39
1 Nang ly sumpajochi cho tapen nai neng pany a?
Sisiunu i cho tapen nai ajeng iy khen vai a?
2 Nichi i po num nai lochi kati pajau a?
Mana khala cho tapen ai mo, nanai nang pany a?
3 Nichi ly mana khala oh iy,
mychi i chochi tapen ai nai nang pany a?
4 Nichi i chochi ly adym angdengra y len ryh len ryh nai khala,
theu iy nichi i amhmchi teng y vawi u ali teang y.
5 Keaungngo kano kasau karamchi ai,
mychi ngai ngai awm ai nai ami my pei mo?
Nichi ai mychi ngai ngai tlai ai nai ami my pei mo?
6 Kai ly daichi ka-vym hawi, nichi i awm naira
palawi sau nai adym y, nichi sui tlai ai nai pei pi bo.
7 Nichi ly katyn kapau tukalula nai marychi ai asyn reng;
nichi ai ami py amjeaung pa-rei sa iy, kalop so hai thai y.
8 Nichi ly acha kanghengchi hau naimy,
mawi aheungchira y tlai u reng nai ne.
9 Paino kasi ly nang i kalop sa hai ai nai ngai na a?
Vum y nang i taipumra y awm ai nai ngai na a?
10 Nang ly ni ai li thawnra abang ai nai, vuinawn hawi thang pajau na a?
Ti y baly nang i li thawn hai pajau na a?
11 Nang ly ni i atho len nai ai a-ym pajau a?
Nang i kalop kalen ai ni teng y au pajau na a?
12 Ni ly nang i choh tawn pi iy,
talang prang i nai chohpaira tawn pi na a?
13 Tavo kula-iu ly my i pakhichi takhym nai khri pa-rei pala parai na!
Na i py Obeaung asang kamta akheang pajau y leang.
14 Tavo kula-iu ly khaileaung y kadui iy,
khaileaung kathau kamhui kabi nga ai nai, kadui ai khai su reng.
15 Nichi huni kaduichi ai kheu hawi chiu lawh ai,
mawi kasi my taphra pi vui ai, nanai dawn pany thai y.
16 Huni kaduichi ly my i kaduichi ny y nai kamta sa iy,
ni ly my i sa akawm nai kamran awm ai ny y, nanai mawn y.
17 Ni ai akhum hai iy,
cheng naira pei y nai keung ly kai ne.
18 Na i py ni i angpreng nai khala ly mani keaungngo hawi
keaungngo risa ai malawn py, panui hai pajau ai.
19 Joba awi, keaungngochi ai atho awm hai iy,
kaneaung mui kasauchi ai ka-pu sa pi nai keung ly nang ne a?
20 Nang ly nichi ai akhutamachi kamta ampyh hai iy,
noseng eng nai katyn hawi, khumichi ai angtheng hai bo.
21 Nichi ly leaunghawichi theung y khaileaung ai, muiken hawi kalai u reng a?
Atho haiho awm nai ngierei hawi py, tavai keung y angpreng u reng nai ne.
22 Nichi ly jei hyn ai nai leaungsai pany y;
mani haisau tamo py, nichi ai paka pajau y.
23 Keaungngo risachi syn nai tavai ateaungchi ly ha harei hawi teaung iy,
katyn theu nai ly kani kangvangra y sadi nanai ne.
24 Keaungngochi ly takoho naimy, mo mang y athorei my angpreng u reng.
Baw eng nai khala nichi ly awm py thai y leang bo.
25 Nichi ly baw katyn thai nai tleirei, noseng eng u reng;
kamlo mang my tavai atiu nai katyn patawm thai;
tavai luchi i aeu iy leu pei nai raawi thai u nai ne.
26 Ahmsi ly nang teng y tau kacheng la iy, akheang nai amtiu i,
tokalawi mang y akheang jo sai a?
27 Amhmtlau ly mawi ka-sangchira y tabu sa ai nai molam,
nang i leu pei nai ajeng reng a?
28 Nichi ly asang parai nai lengseaungchira y tabu sa iy,
mawi saleungchi ai, my i amtangra palawn reng nai ne.
29 Ni ly huni meingtym y awm iy, cha ai nai mawi ai khen i,
kamlo mang my niu.
30 Amhmtlauchi ly kadeichi awm naira y akheang u reng.Ref 39.30: Mt 24.28; Lk 17.37
Amhmtlau chochi ly mawichi i thi pajaw reng nai ne.