40
1-2 Joba awi, nang ly ati cheaungkhang sa thai nai Tameuh ai tiu lawh ly;
vai amnym pi vui ai a? ti y baly patheung ali teang ai a?
Joba
3-4 Aw Areng, kai ly ka-khum leu katheu lawh bo;
nang teng y ati mana kang pathang pajau ai mo?
Leu sairei py katheu bi ai nai, atho kaso y leang bo.
5 Kai ly leu katheu ai avo nai tleaung y, katheu panawi lawh veng bo.
6 Hunaibaly Areng ly alipui khupui theung mang, leu pei bi bo.
Areng
7 Vai, nang ly neampacho tatang ne i, angdo iy
kai i leu kangdeng naichi ai pathang ba.
8 Nang ly kai teng y leu meitang adyh adawi nai by y leang,
nanai pany hai nai ka-ma-ra patei ai nai atho sa ai a?
Nangmy mang kateng lawm ai nai, kai ai cheh nai sai a?
9 Nang ly kai kamta sa thai naira awm a?
Nang teng y kai i raawi kamta, kani pajyh nai katyn ka-tawm katyn awm a?
10 Huna nai katyn awm lawh teu i baly, nang ly tahm awm parai pa-rei amthyp ba;
nangmy ai sa thai naira haiho hawimy akhiu ba.
11 Nang ly amy i kado theu nai haiho patheu iy,
paleung len amlyh naichi ai khen patyp iy, panem pawn ba.
12 Nichi ai kamjau khai; khumi hawi y naichi ai
avum nai meingtym y tamyh pawn ba.
13 Huni khumi bawibawichi ai khaileaung y up iy,
tavau pri y kawm cheng ba.
14 Huna nai khala nang ly amy i haiho hawi eaung nai ne, nanai
nang ai tahm pasang manme nai keung ly kai ne ai.
15 Heng nai amjy pui Behamoth;note 40:15\xk heng nai amjy pui Behamoth: phyreichi my ly tui keaungngo, napi. \x* ai khen cham.
Kai ly ni ai sa; nang ai py sa nai ne.
Ni ly si kamta acha cha i py,
16 ni i akeng ly khri pa-rei atho awm i,
ni i kajeu athovuichi ly khri pa-rei atho awm.
17 Ni i tamai ly saitleang keung kamta, angdo teng nai ne;
ni i phai athovuichi ly ham parai.
18 Ni i hiuchi ly kheupaja kamta tang iy,
ni i kheuchi ly tamo beangchi hawi atawm.
19 Ni ly kai i sa nai heng nai amjy bawibawichi theung y, lyh ai hawi parai na a!
Sa nai keung my naini, taphra pajau khyh.
20 Ni i sui tlai ai nai i vui y
daichi mawichi tlum tlai nai mawichira y achachi prau pi nai ne.
21 Ni ly acha aleng phreungchi anui y ambeu reng;
Aneaung kapanra i japang eumui reaung theung y aeung reng nai ne.
22 Tavo micheaung sahawi i aleng phreungchi hawi
paijeaung keungchi ly ni ai ka-khui pei nai ne.
23 Ni ly tui ho nai tavo ai jei y, my i meimai y
Jordan tavo tui kaho leaung hai nai khala py, amchyh y naimy awm.
24 Ami nai ly ni i mei paju hai iy patiu pajau ai mo?
Ti y baly ni i notareang kamsui ai deaung pateung iy, patiu pajau na a?