66
Areng my khumi cheng cheaungkhangchi ai tara chih nai
1 Areng my, “Kani pri ly kai areng atehra ne i, khaileaung ly kai i kheu chiura ne. Hunai deaungkho y nangchi ly kai i vui ati mana nai Achura yhm, kai awm ai nai vui ati mana nai meingtym sa u ai mo?Ref 66:1: Mt 5:34, 35, 23:22Ref 66:1-2a: Ataw 7:49-50
2 Kai ly khusang deaungdu verei sa nai ne. Paleung apanem iy uikheih naichi hawi, kai ai jei hyn naimy kai i leu tangai nai khumichi ai kai ly khrei nai ne.
3 “Khumichi ly mychi i kangai sa u reng nai ne. Mychi i vui si tleh iy apathyp nai ly khumi ai padei iy apathyp nai hawi atawm. Beram pathyp nai hawi ui pathyp nai py vanrei ne. Amti amjang talam nai ly eu thi talam nai hawi atawm. Mui katui leng patlum iy talam nai ly myn ai chiu nai hawi atawm teang. Nichi ly amso ngai ai hawi chiu sa naichira y amo theu u lawh nai ne.
4 Hunai deaungkho y kai ly nichi jei u nai ka-jeirachi py, nichi i tlang tleaung y tym hai bo. Hunai kamta tym hai nai ly kaimy palau nai khala y, ami py pathang u y. Kaimy thui nai khala py ami py pathang u y nai deaungkho y ne. Nichi ly kai i leu tangai y, hawi y sa ai naini vawi takhra u lawh,” napi.
5 Mymy ai jei kaji naimy leu tangai nai khumichi awi, nangchi ly Areng i leu pei nai tangai u. Nangchi ly kai i tlang tleaung y ka-ym awm u nai deaungkho y, nangchi i cheng phyreichi ly nangchi ai niu ngai y iy ang paleang u parutu nai ne. Nichi ly nangchi ai panui hai iy, “Kaichi ly nangchi amo theu nai kaniu u ai nai ngai. Hunai deaungkho y Areng ly sa thai naira nang parai nai patei iy atleu pi na sy,” napi u. Na i py huni khumichi ly kangji kangai nga u ai!
6 Tangai u! mary theung y kadosum nanai katyn, Achura yhm theung i katyn ly Areng my paleung ka-echi ai pajeng nai katyn ne na a!
7 “Kai i chai parai nai mary pui ly deaungdi tapen ai nai kajeu nodei y naimy, tapen praw ryp nai amhm hawi atawm.Ref 66:7: Amt 12:5
8 Hina nai ka-tawm niu vai, thai vai nai ly ami awm mo? Pri harei ly kanirei y my amthawn nai awm vai a? Zion mary ly Israela pri tapen y rai khala, patang nai kakra avum ai ny y.
9 Kai ly tapen ai nai neng tym iy tapen ai nai ngo y nai deaungdi kamta lawm hai ai, nanai nangchi dawn u moh,” napi. Hini ly Areng i thui nai leu ne.
10 Jerusalem mary ai paleung apei nai khumichi awi, ni hawi vanrei amo theu u;
ni i vui amo theu u!
Huni mary i vui paleung si vo tangam nai khumi bawibawichi awi,
vaimy ni hawi vanrei amo theu u!
11 Nangchi ly amhm i paleung tleaung y awm nai deaungdicho kamta,
paleung anyp naimy Jerusalem mary i nang chawn naira amtym u ai.
12 Areng my, “Kai ly nangchi ai nang chawn jojo ai nai kang pei ai. Khumi cheng cheaungkhangchi i yhmtheaung katuichi ly mana khala py kang vai y nai tavo tui kamta, nangchi teng y ang leaung ai. Nangchi ly amhm my tamen parai nai y tapawm naimy kanu panei nai deaungdi hawi atawm ai.
13 Amhm my chanau ai paleung awm hai nem nai kamta, kai ly nangchi ai Jerusalem mary y paleung awm hai nem ai.
14 Hina naichi niu nai khala y nangchi ly amo theu u iy, tlang atho awm ai. Naibaly Areng ly mymy i leu tangai nai khumichi ai sabawm iy, paleung ka-echi ai ly kado theu naira tym hai bo, nanai nangchi pany u ai,” napi.
15 Areng ly mai kangveaung atang iy ang jeu ai. Mymy ly my i kado theu hai nai khumichi ai pajeng ai nai, ali lengli atang iy ang jeu ai.
16 Mymy ly kamngo awm nai khumichi ai mai hawi mo, haisau hawi mo, pajeng ai. Huni khumichi ly dei u bebe ai.
17 Areng my, “Mynchi chiu ai nai hawi akho theung i na-yhmchi mang y chei ai nai molam y, amymychi ai apachai u nai khumichi, eu mawi, paju mawi hawi amso ngai ai hawi nai teicha teineichi cha nai khumichi i vui ly myh kang ai nai neng ly kasa bo.
18 Nichi i sa nai, dawn naichi kai pany. Kai ly pri tlei tleireichira i khumichi ai kachu ai nai kang jeu ai. Nichi ly akachu u nai khala y kai i sa thai naira mana tanrei ham na mo, nanai niu u ai. Mymychi ai pajeng nai keung ly kai naini ne, nanai py pany u ai. Na i py kai ly phyreichi ai tlamsa naira pei ai. Kai ly nichi ai kai i satang thai vai y, kai i sa thai naira len parai nai niu vai y nai
19 pri kamlochi, napi nai Tashu pri, Libia pri hawi thailiho kawp keh nai khumichi awm nai Luda pri y py, Tubal pri hawi Krik pri y py, kaimy pato ai. Nichi ly huni pri i khumichi teng y, kai i sa thai naira nang parai nai satang thui ai.
20 Nichi ly khumi cheng cheaungkhangchi teng i nai nangchi i chengchi ai Areng i vui langseaung kamta, hawi ali teang ai. Israela chengchi ly thengthai khulawnchi ai reita kamta,laawm kachaichira y khai iy Achura yhm mang y syn u nai kamta huni khumichi ly huni langseaungchi ai keaungngo, keaungngo kano kasau, Kula-iuchi, keaungngo ka-ri hawi si ka-richi tleaung y tang iy, Jerusalem mary i chai parai nai mawi salo y syn u ai.
21 Kai ly hunichi theung i phyreichi ai pathyp pi nai keungchi hawi, Levi khumichi palawn iy khai takhra ai.”
22 “Khaileaung kangtha hawi kani kangthachi ly kai i sa thai nai saho y khaw jo nai kamta, nangchi i amyn hawi kangpreangchi ly khaw u jojo ai.Ref 66:22: Is 65:17; 2 Pet 3:13; Amt 21:1
23 “Losi pawi kanichi hawi anawn kani tym nai tleirei, khumi cheng cheaungkhangchi ly Jerusalem mary y jeu iy, kai ai chiu u ai,” nanai Areng my leu pei bo.
24 Huni khumichi ly mychi i pri y vawi u teang nai khala y, kai ai tiu nai khumichi i tlaiveuchi niu u ai. Huni tlaiveuchi ai cha nai kaleungchi ly mana khala py dei ai ny y. Tlaiveu ai kang nai mai ly mana khala py, rym ai ny y. Khumi bawibawichi ly huna naichi ai niu iy paso u ai.