36
1-2 Tameuh i jeng y kai i thui nai leu ai kham tanga naimy
maidenreichy tangai pi bi rai.
3 Kai i cheng naira ly kau parai; kai ai sa nai keung Tameuh ly
meitang ne, nanai kai i cheng naira teaung iy thui pi ai.
4 Kai i thui nai leuchira y, teng y nai leu abawi y;
meitang khyp, khumi kacheng leaungrei ly nang i mo y ang tym bo.
5 Tameuh ly khrikhri pa-rei sa thai naira len parai na ly!
Mymy ly ami ai py cheh y; mymy i pany y nai ati sai py by y.
6 Mymy ly kamngo sa nai khumichi ai, heng sau ai nai pei y;
khumi kamawnchi ai kateng chih pi nai ne.
7 Mymy ly khumi kahawichi ai kry.
Nichi ai samrangchi kamta peang hai iy,
tahm pasang jojo.
8 Na i py khumichi ly mychi i sa tamang nai molam y,
sengkry hawi pakheng nai avum iy, ngari kamtang avum u nai khala,
9 Tameuh ly nichi i kamngochi hawi, amlyh am-e nai pany hai bo.
10 Mymy ly nichi teng y mymy i pany hai nai tangai iy,
kamngo asyn hai bo.
11 Nichi ly leu tangai iy Tameuh i kalop sa u lawh teu baly,
heng nai sala ryrei nang chawn iy, tlamsa naimy awm u nai ne.
12 Na i py nichi leu tangai u y lawh baly, cheng naira by y naimy dei iy,
tavau pri y ang vum u ai nai tla.
13 Tameuh by y nai khumichi ly kado theu kari theu u jo nai ne;
kamngo pajeng naira avum nai khala malawn py, mymy teng y kasabawmra hnei u y.
14 Nichi ly saneng nau khala malawn py, tahm anem naichi lawm iy
atho bai naimy dei u nai ne.
15 Na i py Tameuh ly khumichi ai no patang nai hawi parip iy,
ngari kamtang hawi nichi i mei angvang hai bo.
16 Tameuh ly nang ai patangra i nai atleu iy,
chymme naimy awm ai nai pei i,
nang i sabawi salo y cha kahawi, nei kahawi neangneangchi ang khai pi chawp nai ne.
17 Na i py vai, nang ly nangmy nga ai ataing nai, kamngo pajengra avum naimy awm bo.
18 Un langseaungchi my parawi paryp naira avum y ai nai adawn patyp ba.
Yhmtheaung katuichi molam, teng y nai lam mang y tako vui lawh moh.
19 Kasabawmra nga ai nai vo naimy hnei nai ly nang i vui kamran awm ai ny y;
Nang chawn nai haiho ngierei ly nang ai vai, atleu pajau y leang.
20 Khumi cheng bawibawichi myh kang vui ai nai,
vum aneng ai kadeaung moh.
21 Hawi y nai asyn vui ai nai dawn patyp ba;
huna nai asyn vui ai nai,
Tameuh ly nang ai ngari kamtang avum hai nai ne.
22 Mymy i sa thai naira ly mana tanrei len na mo, nanai pany jo ba;
Tameuh ly cheaungkhangchi i, len keh nai sara ne.
23 Ami py Tameuh ai pacheang pajau y;
mymy ly hawi y naira sa, nanai neng hai pajau y.
24 Tameuh i sa nai saichi molam y, mymy i tahm awm nai ai
khumichi my avawrei palo u.
25 Mymy i sa nai saichi ai khumi luteng my niu u;
na i py achi ly kamlo mang my niu pajau nai ne.
26 Achi ly Tameuh i nang parai nai sai pany bawi pajau y;
27 Khaileaung salo i tui la iy,
kani amaichi lawm hai nai keung ly Tameuh ne.
28 Mymy ly khumichi chawn-pa ai nai
khupanym mang my kani nai hai bo.
29 Mymy i awm nai kani mang y khupanymchi akheang nai hawi
kani pajyh nai ly ami py pany pajau y;
kani mang y awm nai Tameuh ly pany nai ne.
30 Mymy ly kani mang y amlosadi theu hai;
na i py pangli thiu parai nai meingtymchi ra y vengpam nai ne.
31 Hina nai kamta mymy ly khumichi ai pacho.
Nichi ai teicha teinei neangneang pei pi.
32 Mymy ly alipakang ai kiu hawi syn iy,
patyp naira y chawm hai khyp bo.
33 Kani pajyh nai katyn ly alipui khupui nai hai ai, nanai thai hai.
Hunai deaungkho y si, painochi ly alipui khupui nai ai,
nanai pany nai ne.