30
Mymy i khumichi teng y Areng i leu adeu naichi
1 Hini ly Jeremia teng y Areng my leu pei nai ne.
2 Israela chengchi i Areng Tameuh my, “Nang teng y kai my kang thui pi nai leuchi ly cha-iu theung y tajiu typ ba.
3 Ati mana nai mo nabaly kai i khumi Israela chengchi hawi Juda chengchi ai, kaimy palum teang ai nai neng tym ai nai deaungkho y ne. Kai ly nichi ai, mychi i amsi pajochi teng y pei nai pri y pahawi ali teang ai i, nichi ly huni pri amtym u ali teang ai. Hini ly kai, Areng i thui nai leu ne,” napi.
4 Israela khumichi hawi Juda khumichi teng y, Areng my hina nai kamta leu pei nai ne.
5 Areng my, “Kai ly jei naimy aeu nai raawi thai;
huni raawi ly tlamsa nai raawi ny y; jei iy aeu nai raawi ne.
6 Adeng ahui iy adawn pasym u!
Neampacho ly deaungdi tapen thai a?
Huna lawh teu baly, neampacho nai iy deaungdi tapen nai kamtang avum nai neampachy kamta,
ati mana nai y mychi i kajeu y kiu hawi panem nai kaniu lawh mo?
Khumi luteng ly ati mana nai y, meimai kadaupa lawh mo?
7 Ka-jei awm nai neng kani ly ang tym dudu bo;
takhra mani kani py, huni kani hawi ly pata pajau y.
Huni kani ly Jakob cheng ngari kamtang avum ai nai kani ne.
Na i py nichi ly dei y naimy heng u ai,” napi.
8 Ati cheaungkhang sa thai nai keung Areng my, “Huni neng kani tym nai khala y kai ly huni khumichi i kaneaungra i tamtleang khei vui iy, nichi ai kawm nai tamo vuinawnchi su pi vui ai. Nichi ly pri takhrachi teng y miseaung achei ai ny y.
9 Ti y naimy nangmychi i Tameuh kai, Areng i kalop ai py, nichi i samrang y kaimy khai nai samrang Davida i kangpreangchi i kalop ai py, sa u ai nai tla ai.
10 “Kai i khumichi awi, jei u moh;Ref 30:10-11: Jer 46:27-28
Israela khumichi awi, jei nai kaso theu u moh.
Langheng y hawi iy nangchi awm u nai pri,
huni pri kamlo dengdairei, nangchi ai kaimy atleu ai.
Nangchi ly vawi teang iy tlamsa naimy awm u ai.
Ami my py nichi ai pajei ai nai nga ai ny y.
11 Kai ly nangchi ai atleu ai nai kang jeu ai.
Kaimy nangchi ai ahei hai nai
prichi ai ly kaimy taphra ai.
Na i py nangchi ai ly kang taphra ai ny y.
Kai ly nangchi ai pajeng y naimy khai ai ny y;
na i py pajeng nai khala ly hawi khypchy my kang pajeng ai.
Hini ly kai, Areng i thui nai leu ne,” napi.
12 Areng ly mymy i khumichi teng y,
“Nangchi i tamo kalemchi ly tha pajau ai ny y.
Nangchi i no angvawichi ly hawi sa i py, hawi pajau y ai.
13 Nangchi ai kry ai nai khumi leaungrei py by y.
Nangchi i tamo kalem vui py asi by y nai daeungkho y, nangchi ly
nangmychi i no-na hawi ai nai molam y athang khai naira by y leang bo.
14 Nangchi ai tamen nai khumichi ly
nangchi ai tami pawn veng bo.
Nichi ly nangchi ai dawndan u y leang bo.
Nangchi i kamngochi ly nawi parai iy, nangchi i hawi y ala nai deaungkho y,
kai ly nangchi ai paleung ka-e kamta no nga hai bo.
Nangchi i pajeng naira avum nai ly khri pa-rei ty na bo.
15 Nangchi ly nangmychi i tamo tha thai y nai molam y,
tangam u reng moh jau.
Nangchi i kamngo ly nawi parai iy,
nangchi ly khri pa-rei hawi y ala nai deaungkho y,
kai ly nangchi ai, hina nai kamta kang pajeng nai ne.
16 Vai ly nangchi ai ang pajawn nai khumi bawibawichi ly pajawn naira avum u iy,
nangchi i paleung ka-e bawibawichi ai py, langheng y hawi u vui ai.
Nangchi ai pahyp y naimy ana nai khumi bawibawichi ly mychi naimy pahyp y naimy ana naira avum u iy,
nangchi ai tiu nai khumi bawibawichi py, tiu naira avum u ai.
17 Nangchi i paleung ka-echi my,
‘Zion mary ai ly nyn va veng bo.
Huni mary ai ami py dawndan y leang bo, nanai thui u i py,
kai ly nangchi ai hawi hai ali teang ai.
Nangchi i tamo kalemchi tha hai ai.
Hini ly kai Areng i thui nai leu ne,” napi.
18 Areng my,
“Kai ly kaimy i khumichi ai nang chawn hai teang iy,
kapahawi ali teang ai.
Jerusalem mary ai palum teang iy
samrang yhm py palum teang ai.
19 Huni meingtym y awm nai khumichi ly palo nai khulym thui u iy,
nichi ly amo theu naimy aeu u ai.
Kai ly nichi ai khumi peung hai ai i,
tahm kapasang ai.
20 Kai ly hini pri ai jangni i sa thai naira kapei ali teang iy,
hini sa thai naira ai py khaw hai jojo ai.
Nichi ai ana nai khumi bawibawichi ai kapajeng ai.
21-22 Nichi ai peang ai nai khumi ly mychi theung i nai theu ai.
Nichi i samrang py mychi theung i nai theu ai.
Kaimy palau nai khala, huni khumichi ly kai teng y ang jeu tapai ai.
Kaimy palau y naimy, ami nai ly kai teng y jeu vam ai mo?
Nichi ly kai i khumichi lawm u iy,
kai py nichi i Tameuh lawm ai.
Hini ly kai Areng i thui nai leu ne,” napi.
23-24 Mymy i kado theu nai ly khumi kamngochi i lu y aho nai ali kamchai hawi atawm. Huni kado theu naira ly mymy i sa ai tau nai ngiereichi so angym pajau y ryrei ly rym ai ny y. Hinichi ai mymy i khumichi ly mo mang i neng kani y, chaipyn naimy pany u ai.