3
Ka-ym by y nai Israela
1 Areng my, “Khumi leaungrei ly my i aju ai akhai vui nai khala y, huni neampachy ly ni teng i nai theu iy, takhra neampacho leaungrei hawi yhmtheaung sa bo. Huna nai khala y angchei i juvo ly my i aju kangngym ai lo ali teang ngau y. La ali teang lawh teu baly, huni pri ly khri pa-rei amso ngai naira lawm ai. Na i py Israela awi, nang ly tavawi neangneang khawn iy, vai kai teng y ali teang ai nai ngai lawh ly!
2 Mawi saleungchi ai khen angdeang u. Bima kamta nang so vai y naichi awm a? Arab cheng ly daichi ka-vym y lawm ai nai amo yb nai kamta, nang ly lam tengchira y tavawichi ai ajeng bo. Nang ly nangmy i hawi y nai kamleaung kalop hawi, hini pri y chai hai y nai ne.
3 Kai ly hini molam y khuma kani heng hai iy, kangkhym kani py nai hai y nai ne. Nang ly bima kamta amlawn iy, nang ly jei kaji nai py by y bo.
4 “Vai, nang ly kai teng y, ‘Nang ly kai i ampo ne; deaungdichy khala i ka-so kai ai tamen nai ne.
5 Nang ly kado theu hai jojo y leang. Kai i tlang tleaung y deungrei kado theu hai ai ny y,’ nanai thui bo. Aw Israela, nang ly hina nai thui teu i py, amy sa thai nai ryrei hawi y naichi sa bo,” napi.
Israela hawi Juda uikheih ai aly ngai nai
6 Samrang Josia deung y Areng my kai ai, “Huni leu atangai y nai neampachy Israela ly kai ai ati mana khai su mo, nanai nang niu bo a? Ni ly mawi ka-sang tleirei y py, apu parai nai dengkeaung tleirei anui y py, bima kalop sa nai ne.Ref 3:6: 2 Areng 22:1—23:30; 2 Neng 34:1—35:27
7 Huna nai sa chum nai bo y ni ly kai teng y ali ai ngaw khyh, nanai kadawn bo. Na i py ni ly ali teang y. Huna nai ali teang y nai ai ni i tuicho ka-ym by y nai Juda ly niu nai ne.
8 Israela ly kai ai khai su iy bima kalop sa nai deaungkho y, kaimy khai vui i, kapatheu praw bo. Na i py Israela i tuicho ka-ym by y nai tuicho ly jei y i, mymy naimy bima kalop sa iy,
9 Israela i hawi y nai ly mymy hawi abi abang y nai kamta, mychi i pri y chai hai y bo. Ni ly lengseaungchi, dengkeaung keungchi ai chiu iy tamang bo.
10 Hina nai kalopchi sa chum baly Israela i tuicho ka-ym by y nai Juda ly kai teng y ali teang bo. Paleung pipi apei y, ngai ka-awi sa iy jeu nai ne. Hini ly kai, Areng i thui nai leu ne,” napi.
11 Naibaly Areng my kai teng y, “Israela ly kai teng i nai meimai hi vui teu i py, ka-ym by y nai Juda tanrei hawi y nai ny y,” napi.
12 Mymy ly kai ai tosyh ngan mang y pato iy Israela teng y, “Ka-ym by y nai Israela awi, kai teng y ali teang jau. Kai ly pahen nai keung ne nai deaungkho y, nang ai kado kang theu hai ai ny y. Kai ly deungtasarei kado kang theu hai ai ny y.
13 Nang ly nangmy i Areng Tameuh ai tiu lawh nai hawi, kamngo tla bo, nanai phai ahui. Apu parai nai dengkeaung tleirei anui y, nang ly cheng takhrachi i tameuhchi ai paleung apei lawh iy, kai i leu tangai y lawh, nanai py ahui ai nai tla. Hini ly kai, Areng i thui nai leu ne.
14 “Ka-ym by y nai khumichi awi, jeu u ali teang jau; kai ly nang i juvo ne. Nangchi ai mary harei y leaungrei, nupai harei y leaung nyhrei vawi takhra iy, Zion mawi mang y kang pahawi ali teang ai.
15 Kai i leu tangai nai beram typ keungchi ai, nangchi teng y kang pei ai. Nichi ly nangchi ai cheng naira hawi, pany thai naira hawimy peang u ai.
16 Naibaly nangchi ly huni pri y khumi neangneang peung nai khala y, khumichi ly kai i Leu Maikawm Pawm satang, thui u, dawn u, pany u ai ny y. Huni Leu Maikawm Pawm ai aly ngai u ai ny y. Pawm takhra ly sa u ai ny y.
17 Huni neng tym nai khala y, Jerusalem mary ly ‘Areng i areng atehra,’ nanai palau ai. Khumi cheng cheaungkhangchi py, huni mary y akachu u iy kai i amyn tahm pasang u ai. Nichi ly mychi i hawi y nai paleung katang kangai mang y sa u ai ny y.
18 Israela ly Juda hawi amkawm iy khumichi hawi vanrei, nangchi i amsi pajochi teng y kaimy pei nai pri y, tosyh mang dengdairei ang jeu u ai,” nanai thui hai bo.
Tameuh i khumichi myn chiu u nai
19 Areng my leu pei nai ly
“Israela awi, kaimy chapo kang palawn iy
amo theu ai hawi nai pri,
khaileaung pri verei y apu keh nai pri kang pei ai nai ngai.
Nang ly kai ai ampo palau iy mana khala py,
kai ai nithun thun vui y ai nai, kai ly aly ngai.
20 Na i py aw Israela, nang ly ka-ym by y nai aju kamta,
kai i leu tangai y lawh bo.
Hini ly kai Areng i thui nai leu ne.”
21 Mawi aheungchi salo y raawi thai nai ne.
Huni raawi ly Israela mipuichi i kamngo theung y anum naimy
mymychi i Areng Tameuh ai tami u veng nai deaungkho y,
vo tangam nai tarawi y hnei takeng u nai raawi ne.
22 Ka-ym by y nai khumi bawibawichi awi, jeu u ali teang jau;
Areng ly nangchi i sa tamang naichi pahen pi ai.
Nangchi my, “Ne, nang ly kaichi i Areng Tameuh ne nai deaungkho y, kaichi ly nang teng y kang jeu u ai.
23 Mawi saleungchira chiu sa nai molam y, kaichi kasabawmra ngo u y. Israela chengchi i vui sabawm naira ly kaichi i Areng Tameuh teng i naini nga pajau khyh.
24 Na i py kaichi ly deaungdichy khala i ka-so, kangji hawi nai tameuhchi ai kachiu u nai deaungkho y, jangni khala i dengdairei amsi pajochi my lop-panra i beram kanghuchi, si kanghuchi, cho chanau hawi awm nai bawibawichi chau pawn nai ne.
25 kaichi ly kangjira y jawn tlawntlai nai y, tahm anem ai nai avo. Kaichi ly deaungdichy khala i ka-so vaini khrairei, kaichi hawi amsi pajochi ly achi i Areng Tameuh i tlang tleaung y kamngo kasa u. Mymy i leu py tangai u y bo,” napi.