TARA CHIH NAI KEUNGCHI
Israela chengchi ly Tameuh ai ka-ym awm nai thym khala tlamsa naira awm i, leu tangai y nai neng khala ly patang nairachi avum, nanai amtiura kahawi hini cha-iu theung y nga pajau nai ne. Huni tleaung y hawi keh nai amtiura ly Tameuh i leu tangai y nai deaungkho y, khri pa-rei patang naira avum u nai thym khala malawn py, uikheih iy mymy teng y ali teang ai nabaly, Tameuh ly nichi ai atleu ai nai angchi yb bo, nanai ne.
1
Juda hawi Simeon cheng theaungchi my Adonibezed samrang ai patiu vui nai
1 Josua dei nai bo y Israela chengchi my Areng teng y, “Mani cheng theaung ly kanan pri khumichi ai tiu ai nai chei man ai mo?,” nanai deng u.
2 Areng my, “Juda cheng theaung ly chei man ai nai tla; kai ly nichi teng y huni pri au ai,” nanai pathang.
3 Juda cheng theaungchi my Simeon cheng theaungchi teng y, “Kaichi i vui khai pi yb nai khu ka-peang theung y kaichi hawi vanrei abang ba. Kaichi ly kanan pri khumichi ai tiu ai. Huni bo y kaichi ly nangchi i vui phy pi yb nai khu ka-peang mang y kang hui ai,” napi u. Hunaibaly Simeon cheng theaungchi ly
4 Juda cheng theaungchi hawi vanrei, tavai keung y thau u bo. Areng my py nichi ai kanan pri khumichi hawi Perizi khumichi tlang tleaung y eaung hai nai deaungkho y, nichi ly Perizi mary y paleung ka-e tavaimi leaung 10,000 reichi ai tiu i eaung vui nai ne.
5 Huni mary y nichi ly Adonibezed samrang ai niu i, tiu nai deaungkho y,
6 ni ly preang bo. Nichi ly huni samrang ai preng u i, patiu baly ni i kiupui hawi kheupuichi tawp pi veng.
7 Adonibezed my, “Kai ly samrang leaung vui saryhreichi i kiupui hawi kheupuichi katawp pi veng nai ne; nichi ly kai i sabawi anui i, cha nei kamthomchi akhui iy cha u. Vai ly Tameuh my huni khumichi ai kasa nai kamta, kai ai ang sa nai bo. " nanai thui. Ni ai ly Jerusalem mary y hawi i, huni mary y dei bo.
Jerusalem mary hawi Hebron mary ai Juda cheng theaungchi my tiu i eaung nai
8 Juda cheng theaungchi ly Jerusalem mary ai tiu i, pajau vui bo. Mary i khumichi ai padei iy, mary ai py mai leng vui nai ne.
9 Huni bo y mawitleaung mang py, mawi kheutangra y hawi tokalawi mang khutaha meingtymra y py awm u nai khala, kanan pri khumichi ai chei iy tiu u nai ne.
10 Kiria Arba napi nai Hebron mary y awm nai khala, kanan pri khumichi ai py tiu u. Huni mary y awm nai Shesai, Ahiman hawi Talamai nupaichi ai tiu i pajau nai ne.
Debira mary ai Othniela my tiu i pajau nai
(Josua 15:13-19)
11 Hu i nai bi baly Juda cheng theaungchi ly huni neng khala Kiria Sepha napi nai Debira mary y tavai amsa u bi bo.
12 Huni khumichi theung i Kaleb napi naimy ly “Kai ly Kiria Sepha mary ai tiu iy, pajau nai khumi ai kai i chaniu Akhasa hawi apom hai ai,” napi.
13 Huna nai thui nai kamta, Othniela ly huni mary ai tiu pajau i, Kaleb i chaniu ai nga bo. Ni ly Kaleb i amnau Kina i chapo ne.
14 Apom nai kani y Othniela ly Akhasa ai, ni i ampo teng y li khaileaung harei hnei hai bo. Akhasa ly keaungngo kano kasau tleaung mang satla nai khala Kaleb my, “Ati aly ngai nai mo?,” nanai deng baly,
15 chaniu my, “Kai ai ngaai nangmy pei nai li khaileaung ly khutaha meingtymra awm nai ne; hunai deaungkho y tuikanchi py pei kyh,” napi. Huna nai khala Kaleb ly chaniu teng y tleaung mang i tuikanchi hawi, akui mang i tuikanchi py pei pi nai ne.
Juda cheng theaungchi hawi Benjamin cheng theaungchi i eaung nai pawichi
16 Mosi ampu i kangpreang Kenit chengchi ly chamleaung keungchi nawi parai nai Jeriko mary i dengdairei, Juda pri Arat mary tokalawi mang y awm nai daichi ka-vym mang y, Juda cheng theaungchi hawi vanrei chei u. Huni bo y nichi ly Amalek chengchi theung y khuteng sa u bo.
17 Juda cheng theaungchi ly Simeon cheng theaungchi hawi vanrei abang iy, Zephath mary y awm u nai Kanan chengchi ai tiu u i pajau bo. Nichi ly huni mary ai pasawi naimy taphra chum baly, Homah nanai amyn pathi u nai ne.
18-19 Areng ly Juda cheng theaungchi ai sabawm nai deaungkho y, nichi ly mawitleaung pri peang vui pajau bo. Na i py Kaza mary, Asakelon mary, Ekron mary hawi, huni marychi sahawi y awm nai meingtymchi ai ly peang u y. Pangli peang y awm nai huni khumichi teng y tamo ka-richi awm nai deaungkho y, Juda cheng theaungchi ly nichi ai patheu ai nai vam u y.
20 Mosi my leu pei nai kamta, Kaleb ly Hebron mary ai nga. Ni ly Anak kangpreang nupai phy thomreichi ai, huni mary i nai patheu vui nai ne.
21 Na i py Benjamin cheng theaungchi ly Jerusalem mary y awm nai Jebusi chengchi ai, huni mary i nai patheu u y. Huni neng khala i dengdairei Jebusi chengchi ly Benjamin cheng theaungchi hawi vanrei, Jerusalem mary y awm u nai ne.Ref 1.21: Josua 15.63; 2 Samuela 5.6; 1 Neng 11.4
Bethela mary ai Ephraim hawi Manase cheng theaungchi my tiu pajau nai
22-23 Ephraim cheng theaung hawi Manase cheng theaungchi ly Bethela mary ai tiu ai nai chei u. Huni neng khala huni mary ly Luza mary, nanai amyn pathi nai ne. Areng ly nichi ai sabawm. Mary theung y nichi my pato nai savaichi ly
24 mary theung i nai khumi leaungrei theu nai niu u. Nichi my huni khumi teng y, “Mary theung y kun ai nai lam kaichi ai patei ai nabaly, nang ai kaichi my ati sai py kangso hai y leang,” napi u.
25 Huni khumi my nichi ai lam patei nai deaungkho y, Ephraim cheng theaung hawi Manase cheng theaungchi ly huni khumi hawi ni i yhm dengtheungchi ny y baly, mary i awm nai khumichi ai padei be nai ne.
26 Huni khumi ly Hiti pri mang y chei iy mary harei sa i, huni mary ai Luza mary nanai amyn pathi nai deaungkho y, huni mary ly vaini khrairei Luza mary, nanai amyn awm jo nai ne.
Israela chengchi my patheu vui y nai khumichi
27 Manase cheng theaungchi ly Basen mary, Taanach mary, Dora mary, Ibalam mary, Mekido marychi hawi, huni marychi sahawi y awm nai mary katheang kalenchira i khumichi ai patheu y nai ne. Hunai deaungkho y Kanan chengchi ly huni mary katheang kalenchira y my awm u jojo.Ref 1.27-28: Josua 17.11-13
28 Israela chengchi ly atho awm tleaung awmra nai khala, Kanan chengchi ai miseaung kamta kalop sa hai bo. Na i py nichi ai patheu u y.
29 Mary y awm nai Kanan chengchi ai patheu y naimy awm u bo. Hunai deaungkho y Kanan chengchi ly nichi hawi vanrei awm u jojo nai ne.Ref 1.29: Josua 16.10
30 Zebulon cheng theaungchi my py, Kitaron mary hawi Nahala mary y awm nai khumichi ai patheu y naimy awm nai deaungkho y, Kanan chengchi ly nichi hawi vanrei awm jo iy, miseaung kamta kalop sa u bo.
31 Aser cheng theaungchi ly Akho mary, Sidon mary, Alet mary, Akhazi mary, Helaba mary, Aphek mary hawi Rihob marychi ra y awm nai khumichi ai patheu u y.
32 Hunai deaungkho y Aser chengchi ly hu y khuteng sa nai Kanan chengchi hawi vanrei awm u nai ne.
33 Naphtali cheng theaungchi ly Besimak mary hawi Bethanath marychi ra y awm nai khumichi ai patheu u y naimy, hu y khuteng pala nai Kanan chengchi hawi vanrei awm iy, nichi ai miseaung kamta kalop sa hai bo.
34 Amori chengchi ly Dan cheng theaungchi ai, mawitleaung mang y vawi ali teang ai nai pei u y.
35 Amori chengchi ly Azalon mary, Salabim mary hawi Hire mawi marychi mang y awm u jojo. Na i py Ephraim cheng theaung hawi Manase cheng theaungchi ly nichi ai mychi i reita aniu y khai i, miseaung kamta kalop sa hai nai ne.
36 Selah mary tosyh mang y awm nai Edomnote 1:36\xk Edom: Hebrai leu y “Amori” napi. \x*pri khujyh ly Akarabim mawi aleaung lam y tako prei nai ne.