12
Jephetha hawi Ephraim cheng theaungchi
1 Ephraim cheng theaungchi ly tavai atiu ai nai aeng u bo. Nichi ly Jordan tavo angpeang u iy, Zaphon mary mang y chei u i, Jephetha teng y, “Nang ly kaichi ai palau y naimy, ati mana nai Ammon chengchi ai tavai tiu lawh mo? Nang i awm nai nang i yhm ai, kaichi my mai leng vui ai,” napi.
2 Na i py Jephetha my nichi teng y, “Kai hawi kai i khumichi ly Ammon chengchi hawi khrikhri pa-rei ajo u bo; kai ly nangchi ai kang palau i py, kaichi ai nichi kiu i nai nangchi my atleu y pui be.
3 Huna nai nangchi my kaichi ai atleu pi ai nai athang khai y nai deaungkho y, kai ly tlang areu iy Ammon chengchi ai tiu ai nai kachei bo. Areng my py kaichi ai nichi i tlang tleaung y eaung hai bo. Hunai deaungkho y vai, nang ly ati mana nai y kaichi ai tiu lawh mo?
4 Naibaly Jephetha ly Kilead sorai bawibawichi ai angym hai iy, Ephraim chengchi ai tiu u bo. Ephraim chengchi my, (“Ephraim pri hawi Manase pri y awm nai Kilead pri khumichi ly vaineng takan iy, Ephraim pri i dengdairei preang nai khumichi na a tu ly!” nanai preaung u.)
5 Ephraim i khumichi tleaung pajau y pa-rei, Kilead pri i khumichi ly Jordan tavo angpeang thai nai, meingtym ngiereichi ai peang vui nai ne. Ephraim pri i khumi leaung leaungrei ly theura nga ai nai tavo angpeang ai nai hnei nai khala, Kilead pri khumichi my, “Nang ly Ephraim pri khumi ne a?” nanai deng; “ny y leang”
6 nanai thui baly, “Sibboleth” nanai thui hai. Na i py huni khumi ly leu chai pyn pa-rei thui thai y i, “Shibboleth” nanai thui lawh baly, ni ai patiu iy Jordan tavo angpeang naira y padei u bo. Huni tavai atiu naira y Ephraim pri khumi leaung meaungkateaung palyh pa-ngo sang nyhrei dei nai ne.
7 Jephetha ly Israela pri khumichi ai saneng tariurei lu sa i dei bo. Ni i veu ai Kilead pri, my i saleaung mary y up bo.
Ibazan, Elon, Abadon
8 Jephetha dei nai bo y Israela chengchi ai lu sa nai khumi ly Bethlehem mary i Ibazan ne.
9 Ni ly chapo leaung phairei, chaniu leaung phairei awm. Ni ly my i chaniuchi ai cheng takhrachi hawi apom hai iy, my i chapochi ai py cheng takhra neampachychi hawi apom hai. Ibazan ly Israela chengchi ai saneng saryhrei lu sa i,
10 dei baly ni i veu ai ly Bethlehem mary y up bo.
11 Ibazan dei bo baly Zebulon mary i Elon ly Israela chengchi ai saneng horei lu sa.
12 Naibaly ni ly dei i, ni i veu ai ly Zebulon khu ka-peang i Azalon mary y up nai ne.
13 Elon dei nai bo y Pirathon mary Hilela i chapo Abadon ly Israela chengchi ai lu sa bo.
14 Ni ly chapo leaung vui palyhrei, katu leaung phairei awm; nichi ly keaungngo kano kasau vui saryhrei atang nai khumichi ne. Abadon ly Israela chengchi ai saneng tajarei lu sa i,
15 dei baly ni i veu ly Amalek mawitleaung pri Ephraim khu ka-peang Pirathon mary y up bo.