11
1 Kilead cheng sorai risa Japheth ly bimanu i chapo ne. Ni i ampo Kilead ly
2 my i aju hawi nga nai chapochi py awm; nichi ly tleaungri cheang nai khala, Jephetha ai yhm i nai patheu u veng. Nichi my, “Nang ly takhra neampachy hawi nga nai chapo ne i, kaichi ampo i yhmtheaung amtym ai nai ngo y leang,” napi u.
3 Japheth ly my i amjo amnauchi teng i nai preang iy Toba pri y awm vui bo. Hunira y ni ai ly yhm hlau amny y nai khumi phyreichi my tahm khai nai deaungkho y, huni khumichi ly ni i nithun abang u.
4 Naibaly neng kra kyh nai khala, Ammon chengchi ly Israela chengchi hawi tavai atiu u nai ne.
5 Huna nai khala Kilead pri i lu sa naichi ly Jephetha ai palau ai nai Toba pri y chei u i, ni teng y,
6 “Ammon chengchi ai tiu ai nai kaichi ai lu so ba,” napi u.
7 Na i py Jephetha my, “Nangchi ly kai ai niu ngai y nai deaungkho y, ngaai i yhm dengdairei patheu u praw bo; vai, patang naira avum nai khala naini, ati mana nai kai teng y jeu u lawh mo?,” napi.
8 Nichi ly Jephetha teng y, “Vai, nang teng y kaichi kang tym nai ly Ammon chengchi ai kaichi hawi vanrei tiu ai nai hawi, Kilead pri mipuichi ai lu sa ai nai ne,” napi u.
9 Jephetha my, “Nangchi ly Ammon chengchi ai tiu ai nai kai ai yhm mang y palau nai deaungkho y, Areng my py kai ai eaung hai lawh baly, kai ly nangchi i samrang kalawn ai,” napi.
10 Nichi my py, “Kaichi ngai mang; Areng ly kaichi i pany hai nai keung ne,” nanai pathang u.
11 Hunaibaly Jephetha ly Kilead pri miteaung kehchi hawi vanrei abang bo. Khumichi my py ni ai, mymychi ai peang nai keung hawi lu sa nai keung y tahm pasang u. Jephetha ly Mizapa mary y, Areng i mo y my i hnei naichi pany hai ali teang bo.
12 Naibaly Jephetha ly Ammon samrang teng y savaichi pato i, “Nang hawi kaichi sala y ati ka-jo awm mo? Nang ly ati mana nai y, kaichi i pri theung y kun lawh mo?” nanai deng.
13 Ammon samrang my Jephetha i savaichi teng y, “Israela chengchi ly Aikupta pri i dengdairei theu u nai khala, kai i khu ka-peang ai Arnon tavo dengdairei Jabbok tavo hawi, Jordan tavo khrairei peang u vui nai ne. Huna nai y nangchi ly vai, huni khu ka-peang kai teng y paleung kahawi naimy, pei teang ai nai tla,” napi.
14 Jephetha ly Ammon samrang teng y savaichi pato bi i, hina nai pathang bo.
15 “Israela chengchi my Moba pri hawi Ammon pri ai peang vui, nanai ly teng y leang.
16 Kateng khyp thui ai nabaly, Israela chengchi ly Aikupta pri i dengdairei theu u nai khala, nichi ly daichi ka-vym tako prei iy, Akaba pangli katheaung sahawi i Kadesa mary y tym u bo.
17 Huna nai khala nichi ly Edom samrang teng y savaichi pato iy, Edom pri tako prei ai nai takeng u. Na i py Edom samrang ly pei y. Nichi ly Moba samrang teng y py, huna nai kamta takeng u; huni samrang my py pei y. Hunai deaungkho y Israela chengchi ly Kadesa mary y awm u nai ne. Ref 11.17: Kati 20.14-21
18 Naibaly nichi ly Edom pri hawi Moba prichi ai taki iy, daichi ka-vym tako prei naimy Moba pri nisi mang, Arnon tavo vai mang y tym u nai khala, huni meingtym y tai u bo. Arnon tavo ly Moba pri i khu ka-peang ne nai deaungkho y, huni tavo ly nichi angpeang u y. Ref 11.18: Kati 21.4
19 Naibaly Israela chengchi ly Hesabon mary Amori chengchi i samrang Sihon teng y savaichi pato iy, nichi i pri y tako prei naimy mychi i pri y chei ai nai takeng u bo.Ref 11.19-22: Kati 21.21-24
20 Na i py Sihon samrang my pei y. Ni ly my i tavaimi kamkawm verei pangym iy, Jaha mary y tai u i, Israela chengchi ai tiu u bo.
21 Na i py Areng ly Israela chengchi ai, Sihon samrang hawi tavaimichi i tlang tleaung y tiu pajau ai nai pei nai deaungkho y, Israela chengchi ly huni pri y awm nai Amori chengchi i khu ka-peang bawibawichi ai peang vui nai ne.
22 Nichi ly tokalawi mang y Arnon tavo, tosyh mang y Jabok tavo khrairei py, nisi mang y daichi ka-vym, nidym mang y Jordan tavo khrairei py, Amori khu ka-peang ngierei ai peang pi vui bo.
23 Hunai deaungkho y mymy i khumi Israela chengchi i vui, Ammon chengchi ai patheu pi vui nai keungly Israela chengchi i Areng Tameuh ne.
24 Nang ly huni khu ka-peang nga teang ai nai atho sa ai a? Nangmy i tameuh Khemosa my ang pei nai ngierei nang peang pajau mang. Na i py kaichi i vui, kaichi i Areng Tameuh my peang vui nai khu ka-peang ngiereichi ly kaichi my peang ai.
25 Nang ly nangmy ai Moba samrang, Zipor i chapo Balek tleaung y len keh, nanai dawn a? Ni ly Israela chengchi ai ka-jo hau iy tiu vai nai sai a?Ref 11.25: Kati22.1-6
26 Israela chengchi ly Hesabon mary hawi Aroe mary ai py, huni mary tengpang sahawi i marychi hawi, Arnon tavo peang y awm nai mary ngiereichi ai py, saneng chungvai thomrei peang nai thym khala, nang ly ati mana nai, huni marychi ai lo teang y lawh mo?
27 Kai ly nang i tlang tleaung y ati sai py hawi y nai so y; nang naini kai ai tavai tiu iy, hawi y nai sa lawh bo. Areng ly tara chih pi nai keung ne. Mymy ly Israela chengchi hawi, Ammon chengchi sala y vaini tara chih pi ai,” napi.
28 Na i py Ammon samrang Japheth ly , pathang teang nai leu ai ati sai py tahm pateng pi y.
29 Huna nai khala Areng i phailo ly Jephetha teng y tym. Jephetha ly Kilead pri hawi Manase pri tako prei iy, Kilead pri Mizapa mary y vawi ali teang bo. Naibaly Ammon pri mang y tavai tiu ai nai amsa.
30 Jephetha ly Areng teng y, hina nai kamta vaineng adeu bo. “Nang ly kai ai Ammon chengchi i tlang tleaung y tavai eaung hai ai nabaly,
31 kai ai lamchung ai nai yhm i theu man nai khumi ai, leng patlum nai kapathypra palawn iy, nang teng y kang talam ai,” napi.
32 Hunaibaly Jephetha ly tavo angpeang iy, Ammon chengchi ai tiu i, Areng ly ni ai tavai eaung hai bo.
33 Ni ly paleung ka-echi ai Aroe mary dengdairei, Minith mary tengpang sahawi y awm nai mary apomreichi ai py, Abel Keramim mary khrairei py hui iy tiu i, khumi padei nai pawi pui lawm na bo. Hunai deaungkho y Ammon chengchi ly Israela chengchi hawi atiu naira y sum bo.
Jephetha i chaniu
34 Jephetha ly Mizapa mary, mymy i yhm y vawi teang nai khala, my i chaniu ly atym beu iy, lam naimy lamchung ai nai theu bo. Ni ly chaniu harei awm khyh nai ne.
35 Jephetha ly chaniu ai niu nai khala paleung hawi y i, my i baichu sei iy, “Aw lo awi! nang ly kai i paleung ai no hai na ly! Kai ai paleung no hai nai khumi ly ati mana nai y nang ne lawh mo? Kai ly Areng teng y ji parai nai vaineng adeu nai ly ajiu teang thai y leang bo!” napi.Ref 11.35: Kati 30.2
36 Chaniu my ly “Ngaai, nang ly Areng teng y vaineng adeu chum veng bo nabaly, vaineng adeu nai kamta kai i tlang tleaung y so ba; Areng ly ngaai nang ai, mymy i paleung ka-echi tlang tleaung y vawitheung tha ai nai ang pei bo.
37 Na i py kai harei takeng ai nai ngai; “Kai ly anglo ateaung naimy tlang tem ai lawh bo i, ahawichi hawi vanrei mawi y amki iy vo tangam ai nai neng lo nyhrei, kaimy ngaingai awm ai nai pei kyh rai ba,” nanai takeng.
38 Jephetha ly chaniu ai lo nyhrei pei iy pato bo. Anglo ly yhmtheaung so y, cho chanau ngo y naimy dei ai nai ne i, ni hawi vanrei ni i ahawichi ly mawi y lyn kalau iy vo tangam u bo.
39 Lo nyhrei bo baly ni ly ampo teng y vawi ali teang. Ampo py Areng teng y, my i adeu nai kamta sa nai deaungkho y, anglo ly anglo thym naimy deung tlum nai ne.
Huni ly Israela cheng theung y reita lawm bo.
40 Hina naichi molam y Israela pri Kilead mary y awm nai Jephetha chaniu i vui saneng tleirei, kani palyhrei Israela neampachychi ly theu iy, vo tangam u nai reita lawm bo.