JEREMIA
I AMO LEU
Jeremia i amo leu ly hina nai phy patleh pajau nai ne. (1) Jeremia ai vawi takhra nai; (2) Josia, Jehojakim, Jehojakhin hawi Zedekiah samrangchi my peang nai thym khala, Juda pri hawi peang nai keungchi i vui y Tameuh my leu pei nai; (3) Jeremia heng nai deung y amo leu takhra takhrachi hawi, aly len nai leaungsaichi abawi nai Jeremia i secretary Baru i pany jo ai hawi nai cha-iu theung y abawi nai saichi; (4) Areng teng i dengdairei pri takhrachi i vui leu pei nai; (5) Jerusalem mary phra ai nai satang hawi, Babulon pri y pri pala naira avum ai nai satang tabawi nai deung kamtawm satang py abawi nai ne.
Jeremia ly paleung phra rai y nai khumi ne. Ni ly mymy i khumichi ai khri pa-rei tamen iy, nichi i tlang tleaung y tara chih ai nai sai thai hai ai nai ngai y nai khumi ne. Tameuh ly ni ai amo palawn iy palau nai deaungkho y, paleung ngari avum nai ka-dawnchi molam y, paleung hawi y parai naimy thui naichi, hini cha-iu theung y abawi nai ne. Areng i leu ly ni i paleung theung y mai kamta bi na i, hunichi ai am-yh pajau y nai ne.
Hini cha-iu theung y ly Jeremia i khri pa-rei patang nai neng katlen iy, Leu Maikawm Kangtha nga ai nai neng thui pi nai leuchi abawi nai ne. Huni Leu Maikawm Kangtha ai patawm ai nai molam, Tameuh i khumichi teng y pany hai pi ai nai aly ngai y. Ati mana nai mo nabaly huni Leu Maikawm Kangtha ly nichi i paleung theung y tajiu pi kheng ai nai deaungkho y ne (31: 31-35).
1
Jeremia
1 Hini cha-iu theung y Jeremia i thui nai leuchi abawi nai ne. Ni ly Benjamin khu, Anatho mary y awm nai pathyp pi nai keung Hilkiah i chapo ne.
2 Josia i chapo Ammon ly Juda samrang y lyn nai saneng holai thomrei khala y, Areng ly Jeremia teng y leu pei nai ne. Ref 1.2: 2 Areng 22:3—23:27; 2 Neng 34:8—35:19
3 Areng ly Josia i chapo samrang Jehojakim deung y py, ni teng y leu pei bi bo. Naibaly mymy ly Josia i chapo Zedekiah samrang y lyn nai saneng holai ha, pa-ngo lo khala y, Jerusalem mary i khumichi pri pala nai neng tym pa-rei, ni teng y tlen neangneang leu pei nai ne. Ref 1.3: 2 Areng 23:36—24:7, 18—25:21; 2 Neng 36:5-8, 11:21
Jeremia ai palau nai
4 Areng my,
5 “Kai ly nang ai hengra kang pei y rai khala my vawi takhra veng bo. Nang ai tapen y rai khala my khai takhra iy khumi cheng cheaungkhangchi i amo lawm ai nai kang khai bo,” nanai kai teng y leu pei.
6 Naibaly kaimy, “Aw Areng, kai ly saneng theang ala nai deaungkho y, ati mana katheu ai mo, nanai pany y,” napi.
7 Na i py Areng my, “Nang ly saneng theang ala, nanai thui moh. Kaimy pato nai khumichi teng y nang chei iy, kai i leu pei nai ngiereichi amti pi.
8 Kai ly nang hawi vanrei awm iy, nang ai asa hai ai. Hunai deaungkho y nang ly nichi ai jei moh; hini ly kai, Areng i thui nai leu ne! " nanai kai teng y leu ang pei bo.
9 Naibaly Areng ly mymy i kiu jaha iy, kai i labeaung y ang teaung chum baly, “Tangai ba, nang i thui ai nai leu, vaimy nang ai kang pei ryp bo.
10 Khumi cheng cheaungkhangchi hawi pri cheaungkhangchi ai theih vui, panawi vui, taphra vui, nui phro vui, palum teang, ui teang thai nai sa thai naira, vaini nang ai kang pei bo,” napi.
Paleung mei y niu nai amjy nyhrei
11 Areng my, “Jeremia awi, nang ly ati niu mo? " nanai deng baly
kaimy, “Baden keung changpi kaniu,”napi.
12 Huna nai khala y Areng my, “Nang i thui nai teng mang. Kai py kaimy i leu teng, nanai ajeng nai ne,” napi.
13 Naibaly Areng ly kai ai leu ang pei bi bo. Mymy ly “Nang ly ati takhra niu bi rai mo? " nanai angdeang.
Kaimy, “Tosyh mang y tuibi kado nai laawm kaniu; huni laawm ly tokalawi mang y cheaungkai i, aliu vi nai kamta awm,” nanai kapathang.
14 Mymy ly kai teng y, “Hini pri y awm nai khumi bawibawichi tlang tleaung y tosyh mang dengdairei, patang naira tym ai.
15 Kai ly tosyh mang i khumi cheng cheaungkhangchi ai kapalau bo,” nanai Areng my leu pei nai ne. Nichi i samrangchi ly jeu iy, mychi i samrang atehra ai Jerusalem mary ka-ki hawi, mary apai katheu pa-khochi sahawi y py, Juda marychi tengpang sahawi y py, khai u ai.
16 Hina nai kamta kai ly kamngo sa tamang nai khumichi, kai ai khai su nai khumichi, tameuh takhrachi teng y mui katuichi leng patlum nai khumichi hawi, mychi i sa nai mynchi ai chiu nai khumichi ai ly kapajeng ai.
17 Nang ly vam parai naimy chei iy, huni khumichi teng y kai i thui pi nai ngiereichi thui pi. Nichi ai jei moh; nang ly nichi ai jei lawh teu baly, kai ly nang ai nichi i mo y jei hai ra ai.
18-19 Jeremia awi, tangai ba! Hini pri y awm nai khumi bawibawichi napi nai Juda samrangchi, samrang i bangtangchi, pathyp pi nai keungchi hawi, mipuichi ly nang ai ang tiu u ai. Na i py nichi ai amtang pajau ai nai pa-rei, nang ai vaini kang sa pi ai. Nang ly amtangra mary kamta py, tamo yhmmawm hawi kheupaja angpang kamta py lawm ai. Kai ly nang hawi vanrei awm ai i, nang ai ama hai ai. Hunai deaungkho y nichi ly nang ai ang tiu pajau ai ny y. Hini ly kai Areng i thui nai leu ne, napi.