3
Kanan pri y awm jo nai khumi cheng theaungchi
1 Huna nai y Areng ly Kanan pri y tavai atiu naira y abawi vai y nai Israela chengchi ai cham ai nai, huni pri theung y khumi cheng theaung phyreichi ai khai pi jo nai ne.
2 Mymy huna nai kamta sa nai ly Israela cheng kangthau tleireichi ai tavai leaungsai amtiu ai nai dawn hai nai ne. Vaichi khala tavai keung y abawi vai y nai khumichi ai patiu pi ai nai dawn hai patyp bo.
3 Huni pri theung y awm jo rai nai khumi chengchi ly Philistinchi i mary pangrei ra i Philistin khumi, Kanan khumi bawibawichi, Sidon khumichi hawi Bala Heramon dengdairei, palo parai nai Hamath mawi aleaung mang y khrairei awm nai, Lebanon mawi y awm u nai Hivit khumichi ne.
4 Israela chengchi ly mychi i amsi pajochi teng y, Mosi dengdairei Areng my pei nai Reita leuchi ai tangai mo, tangai y mo nanai pany ai nai, mymy ly huni khumichi ai teaung iy, cham ai ngai nai ne.
5 Hunai deaungkho y Israela chengchi ly Kanan chengchi, Perizi chengchi, Amori chengchi, Hiti chengchi, Hivit chengchi, Jebusi chengchi hawi vanrei awm u nai ne.
6 Nichi ly huni khumichi hawi vuinai ala iy, nichi i tameuhchi ai chiu u bo.
Othniela
7 Israela chengchi ly mychi i Areng Tameuh ai tami u veng bo; mymy i tlang tleaung y tamang u i, Bala tameuh hawi Aser tameuhchi ai chiu u.
8 Hunai deaungkho y Areng ly Israela chengchi ai katho theu i, Mesopotamia samrang Kusen Rishathaim ai, nichi i tlang tleaung y tavai eaung hai i, ni my saneng tajarei peang.
9 Naibaly Israela chengchi ly Areng ai kadeaung u i, mymy ly nichi ai atleu ai nai, khumi leaungrei ai pato pi bo. Huni khumi ly Kaleb i amnau Kena i chapo Othniela ne.
10 Areng i phailo ly ni i tlang tleaung y tym i, ni ly Israela chengchi ai lu sa nai keung y lawm bo. Othniela ly tavai tiu ai nai chei i, Areng ly ni ai eaung naira pei nai deaungkho y, Mesopotamia pri i samrang ai eaung vui nai ne.
11 Huni pri ly saneng vui palyhrei awmnemra nga i, hunaibaly Othniela ly dei bo.
Ehu
12 Israela chengchi ly Areng i tlang tleaung y kamngo sa u bi bo. Hunai deaungkho y mymy ly Moba samrang Ekalon ai, Israela chengchi tleaung y atho awm hai.
13 Ekalon ly Ammon chengchi hawi Amalek chengchi ai pangym iy, Israela chengchi ai tiu nai pajau vui i, chamleaung keung mary napi nai Jeriko mary ai nga vui bo.
14 Israela chengchi ly saneng holai tajarei samrang Ekalon teng y miseaung achei u bo.
15 Naibaly Israela chengchi ly Areng ai vo naimy kadeaung u i, mymy ly nichi ai atleu ai nai khumi leaungrei ai pato pi. Huni khumi ly Benjamin cheng theaung, Kera i chapo langvawimi Ehu ne. Israela chengchi ly Ehu ai, Moba samrang Ekalon teng y langseaungchi hawi pato u bo.
16 Ehu ly my i vui miurei awm iy, bo nyhrei awm nai haisau harei sa; huni haisau ai my i lamtang phai, baichu ateaungchi anui y kawm tabom nai ne.
17 Naibaly huni langseaungchi ai khumi veung hawi parai nai Ekalon teng y syn pi bo.
18 Ehu ly huni langseaungchi talam pi chum baly, langseaung angjeaung nai khumichi ai yhm mang y pato teang.
19 Na i py Ehu ly Kilakala sahawi i lengseaung mynchi awm naira dengdairei ali teang iy, Ekalon teng y chei ali teang i, “Samrang nang teng y leu kamsyh thui pi ai nai awm,” napi. Huna nai y samrang ly miseaungchi teng y, “Kaimy ni tlairei avum ai nai awm i, theu u pawn!,” nanai leu pei i, nichi bawibawi ly theu u pawn bo.
20 Naibaly samrang ly kanibi amka reng nai salo keh i sambeu y, mymy tlairei ateh nai thym khala Ehu chei i ni teng y, “Samrang, nang i vui Tameuh teng i satang amti pi ai nai awm,” napi. Samrang ly ang thau i angdo bo.
21 Huna nai khala Ehu ly my i langvawi kiu hawi, lamtang phai y heu nai haisau aphiu iy samrang i kajeu y thunvau bo.
22 Haisau ly taveang hawi raurei a-up na i, thau my amjawp hai cheng bo. Ehu ly huni haisau aphiu y; haisau ly samrang i nithun mang phai nyhrei sala y prida na bo.
23 Naibaly Ehu ly angam mang y theu i, katheu ai lakeusi angtleang iy,
24 theu vui bo. Miseaungchi tym u teang nai khala, katheu ai lakeusi angtleang cheng nai niu u; na i py nichi my samrang ly theung mang y awmnem ngaw khyh, nanai dawn u.
25 Nichi angam mang y avo nai ryrei ajeng i py, katheu ly am-eaung y nai deaungkho y, nichi my saw la iy katheu paeaung u. Huna nai khala mychi i areng ly ang-saveaung y atlym naimy dei nai niu u bo.
26 Ehu ly huna nai nichi ajeng u nai thym khala theu iy angpreng veng bo. Ni ly lengseaung mynchi awm naira katlen vui i, Serah avang mang y tleaung vui nai ne.
27 Ni ly Ephraim mawi aheung y tym nai khala tavai thau ai nai baw eng i, Israela chengchi ly ni i nithun abang u iy, mawi aheungchi mang satla u kathiu bo.
28 Ni my nichi teng y, “Kai nithun abang u! Areng ly nangchi i paleung ka-e Moba chengchi ai eaung ai nai pei bo,” napi. Hunaibaly Israela chengchi ly mawi i nai satla kathiu iy, Ehu teng y abang u. Moba chengchi angpeang nai Jordan tavo kady tuivum nga vui nai ne; paleung ka-echi leaungrei py tavo angpeang ai nai ngo y.
29 Huni kani y Moba tavaimi vawi patyp nai leaung meaung kateaungrei awmvi nai ai padei u bo; nichi leaungrei py tleaung u y.
30 Huni kani y Israela chengchi my Moba chengchi ai tiu nai pajau nai bo baly, huni pri y saneng vui tariurei awmnem naira nga u bo.
Shamkar
31 Huni bo y lu sa nai miteaung keh ly Anath i chapo Shamkar ne; ni ly cheaungvawi kamsui hawi Philistin cheng leaung chungvai tariureichi ai padei i, Israela chengchi ai atleu bo.