24
Sekhem mary i Israela chengchi teng y Josua my leu taviu nai
1 Josua ly Israela cheng theaung bawibawichi ai Sekhem mary y angym hai bo. Ni ly Israela miteaung kehchi, lu sa naichi, tara chih nai keungchi, bangtangchi ai palau i nichi ly Tameuh i mo y tym u bo.
2 Huna nai khala Josua my khumi bawibawichi teng y, “Israela chengchi i Areng Tameuh my hina nai leu ang pei bo. ‘jangni y nangchi i amsi pajo napi nai Terah, ni i chapo Abraham hawi Nahorchi ly Euphrat tavo vai mang y awm iy, tameuh takhrachi ai chiu u nai ne.Ref 24.2: Atiti 11.27
3 Kai ly nangchi i amsi pajo Abraham ai Euphrat tavo vai mang y awm nai meingtym i dengdairei kapalau iy, Kanan pri meingtym tleirei y kapahawi i, ni i kangpreangchi ai peung hai bo. Ni ai chapo Isaka thawn hai bo.Ref 24.3: Atiti 12.1-9, 21.1-3
4 Isaka teng y chapo Jakob hawi Esaw ai thawn hai. Kai ly Esaw ai Edom mawitleaung meingtym kapei pi; Jakob hawi ni i chapochi ly Aikupta pri mang y chei iy awm u bo.Ref 24.4: Atiti 25.24-26, 36.8, 46.1-7; Leu thui 2.5
5 Hunaibaly kai ly Mosi hawi Aron ai pato iy, Aikupta pri y ka-jei awm parai naichi katym hai chum baly, nangchi ai kang pahawi bo.Ref 24.5: Theu nai 3.1—12.42
6 Kai ly nangchi i amsi pajochi ai Aikupta pri i dengdairei patheu nai khala, Aikupta chengchi ly nichi nithun keaungngo ka-richi, keaungngo risachi hawi hui iy tiu u. Nichi ly pangli kamsenra tym u nai khala,Ref 24.6-7: Theu nai 14.1-31
7 kai teng y vo naimy kasabawmra hnei u bo. Huna nai khala kai ly nichi hawi Aikupta tavaimichi sala y khuveng theu hai. Paleung ka-echi i tlang tleaung y pangli tui um hai meuh i, nichi ly tui y dei u chauchau bo. Kai ly Aikupta pri ai mana pajeng mo, nanai nangchi pany u nai ne.
Nangchi ly daichi ka-vym y krarawm pa-rei awm u.
8 Naibaly kai ly nangchi ai Amori chengchi awm nai Jordan tavo nisi mang y kapahawi bo. Nichi my nangchi ai ang tiu teu i py, kai ly nangchi ai eaung hai. Nangchi ly nichi i pri ai tiu pajau nai khala, kai ly nichi ai katamyh pawn nai ne.Ref 24.8: Kati 21.21-35
9 Hunaibaly Zepho i chapo Moba pri samrang Balek ly Israela chengchi ai tiu. Ni ly nangchi ai pasawi patau ai nai Bora i chapo Balam ai palau hai bo.Ref 24.9-10: Kati 22.1—24.25
10 Na i py kai ly Balam i hnei takeng nai sai tangai pi y i, ni ly nangchi ai amtheaung hai bo. Hina nai khala, kai ly nangchi ai Balek kiu i nai atleu pi bo.
11 Hunaibaly nangchi ly Jordan tavo angpeang iy, Jeriko mary mang y tym u. Jeriko mary i khumi Amori cheng, Perizi cheng, Kanan chengchi ai tiu u. Na i py kai ly nangchi teng y, nichi bawibawi ai tiu i eaung hai bo.Ref 24.11: Josua 3.14-17, 6.1-21
12 Nangchi tavai amsa u nai khala, kai ly nichi ai ahei hai phro iy, Amori samrang leaung nyhrei ai patheu veng bo. Nangchi i haisau hawi thailiho ateaungchi deaungkho y, eaung u nai ny y leang.Ref 24.12: Theu nai 23.28; Leu thui 7.20
13 Nangchi my thawn vai y, so vai y nai khaileaung meingtym hawi, so vai y nai marychi ai nangchi teng y kang pei bo. Vai ly nangchi huni khaileaung y awm iy, nangchi ui y nai kreip akho hawi, Olive akhochi ra i dengdairei, athai cha u nai ne,” napi.Ref 24.13: Leu thui 6.10-11
14 Josua my thui bi i, “Vai nangchi ly Areng ai jei kaji naimy tahm khai iy, mymy i kalop ai paleung hawi verei, ka-ym awm naimy so u. Mesopotamia pri hawi Aikupta pri y nangchi i amsi pajochi my chiu nai tameuhchi ai khai su iy, Areng ai naini chiu u.
15 Leu kabeaung y nangchi ly Areng ai chiu y lawh baly, Mesopotamia pri y nangchi i amsi pajochi my chiu nai tameuhchi mo, ti y baly vai, nangchi awm nai Amori chengchi my chiu nai tameuhchi ai mo, chiu ai nai vaini my vawi takhra u. Kai hawi kai i yhm dengtheungchi ne teu khyly Areng ai naini chiu ai khyh,” nanai thui pi bo.
16 Huna nai khala khumi bawibawichi my, “Kaichi ly mani neng khala py, Areng ai khai su iy, tameuh takhrachi ai chiu ai ny y!
17 Kaichi i Areng Tameuh ly kaichi i ampochi hawi kaichi ai miseaung achei nai, Aikupta pri i dengdairei atleu pi bo. Mymy i sa pi nai lyh ai hawi parai naichi kaichi niu u bo. Pri neangneangchi tako prei nai khuleaung jeungrei, mymy ly kaichi ai ama hai iy, ang kry nai ne.
18 Kaichi ly hini pri theung y kun u nai khala, mymy ly hini meingtym y awm nai Amori cheng bawibawichi ai patheu pi pawn bo. Hunai deaungkho y kaichi ly Areng ai naini chiu u ai. Mymy ly kaichi i Tameuh ne,” nanai pathang u bo.
19 Huna nai khala Josua my khumichi teng y, “Nangchi ly Areng ai chiu vam ai ny y. Mymy ly chai parai nai Tameuh ne i, nangchi i kamngo pahen pi ai ny y; mymy ly takhosi parai nai ne.
20 Nangchi ly Areng ai khai su iy, tameuh takhrachi ai chiu u lawh baly, nangchi ai pahen nai Tameuh ly nangchi ai paleung ka-e khai iy, myh kang nai pa-rei pajeng ai,” napi.
21 Khumichi my, “Kaichi ly Areng ai naini chiu u ai,” nanai Josua teng y pany hai u bo.
22 Josua my nichi teng y, “Nangchi ly Areng ai naini chiu u ai, nanai thui u nai ly nangmychi naimy pany hai nai keung lawm u bo,” napi. Huna nai khala nichi my,
“Kaichi ly kaimychi naimy pany hai nai keungchi ne khypkhyp bo,” napi u.
23 Josua my, “Hunaibaly nangchi teng y awm nai tameuh takhrachi ai khai su iy, Israela chengchi i Areng Tameuh teng y ahihawi iy chiu u,” napi.
24 Huna nai khala khumichi my Josua teng y, “Kaichi ly kaimychi i Areng Tameuh ai chiu iy, mymy i leu tangai ai,” nanai adeu u bo.
25 Hunai deaungkho y Josua ly huni kani y, khumichi hawi Leu Maikawm asa chum baly, Sekhem mary y nichi sa patawm ai nai reitachi khai pi bo.
26 Josua ly hini reitachi ai Tameuh i Reita cha-iu theung y tajiu typ nai ne. Hunaibaly ni ly lengseaung pui harei la iy, Areng i meingtym kachai awm nai Taru keung anui y leng bo.
27 Josua my khumi bawibawichi teng y, “Hini lengseaung ly achi i vui pany hai naira lawm ai. Achi teng y Areng my leu pei nai ngiereichi ai, hini lengseaung ly thai ai. Hunai deaungkho y nangchi ly nangchi i Tameuh ai tiu lawh baly, hini lengseaung ly pany hai naira lawm ai,” nanai leu pei bo.
28 Hunaibaly Josua ly khumi bawibawichi ai vawi ai nai pei i, nichi ly mychi i awm naira mang y vawi u bo.
Josua hawi Elaza dei nai
29 Hunaibaly Areng i miseaung, Nun i chapo Josua ly saneng chungvai atlo horei awm i dei bo.
30 Nichi ly Kaasa mawi tosyh mang Ephraim mawi aheungra i, Timnah Serah mary y awm nai, my i peang nai khaileaung y ni i veu up bo.Ref 24.30: Josua 19.49-50
31 Josua heng nai sala ryrei Israela chengchi ly Areng ai chiu u. Josua dei nai bo y Israela chengchi i vui Areng i sa pi nai ngiereichi ai niu nai lu sa naichi heng nai sala ryrei py nichi ly Areng ai chiu u nai ne.
32 Israela chengchi ly Aikupta pri i dengdairei syn u nai, Josepha i hiuchi ai Sekhem i ampo, Hamor i chapochi teng y Jakob my tangkacho chungvairei hawi van nai, Sekhem mary i khaileaung y up u bo. Huni khaileaung ly Josepha i kangpreangchi amtym nai khaileaung ne.Ref 24.32: Atiti 33.19, 50.24-25; Theu nai 13.19; Jh 4.5; Amtaw 7.16
33 Aron i chapo Elaza py dei nai deaungkho y, ni i veu ai ni i chapo Phineha teng y pei nai, Ephraim mawi aheung i Kibeah mary y up u bo.