7
1 Khumi ly khaileaung y akawm parai naimy kalop sa ai tla nai ne.
Kalop ram sa nai khumi hawi atawm.
2 Khumi ly savairu nai ka-khui kadeaung nai miseaung,
kalop sa nai vang ajeng nai, lop-pan nai khumi hawi atawm.
3 Kai i vui ly lorei bo y lorei,
heng ai nai paleung ka-no maidenreichy py by y.
Kai ly vum tleitleirei, paleung bi paleung mawn naimy kaawm bo.
4 Ira tleaung y aseaung nai khala py neng ly kheih lei y i,
vumtorei amkhiu lawh amthai lawh iy, khutawi ai nai ajeng naimy kaawm bo.
5 Kai i ngan tlang ly angvawichi,
kaleungchi hawi kawi na bo.
Kai i angvawichi ly naih leaungsup na bo.
6 Kai i neng kanichi ly athang khai naira by y naimy kheih veng bo.
Kalang tengkaleng tleaung y malawn py, neng kheih nai rang keh.
7 Aw Tameuh, kai i heng nai ly taho kathiu taho kalau nai ryrei khyh,
nanai pany pi ba.
Kai ly mo mang y amo theu bi ai nai ny y leang bo.
8 Nang ly kai ai vai, niu teu i py mo mang y mana khala py, niu ali bi ai ny y leang bo.
Nang ly kai ai hau teu i py, kai kaawm ai ny y leang bo.
9-10 Aheang pawn vui nai khupanym kamta, khumi ly dei nai bo y,
mana khala py tym ali bi ai ny y leang bo.
Ni hawi ama naichi py, ni ai tami u pawn ai bo.
11 Kai ly awm pypy thai y!
Kado theu, paleung no-ei naimy awm nai deaungkho y,
kang thui pi keng nai ne.
12 Nang ly ati mana nai y kai ai, tamcheaung hawi khai lawh mo?
Kai ai pangli naka palawn lawh a?
13 Kai ly aseaung iy ka-kawm pry ai nai atho kasa.
Amy i no patang nai sai, hawira nga ai nai kahau bo.
14 Na i py nang ly kai ai ka-jei hawi parai nai amang kasichi hawi,
mo mang y ka-jei awm naichi amang hai bo.
15 Kai ly vai i kamta tlang heng naimy awm ai nai tleaung y ly kaneaung taau iy,
dei ai nai kadeaung nai pa-rei, amang kasichi amang hai bo.
16 Kai ly kamjau kang pei mang; heng nai py kapaleih na bo.
Kai i tlang tleaung y ngai nai kamta, lyra lawm hai ba.
kai i heng nai py atyhtyh teu bo.
17 Khumi ly ati mana nai khumi ne iy,
nang ly ni ai hina tanrei dawn hai lawh mo?Ref 7.17: Sam 8.4, 144.3
Ni i sa nai leaungsaichi ai, ati mana nai y tahm pateng lawh mo?
18 Nang ly ni ai khawn tleirei khen patawm iy,
minit tleirei tajiu pi typ nai ne.
19 Kai pachi pajawm nai thym y nang ly
takhra mang y hi pi vui ai nai ngo y a?
20 Khumichi ai khen patawm nai keung,
kai i kamngo my nang ai khrukhra naira tym hai lawh a?
Ati mana nai y kai ai nang i cham nai amthiura kamta teaung lawh mo?
Kai ly nang i vui khri pa-rei, ji nai myn kaji lawm lawh a?
21 Nang ly kai i kamngo pahen pi pajau y a?
Kai i sa tamang nai pahen pajau y nai sai a?
Kra y naimy kai ly tapreaung angawm y kasatla ai;
nangmy hau nai khala, kai kaawm ai ny y leaung bo.