2
Bokhim mary y ym nai Angel
1 Areng i kani pri amtaw thau nai ly Kilakala mary dengdairei, Bokhim mary mang y chei iy Israela chengchi teng y, “Kai ly nangchi ai Aikupta pri dengdairei pahawi iy, nangchi i amsi pajochi teng y kaimy adeu nai pri mang y kangtha pi bo. Kai ly nangchi hawi asa nai Leu Maikawm ai mana khala py, kataphra ai ny y.
2 Nangchi ly hini pri y awm nai khumichi hawi mana khala py, leu maikawm aso moh. Nichi i maichamchi ai taphra vui ai nai tla, nanai nangchi ai leu kang pei bo. Na i py nangchi ly kai i leu pei nai tangai u y; ati mana nai y hina nai sa u lawh mo!Ref 2.2: Theu nai 34.12-13; Leu thui 7.2-5
3 Hunai deaungkho y nangchi mo mang y tavai thau u nai khala, kai ly hini khumichi ai theu hai pawn ai ny y, nanai nangchi teng y vai, kang thui pi nai bo. Nichi ly nangchi i paleung ka-echi lawm u ai. Nangchi i vui nichi i tameuhchi ly deaung kamta lawm ai,” napi.
4 Hina nai kamta kani pri amtaw thau naimy thui chum nai khala, Israela cheng bawibawichi ly khri pa-rei vo u.
5 Naibaly hini meingtym ai Bokhim mary, nanai palau u bo. Nichi ly huni meingtym y Areng teng y apathyp u bo.
Josua dei nai
6 Josua ly Israela chengchi ai khumi luteng, amy i khaileaung phy angen ai nai pato bo.
7 Josua heng nai sala ryrei Israela chengchi ly Areng ai chiu u. Josua dei nai bo y malawn py, Israela chengchi i vui Areng my rengrang tlai naichi sa pi nai niu kypkyp nai miteaung kehchi heng nai ryrei py, khumichi ly Areng ai chiu u jo rai nai ne.
8 Areng i miseaung, Nun i chapo Josua ly saneng chungvai atlo horei awm i dei bo.
9 Ni i veu ai Ka-sa mawi tosyh mang, Ephraim mawitleaung pri i Timnah Serah mary, my i peang nai khaileaung y up nai ne.Ref 2.9: Josua 19.49-50
10 Josua deung i khumi bawibawichi ly dei pawn nai deaungkho y, deung kangthau khumichi ly Areng ai py, Israela chengchi i vui mymy i atiti sa pi nai saichi py, tami u pawn nai ne.
Israela chengchi my Areng ai chiu y nai
11 Huna nai khala Israela chengchi ly Areng i tlang tleaung y kamngo sa u i, Bala tameuhchi ai chiu u.
12 Nichi ly mymychi amsi pajochi i Tameuh, mymychi ai Aikupta pri i dengdairei pahawi nai Areng ai chiu y naimy, mychi tengpang i khumichi chiu nai tameuhchi ai chiu vui bo. Nichi ly huni tameuhchi mo y lu meung u nai deaungkho y, Areng ai kado theu hai u bo.
13 Nichi ly Areng ai chiu nai kalop khai su iy, Bala tameuhchi hawi Asatare tameuhchi ai chiu u bo.
14 Hunai deaungkho y Areng ly Israela chengchi ai khri pa-rei kado theu i, paleung ka-echi my nichi ai tiu ai nai pei nai ne. Mymy ly tengpang sahawi y awm nai paleung ka-echi ai Israela chengchi i tlang tleaung y eaung ai nai pei nai deaungkho y, Israela chengchi ly amymychi ai amo hai pajau y leang bo.
15 Nichi tavai atiu nai tleirei y, Areng ly mymy i leu thui nai kamta, nichi ai sum hai nai deaungkho y, nichi ly khri pa-rei patang naira avum u nai ne.
16 Huna nai khala Areng ly nichi ai tiu nai khumichi teng i dengdairei atleu ai nai, lu sa nai keungchi theu hai bo.
17 Na i py Israela chengchi my ly huni lu sa nai keungchi i leu tangai pi y; Israela chengchi ly Areng i leu tangai y i, tameuh takhrachi ai chiu u bo. Areng i Reita leu pei naichi ai amsi pajochi my sa patawm nai kamta, nichi ly patawm u y.
18 Areng ly Israela chengchi ai lu sa nai keung leaungrei theu hai nai tleirei, Areng my huni lu sa nai keung ai sabawm nai deaungkho y, huni lu sa nai keung heng nai ryrei ly nichi ai paleung ka-echi teng i nai atleu pi. Areng ly nichi ai khri pa-rei pahen nai ne; ati mana nai mo nabaly nichi ly ngari kamtang hawi pahyp y naimy ana naira avum u iy, vo tangam u nai deaungkho y ne.
19 Na i py nichi ly mychi ai lu sa nai keung dei nai bo y ly mangri ra y tym u teng i, angchei i kangpreangchi tleaung y hawi y keh nai leaungsaichi sa u reng nai ne. Nichi ly tameuh takhrachi ai chiu u i, mychi i kamngo lam mang y tako u tangto nai ne.
20 Huna nai khala Areng ly Israela chengchi ai khri pa-rei kado theu i, “Huni khumichi ly kai i leu tangai y, kaimy nichi teaung patawm ai nai amsi pajochi teng y pei nai Leu Maikawm taphra u.
21 Huna nai y Josua dei nai thym khala i dengdairei, hini pri theung y awm u yb nai, mani khumi cheng theaungchi ai py kapatheu pi y ai.
22 Hini Israela chengchi ly kai i lam y nichi i amsi pajochi abang u nai kamta abang u ai mo, abang u y ai mo nanai kapany ai nai kai ly hini pri i khumichi ai teaung ai,” napi.
23 Hunai deaungkho y Areng ly huni khumichi ai, huni pri theung y awm jo ai nai pei bo. Mymy ly Josua ai nichi i tlang tleaung y eaung ai nai pei y; Josua dei nai bo y py, mymy ly nichi ai patheu tamangtang y nai ne.