6
Joba
1-2 Kai i ngari kamtangchi hawi paleung si paleung mawn naichi ai neh cham ai nabaly,
3 hunichi ly suida panglira i spryhchi tleaung y malawn py ji keh ai.
Hunai deaungkho y kai i thui ngaulau nai ly nang i vui lyh ai naira ne y.
4 Ati cheaungkhang sa thai nai Tameuh ly kai ai thailiho chyn hawi ko nai deaungkho y
chyn kamtlau ly kai i ngan tlang theung y num be bo.
Tameuh ly khri pa-rei jei ai hawi parai nai patangrachi, kai i tlang tleaung y tym hai ai nai khai yb bo.
5 Keaungngo kano kasau ly achachi cha ai nai nga baly,
paleung tuinem naimy awm.
Si py acha kajei cha ai nai nga baly awm u tliu bo.
6 Na i py ami nai ly palawi abawi y iy, amlyn y nai teicha teinei cha pajau ai mo?
Akadui kanai kangleung ly ati hawi amlyn ai mo?
7 Kai ly hina nai teicha teinei cha ai nai paleung ano y.
Kai i cha nai teicha teineichi ly kai ai amleu ano hai bo.
8 Tameuh ly kai i hnei naichi ai,
ati mana nai y pei y lawh mo?
Kai i chiu sa hnei takeng nai ai, ati mana nai pathang pi y lawh mo?
9 Mymy ly kai ai padei ai nai sa hai lawh ly!
10 Hina nai kamta, mymy sa ai na lawh teu baly,
kai ly patang naira khri pa-rei avum teu i py, amo theu naimy achaw ai.
Tameuh ly chai parai nai ne, nanai kapany bo.
Kai ly mymy i leu pei naichi, mana khala py akhi vai y.
11 Kai ly heng veangveang ai nai atho by y bo.
Kai ly athang khai naira by y pui naimy, ati mana nai kaheng veangveang ai mo?
12 Kai ly lengseaung lawh sai a? Kai i tlang ly kheupaja lawh sai a?
13 Kai teng y kaimy ai atleu pajau nai atho by y leang;
Kai ly paleung padora by y nai ne,
14 Vai i kamta patang naira tym nai neng khala, kai ly Tameuh ai khai su nai py ne sy,
khai su y nai py ne sy, ka-ym awm nai ahawichi ai aly ngai nai ne.
15 Na i py kai i ahawichi awi, nangchi ly kani nai y baly
tui kang reng nai tavo micheaung kamta, kai ai li-tapawp u bo.
16 Tuikhi hawi kadam tuichi ly tavo micheaung kawi na teu i py,
17 kani bi nai khala tama pawn nai deaungkho y,
tavo jeungrei tui by y naimy, phui rawm veng nai ne.
18 Hunai deaungkho y khuleaung chei nai khumichi ly tui hau nai tarawi y lam tamang i,
tui takang nai daichi ka-vym theung y dei u nai ne.
19 Seba mary hawi Tema marychi mang i jeu nai, khuleaung chei nai khumichi ly tui hau i py,
20 tui kang nai tavo micheaungchi naini avum nai deaungkho y, athang khai naira by y bo.
21 Nangchi ly huni tavo micheaungchi hawi atawm. Kai ly patang naira avum nai khala,
nangchi ly jei hyn iy anaw u pawn bo.
22 Kai ly nangchi teng i saisairei py, kang hnei vai y,
khumi leaung leaungrei ai, kai i vui un langseaung pei ai nai kai ai paleung ka-e, ti y baly ana patheng nai khumi leaungleaungrei teng i nai
23 atleu ai nai nangchi teng y kang thui pi vai sai a?
24 Kai ai nangchi my thui parip u; kai i angym y nai saichi thui pi u.
Kai ly nangchi i thui pi nai hawihai palai tangai ai.
25 Ka-ym awm nai leu ly sa thai naira awm;
na i py nangchi ly ati sai py ny y nai leuchi katheu u bo.
26 Nangchi my, kai i thui nai leuchi ly ali cheichei teu, nanai athang khai u lawh;
huna nai athang khai baly, kai paleung phra naimy katheu nai leuchi ai, ati mana nai nangchi ei u teang lawh mo?
27 Nangchi ly nuro nukai chochi ai malawn py,
miseaung palawn u ai nai tambe va iy, la ai nai khumichi ne.
Amychi nang chawn ai nai molam y ahawi kamrawichi ai malawn py, ka-jo ka-van sa ai nai khumi ne u lawh ly!
28 Kai i meimai khen u cham; kai ly ka-chawi thui ai nai khumi lawh sai a?
29 Nangchi ly anawn ai nabaly, anawn ai nai avo bo.
Avo akheang y nai leu thui u moh jau.
Kai i tlang tleaung y kamngo pajeng ai nai so u reng moh. Kai teng y kamngo by y leang.
30 Na i py kai ly ka-chawi thui nai ne.
Kai ly teng nai, teng y nai khawilang thai y, nanai nangchi athang khai u bo.