8
Bilada
1-2 Ali aho nai kamta katheu nai leuchi ly tem bo a?
3 Tameuh ly tara chih naira y mana khala py,
jawi tamang hai vai y leang.
Mymy ly mana khala py, hawi nairachi so y naimy awm vai y leang.
4 Nang i cho chanauchi ly Tameuh i tlang tleaung y sa tamang nai deaungkho y,
mymy ly nichi ai kamngo nai molam y parip nai ne.
5 Na i py vai, nang ly ati cheaungkhang sa thai nai keung Tameuh teng y ahihawi iy ahui ba.
6 Nang ly khri pa-rei chai i hawi lawh baly,
Tameuh ly ang jeu iy nang ai ang sabawm ai.
Kawn vang langseaung pei nai kamta, nang i yhm dengtheungchi ai, palum pi ali teang ai.
7 Nang i sum veng chum nai yhmtheaung katuichi ly
vai, Tameuh my ang pei ai nai yhmtheaung katuichi hawi pata baly,
ati sai py thui kra ai naira by y leang.
8 Jangni khumichi i leu ai tanareichy adawn cham;
achi i amsi pajochi amtiu u nai leu meitang ai paleung theung y adawn ba.
9 Achi ly deung dawi iy, ati leaungsai py pany u y nai ne.
Achi ly khaileaung salo y tla nai pa-pui kamta asyh reng.
10 Na i py nang ly jangni i khumichi my, thui parip nai saichi adawn ba.
Nichi i thui nai leuchi vai, tangai ba.
11 Nichi my, “Japang-eumuichi ly tui by y nai meingtym y prau thai y.
Huni keungchi ai aneang kapan by y nai meingtym y, mana khala py niu vai y.
12 Tui kang veng nai khala, hunichi ly theang ala i, tyn iy teaung ai nai neng tym y rai khala my
takhra keungchi tleaung y deirawm veng reng nai ne.
13 Tameuh by y nai khumichi ly huni japang-eumuichi hawi atawm;
Tameuh ai tami vui nai dengdairei,
nichi ly athang khai naira by y nai lawm u bo.
14 Nichi ly kalangvui hawi khanglo sanghang yhm ai a-ym nai khumichi ne.
15 Nichi ly khanglo sanghang yhm ai abang hau lawh baly,
huni khanglo sanghang yhm ly nichi i abang hau nai khaw pajau na a?
Kalangvui ai kho sa iy amkhaw lawh baly, huni kalangvui ly nichi i amkhaw nai khaw hai pajau na a?,” nanai thui u bo.
16 Khumi hawi y naichi ly kanibi theung y sai kadeu ampho iy,
akho verei y kawi ve nanai achachi kamta, peung u reng.
17 Huni acha keungchi i tangjynchi ly lengseaungchi ai pi naimy
akau cheng iy awm reng.
18 Na i py huni keungchi ai akyn veng nai khala,
huni lengseaungchira y acha keungchi prau, nanai ami py pany ai ny y.
19 Khumi hawi y naichi i amo theu nai ly huna nai kamta tama veng ai.
Nichi i meingtym py, takhra khumichi my lawm veng ai.
20 Na i py Tameuh ly mymy tlang tleaung y ka-ym awm naichi ai,
mana khala py khai su ai ny y.
Khumi hawi y naichi ai ly mana khala py sabawm ai ny y.
21 Mymy ly nang ai amo theu parai naimy aeu, panui ai nai neng ang pei ali teang ai.
22 Na i py nang i tlang tleaung y niu ngai y naichi ai kangji nga hai ai.
Khumi hawi y naichi i awm nai yhmchi py, tama pawn ai.