2
Areng my Israela chengchi ai kry nai
1 Areng ly kai teng y,
2 “Nang ly Jerusalem mary y chei iy, huni mary y awm nai
khumi bawibawichi teng y hini satang thui pi,”
Nangchi ly deaungdi khala y, ati mana ka-ym awm u mo, nanai kai pany.
Nang ly deaung vawi nai anglo kamta kai ai khrei bo.
Nangchi ly ati sai py pati y nai daichi ka-vym jeungrei tako prei iy, kai i nithun abang u nai ne.
3 Aw Israela chengchi awi, nangchi ai kaimy kang peang khyh nai ne.
Nangchi ly kaimy peang nai vang teng naichi ne.
Kai ly nangchi i tlang tleaung y no patang hai nai khumi bawibawichi ai
ka-jeira hawi ngari kamtang tym hai bo.
Hini ly kai Areng i thui nai leu ne.”
Israela chengchi i amsi pajochi sa tamang nai kamngo
4 Nangchi Jakob i kangpreang Israela nupaichi awi, Areng i leu pei nai tangai u.
5 Areng my leu pei nai ly
“Kai teng y ati kamngo niu nai y,
nangchi i amsi pajochi ly kai teng i nai theu u nai a?
Nichi ly vang teng y nai mynchi chiu u iy,
mychi kypkyp py vang teng u y bo.
6 Kai ly nichi ai Aikupta pri i nai atleu iy,
daichi ka-vym jeungrei, khutaha daichi ka-vym,
khaileaung angawmchi kawi mang nanai pri,
jengha iy ka-jeira nawi nai pri,
khumi angso savai tlang naimy
khuleaung chei nai khumi by y nai pri y tako prei i,
lam kapahawi pi teu i py, nichi ly kai ai dawndan u y.
7 Kai ly nichi ai paitiu khuta hawi nai pri y amti amjang hawi,
takhra teicha teinei kahawichi cha nei ai nai kapahawi bo.
Na i py nichi ly kai i pri taphra u.
Nichi teng y kaimy pei nai pri ai chai hai y nai ne.
8 Pathyp pi nai keungchi my, ‘Areng ly ma mang y awm mo?’ nanai deng u.
Kai i pathyp pi nai keungchi ly kai ai pany u y.
Peang nai keungchi ly kai ai tiu u bo.
Amochi ly Bala tameuh i amyn y tau iy,
vang teng y nai mynchi teng y chiu u nai ne.
Areng ly mymy i khumichi ai chih nai sai
9 “Hunai deaungkho y kai ly nangchi ai tara kang chih bi ai.
Nangchi i katu chanauchi ai py tara pasau ai,” nanai Areng my leu pei bo.
10 Khitem tlawn awm nai nidym mang y chei;
Kidar pri mang y khumi pato iy khen hai ba.
Hina naichi mana khala py tym vai y nai ly niu u ai.
11 Mymychi i tameuhchi ly tameuh tatang ny y teu i py,
mani cheng ly tameuhchi ai chiu takhra vui mo?
Na i py kai i khumichi ly mychi ai
tahm awm hai nai Tameuh, napi nai kai ai ly
nichi ai sabawm thai y nai tameuhchi hawi katheung u veng bo.
12 Hunai deaungkho y kai Areng my kani khusang ai ly
jei hyn iy lyh ai awm nai pa-rei lawm ai nai leu kapei nai ne.
13 Kai i khumichi ly
heng nai tuino, napi nai
kai ai khai su iy tui atang y nai
akosyn nai tui kadengra tuikanchi sa u iy,
kamngo amjy nyhrei sa tamang u bo.
Israela i ka-ym by y nai athaichi
14 “Israela ly miseaung ny y.
Miseaungcho py ny y.
Na i py paleung ka-echi ly ni ai patiu u lawh mo?
15 Paleung ka-echi ly ni ai khrangsi kamta hang hai bo.
Ni i pri y jeng hai rawm bo.
Ni i mary ly phra seaungkhrang iy, khumi angso savai na bo.
16 Memphi mary i khumichi hawi Tapan mary i khumichi ly
nang i lu keuru ai khei u bo.
17 Aw Israela, hini kalop ly nang i sa nai kalop ne na a!
Kai ly nang ai lam patei iy kang pahawi nai thym khala y,
kai, Areng ai khai u su bo.
18 Vai, nang ly Naing tavo tui nei ai nai Aikupta pri y chei nai ly
kamran awm ai, nanai athang khai a?
Euphrat tavo tui nei ai nai Asuria pri y chei nai ly
kamran awm ai, nanai athang khai a?
19 Nang i hawi y sa naimy ly nang ai ang pajeng ai.
Nang i sa tamang naimy ly nang i kamngolai tara chih ai.
Nangmy i Areng Tameuh ai khai su nai,
kai ai jei kaji y naimy awm nai,
hunichi ly ati mana tanrei hawi y na mo, nanai nang pany ai.
Hini ly ati cheaungkhang sa thai nai keung, kai, Areng my thui nai leu ne,” napi.
Areng ai chiu ai nai Israela i akhi nai
20 Ati cheaungkhang sa thai nai Areng my,
“Aw Israela, nang ly jangni i ka-so kai i sa thai naira ai khai su iy,
nang ly kai i leu tangai y, kai ai py chiu y.
Mawi ka-sang tleirei y py,
apu parai nai dengkeaung tleirei anui y py,
bima kamta sa u lawh bo.
21 Kai ly lym patyp nai ti ra i
kreip keung kaui nai ne.
Na i py nang ati mana lawm mo, nanai khen cham!
Nang ly veaung iy teaung ai ngo y nai kreip keung hawi atawm nai ne.
22 Nangchi ly saibeung hawi tlu nai asi neangneang teaung u teu i py,
nangchi i kamngo ly kai i mo y amny jo ai.
23 Nangchi ly Bala tameuh ai mana khala py chiu vai y.
kaimychi ai amso ngai hai y, nanai ati mana thui pajau ai mo?
Nangchi ly leaunghawi theung y ati mana kamngo sa u mo, nanai khen cham.
Nangmy i sa nai kalop pany ba.
Nang ly po ngai nai kula-iu tanglo kamta,
awm py thai y na pa-rei angpreng nai ne.
24 Nang ly daichi ka-vym theung y awm nai keaungngo kano kasau karamnu hawi atawm.
Po ahui nai neng khala y, ni ai ami my kam pajau ai mo?
Ni ai aly ngai nai keaungngo kano kasau katai ngiereichi ly akawm parai naimy hau ai nai aly ngai y.
Po ahui nai neng khala y, ni ai niu jojo pajau nai ne.
25 Aw Israela, tameuh takhrachi mang y abang lawh nai deaungkho y,
nang i kheura i phainai asu vui moh sy.
Nang i dangkang ai py phuiha hai moh sy.
Na i py nangmy, ‘Kai ly cheng takhra khumichi i
tameuhchi ai khrei iy
nichi nithun mang y abang ai,’ nanai thui bo.
Israela ly pajeng ai ataing nai
26 Areng my, “Patiu naira avum nai neng khala y kangviu khumi ly kangji nga nai kamta, nang i samrangchi, samrang i cho chanauchi, pathyp pi nai keungchi, amochi, nangchi Israela cheng mipui bawibawichi ly kangji nga u ai.
27 Dengkeaung keung teng y, ‘Nang ly kai i ampo ne,’ nanai py, lengseaung teng y, ‘Nang ly kai i amhm ne,’ nanai py nangchi thui u bo. Nangchi ly kai mang y amhi y, kai ai nithun thun u. Na i py nangchi ly ka-jeira avum nai khala y, kaichi ai sabawm ai nai jeu kyh ba, nanai kai teng y hnei u bo.
28 “Nangmychi i vui nangchi sa nai tameuhchi ly ma mang y mo? Nangchi patang naira tym nai khala y, huni tameuhchi my atleu pajau lawh baly atleu pi na sy. Aw Juda pri, nang i marychi nawi nai kamta, nang i sa nai tameuhchi khri pa-rei nawi parai na ly!
29 Nangchi bawibawi my py kai ai tiu u nai a? Nangchi ly kai ai ati mana nai y paleung angai u y na mo? " nanai Areng my leu pei bo.
30 Kai ly nangchi ai kang parip i py, kamran by y. Nangchi ly thui rip nai ai ngai u y. Khri pa-rei kado theu nai khrangsi kamta, nangchi ly nangmychi i amochi ai padei u bo.
31 Israela mipuichi awi, nangchi ly kai i thui nai leu tangai u. Kai ly nangchi i vui daichi ka-vym kamta py, kaveng my khiu nai pri kamta py lawm veng bo a? Ti y lawh baly nangchi ly ati mana nai y nangmychi ngai ngai sa naimy, kai teng y mana khala py ali teang y leang bo, nanai thui u lawh mo?
32 Anglo ly mymy i amia lengseaungchi ai py, deaung vawi nai anglo ly mymy i apom nai ateaungchi ai py, tami vui thai na a? Na i py kai i khumichi ly kati pajau y nai neng kanichi neng khala, kai ai tami u veng bo.
33 Nangchi ly nangmychi i khrei nai khumichi ai hau u takengkei reng. Hawi y nai neampachychi ai malawn py, nangmychi i hawi y nai sai patiu pi nai ne.
34 Yhm ateng vau iy paviu nai molam y nangchi my patiu ai nai ngo y i py, huni khumi kamawnchi, kamngo by y nai khumichi i thi hawi, nangchi i ateaungchira y abawi hai u nai ne.
35 “Na i py, ‘Kai teng y kamngo by y, Areng ly meitang khyp, kai i tlang tleaung y kado theu hai y leang bo,’ nanai thui ai nai ngai. Na i py nang ly nangmy teng y kamngo by y, nanai akhi nai deaungkho y kai ly nang ai kamngo pajeng ai.
36 Nangchi ly pri takhra tameuhchi ai ahihawi nai molam y, amymy ai tahm anem hai nai Asuria pri ly nang ai sabawm y nai kamta, Aikupta pri my py sabawm y ai.
37 Nang ly kangji nga naimy kaneaung akhei ngawm iy, Aikupta pri i dengdairei vawi ali teang ai. Kai Areng ly nang i paleung pado nai khumichi ai khai su bo. Nichi teng i nai nang ly ati kamran py nga ai ny y.”