawnbawichi savai tlang veng bo, nanai ly teng khyp nai ne. Na i py huni meingtymchira y,
11 amo theu nai raawichi hawi, apom nai pawira i amo theu nai katyn kapauchi thai u ali teang ai. Khumichi ly kawn nai katalamrachi kai i Achura yhm y syn nai tarawi y khulym thui u nai raawichi, nangchi thai u ai. Nichi my,Ref 33:11: 1 Neng 16:34; 2 Neng 5:13, 7:3; Ezara 3:11; Sam 100:5, 106:1, 107:1, 118:1, 136:1
‘Ati cheaungkhang sa thai nai Areng teng y, kawn nai leu thui u;
ati mana nai mo nabaly mymy ly hawi nai ne iy
tamen naira ly deungtasarei awm jojo nai deaungkho y ne,’ nanai thui u ai.
Kai ly hini pri ai jangni khala i kamta, nang chawn hai teang ai. Hini ly kai Areng i thui nai leu ne,” napi.
12 Ati cheaungkhang sa thai nai keung Areng my, “Khumichi hawi tawnbawichi by y iy khutaha daichi ka-vym hawi atawm nai hini pri y, beram typ nai keungchi my beramchi ai sui patlai nai meingtymchi awm teang ai.
13 Mawitleaung prichi, mawi kheutangchi hawi Juda pri tokalawi ngan mang y awm nai marychi hawi, Benjamin khu ka-peang theung y py, Jerusalem mary tengpang sahawi i avangchi hawi Juda pri marychira py, beram typ nai keungchi ly mychi i beramchi ai vuikanai kati u teang ai. Hini ly kai, Areng i thui nai leu ne,” napi.
14 Areng my, “Israela khumichi hawi Juda khumichi teng y kai i leu adeu nai kamta, tym angym hai nai neng ly tym ai.Ref 33:14-16: Jer 23:5-6
15 Huni neng kani khala ly Davida kangpreang theung i leu meitang teaung nai leaungrei vawi patyp pi ai. Ni ly pri verei y leu meitang adyh adawi ai naichi sa ai.
16 Huni neng tym nai khala y, Juda pri ly atleu naira nga ai. Jerusalem mary i khumichi py chymme naira nga ai. Mychi i mary pui ai, ‘Kaichi ai atleu nai keung Areng,’ nanai amyn palau ai.
17 Areng my Israela pri y mana khala py samrang Davida i kangpreang avaw hai by y ai nai py,Ref 33:17: 2 Sam 7:12-16; 1 Areng 2:4; 1 Neng 17:11-14
18 kai i mo y angdo naimy leng patlum nai katalamrachi, teicha teinei katalamrachi hawi tawnbawichi talam ai nai mana khala py Levi theaung pathyp pi nai keungchi avaw hai by y ai nai py kai, Areng my leu adeu bo,” napi.Ref 33:18: Kati 3:5-10
19 Areng ly kai teng y,
20 “Vum hawi kanithun ly mychi i vui neng tym baly tym thai ai nai vum i vui kaimy sa nai leu maikawm, kanithun i vui kaimy sa nai leu maikawm ly taphra pajau y.
21 Hunai kamta ly Davida i samrang kangpreang avaw by y ai nai hawi, kai i kalop sa pi nai Levi theaung i pathyp pi nai keung avaw hai by y ai nai, kai i miseaung Davida hawi asa nai Leu Maikawm ai py, taphra pajau y.
22 Kai ly kani mang i ka-si taukichi hawi pangli peang i spryhchi kamta, kati pajau y na pa-rei kai i miseaung Davida i kangpreangchi hawi kai i kalop sa nai Levi theaung pathyp pi nai keungchi i vuikanai peung hai ai,” napi.
23 Areng ly kai teng y,
24 “Kai ly kaimy i vawi takhra nai Israela yhm dengtheungchi hawi Juda yhm dengtheungchi ai khai su bo, nanai khumichi my thui u nai ly nang pany a? Nichi ly hina nai kamta kai i khumichi ai mei aniu y nai sa iy, khumi cheng harei malawn py palawn u y bo.
25 Na i py kai Areng ly vum, kanithunchi hawi leu maikawm asa iy, kani hawi khaileaung ai kryme ai nai reita leaungsai sa pi bo.
26 Huna nai kai i kateng sa nai kamta, Jakob i kangpreangchi hawi py, kai i miseaung Davida hawi py, asa nai Leu Maikawm khaw hai jo ai. Kai ly Abraham, Isaka hawi Jakobchi i kangpreangchi ai peang ai nai, Davida kangpreang theung i leaungrei ai vawi takhra ai. Kai i khumichi ai nang chawn hai teang ai. Kai ly nichi i tlang tleaung y kapahen ai,” napi.