10
Tola
1 Abimelek dei nai bo y, Israela chengchi ai atleu ai nai Dodo i katu, Puah i chapo Tola amthawn nai ne. Ni ly Iskara cheng theaung ne i, Ephraim mawi Shamir mary y awm.
2 Ni ly Israela chengchi ai lu sa nai ne i, saneng apom phai thomrei, lu sa chum baly dei i, ni i veu ai Shamir mary y up nai ne.
Ja-ira
3 Tola dei nai bo y Kilead pri i Ja-ira amthawn; ni ly Israela chengchi ai saneng apom phai nyhrei lu sa pi nai ne.
4 Ni ly keaungngo kano kasau ha harei atang nai, chapo leaung phairei awm; nichi ly Kilead pri y mary phairei peang ai nai nga u. Huni marychi ly ‘Ja-ira i avangchi’ nanai, vaini khrairei amyn awm jo nai ne.
5 Ja-ira dei nai khala. ni i veu ai Kamon mary y up bo.
Jephetha
6 Israela chengchi ly Bala tameuh, Moba tameuh, Asatare tameuh, Suria tameuh, Sidon tameuh, Ammon tameuh, Philistia tameuhchi ai chiu u i, Areng ai khai u su bi nai ne. Nichi ly Areng ai khai su iy mymy ai chiu nai anawn u veng bo.
7 Hunai deaungkho y Areng ly Israela chengchi tlang tleaung y kado theu i, Philistia chengchi hawi Ammon chengchi anui y awm hai bo.
8 Nichi ly Jordan tavo nisi mang, Amori khu ka-peang Kilead pri y awm nai Israela chengchi ai, saneng holainyh ryrei ana u.
9 Ammon chengchi ly Jordan tavo malawn py angpeang u i, Benjamin cheng theaung hawi Ephraim cheng theaungchi ai tiu u nai deaungkho y, Israela chengchi ly patang u bo.
10 Huna nai khala Israela chengchi ly Areng ai vo naimy kadeaung u i, “Kaichi ly nang i tlang tleaung y tamang u bo; kaimychi i Tameuh ai khai su iy, Bala tameuhchi ai kachiu u lawh bo,” nanai ahui u.
11 Areng my hina nai leu pei bi nai ne. “Vaichi khala Aikupta cheng, Amori cheng, Ammon cheng, Philistia cheng,
12 Sidon cheng, Amalek cheng hawi Meon chengchi ly nangchi ai ana nai khala, nangchi ly kai teng y vo hang naimy ahui u bo. Kaimy py huni khumichi kiu i nai, nangchi ai atleu pi nai ny y a?
13 Na i py nangchi ly kai ai khai su iy, tameuh takhrachi ai chiu u bi bo. Hunai deaungkho y kai ly nangchi ai atleu bi y leang bo.
14 Nangmychi my vawi nai tameuhchi teng y phai vo u. Nangchi patang naira avum nai khala, huni tameuhchi my nangchi ai atleu na sy.”
15 Na i py Israela chengchi my Areng teng y, “Kaichi ly kamngo sa tamang u bo; nangmy ngai nai kamta kaichi ai so ba; na i py vai, hini tlenrei ly kaichi ai atleu kyh ba,” nanai takeng u.
16 Hunai deaungkho y nichi ly cheng takhrachi chiu nai tameuhchi ai khai su iy, Areng ai chiu u ali teang bo. Mymy py nichi i avum nai patang naira molam y pahen pi bo.
17 Huna nai khala Ammon tavaimichi ly tavai tiu ai nai angveirym naimy Kilead pri y tai u bo. Israela chengchi ly akachu u iy, Kilead pri Mizapa mary y tai u.
18 Nichi my, “Hini tavai atiu naira y, achi ai ami my lu sa ai mo? Lu sa ai nai khumi ly Kilead pri khumi mipuichi i lu lawm ai nai tla,” nanai mymychi i miteaung kehchi hawi arum u bo.