37
1 Alipui khupui ly kai ai paleung ahyn hai thlyh thlyh na bo.
2 Nangchi bawibawi ly Tameuh i raawi, napi nai
mymy i leu kani pajyh nai katyn tangai u.
3 Mymy ly khaileaung katemra khrairei,
kani khusang mang tako prei iy amlosadi theu hai bo.
4 Naibaly huna nai amlosadi theu nai thym khala,
phum-ang hawi kawi angym nai katyn
kani pajyh nai thai na bo.
5 Tameuh my leu pei nai khala, rengrang naichi hawi
achi pany thai y na pa-rei, lyh ai hawi parai naichi theu hai bo.
6 Mymy ly kadam amaichi khaileaung salo y tla hai ai nai leu pei.
Kani py khri pa-rei taawi hai nai ne.
7 Mymy ly khumichi ai kalop anawn hai vui bo;
mymy i sa thai naira haiho, khumichi pany ai nai patei pi.
8 Daichi mawi kasichi ly mychi i khaileaung kho theung y kun iy, aeung u bo.
9 Ali kamchai ly tokalawi ngan mang dengdai khri pa-rei savai nai ali ly
tosyh ngan mang dengdairei theu reng nai ne.
10 Tameuh my hm nai ali deaungkho y tui amkhan vui i,
tui kamkhan prangpui lawm bo.
11 Amlosadichi ly Tameuh i ngai nai kamta amki iy, khupanymchi theung i nai sadi nai ne.
12 Huni amlosadichi ly
khaileaung pri verei y
Tameuh i leu pei nai kamta sa u nai ne.
13 Tameuh ly khaileaung salo y tui nga ai nai kani nai hai bo;
mymy ly khumichi ai kamngo pajeng ai nai py ne sy,
hawi hai ai nai py ne sy, kani nai hai nai ne.
14 Joba awi, tanareichy kaneu iy, tangai kyh rai ba;
Tameuh i sa nai lyh ai hawi parai naichi adawn pasym ba.
15 Tameuh ly ati mana leu pei iy,
khupanym theung mang amlosadi theu hai nai mo, nanai nang pany a?
16 Tameuh i lyh ai hawi parai nai kupe lasa napi nai khupanymchi ly
kani khusangra y ali hawi akheang naimy, awm nai sai nang pany a?
17 Pany pajau y; nang ly khaileaung y tokalawi ali aho nai kamta,
kabi kamhui naini avum pajau khyh nai ne.
18 Nang ly kani khusang kadai ai nai Tameuh ai sabawm pajau a?
Huni ai kheupaja kamta amchai iy,
tang na pa-rei so pajau na a?
19 Tameuh teng y ati mana hnei ai mo, nanai kaichi ai patiu pi ba;
kaichi ly cheng naira by y nai deaungkho y, kahnei u kawp y.
20 Kai ly Tameuh teng y hnei takeng ai nai vam y;
huna nai hnei nai molam y, kai ai tamyh vui ai nai sa thai naira mana pei ai mo?
21 Vai ly kani mang y kangvang ly achi i mei
phawnja na pa-rei amchai parai nai ne;
kani khusang ly ali aho nai deaungkho y, tamaichi chaipyn na bo.
22 Tosyh ngan mang y muku an aleaung nanai
Tameuh i nang parai nai sai ly ka-jei awm nai ne.
23 Tameuh i sa thai naira ly len parai nai deaungkho y,
achi ly mymy sahawi y ahihawi pajau y;
Mymy ly khumichi hawi amkawm naira y, leu meitang adyh adawi hai nai ne.
24 Hunai deaungkho y khumi bawibawichi ly mymy ai jei kaji naimy tahm khai u bo.
Mymy ly amymychi ai khumi kacheng ne,
nanai thui naichi ai tahm pateng pi y nai ne.