35
1-2 Joba awi, nang ly “Tameuh i mei keung y
kai ly kamngo by y nai khumi ne.
3 Kai i kamngo ly mymy ai ati rai naira tym hai mo?
Kamngo so y naimy awm nai molam y,
kai teng y ati hawi naira awm mo?,” nanai Tameuh teng y thui pi ai nai avo y.
4 Kai ly nang hawi, nang i ahawichi i leu ai pathang teang ai.
5 Kani mang y khen cham! Tamaichi ly mana tanrei asang na mo, nanai khen u cham!
6 Nang kamngo sa nai khala, huni kamngo my Tameuh ai ati sai py khrukhra hai pajau y.Ref 35.6-8: Joba 22.2-3
Nang i tamang nai sai nawi baly,
huni tamang naira my, mymy ai ati khrukhra hai pajau ai mo?
7 Nang ly kahawi sa nai deaungkho y, Tameuh ai sabawm pajau na a?
Tameuh ly nang teng i, ati kasabawmra py aly ngai y.
8 Nang i sa nai kamngochi ly nang kamta, khumichi ai patang naira tym hai pajau;
nang i kahawi sa naichi py, khumichi ai hawi naira nga hai pajau nai ne.
9 Khumichi ly ana naira avum nai khala, vo tangam naimy,
mychi ai sabawm ai nai khumi leaung leaungrei teng y kaau u nai ne.
10 Na i py nichi ly patang nai veng nanai thym khala,
athang khai naira pei pajau nai, sa nai keung Tameuh teng y ly ahihawi u y.
11 Nichi ly achi ai tawnbawichi hawi tavochi tleaung y cheng naira awm hai nai
Tameuh teng y ly ahihawi u y.
12 Nichi ly amlyh am-e iy, khumi hawi y naichi ne nai deaungkho y, sabawm naira nga ai nai
mymy teng y vo naimy hnei takeng u teu i py, Tameuh ly pathang pi y.
13 Huna nai vo u teu i py, nichi i vui kamran by y;
ati cheaungkhang sa thai nai Tameuh ly nichi ai niu y; nichi i raawi py thai y.
14 Joba awi, nang ly Tameuh ai niu pajau y, nanai thui;
kham naimy ajeng iy awm ba. Nang i sa nai ly mymy i mo y tym bo.
15 Tameuh ly kamngo pajeng vai y;
kamngo ai py dawndan y, nanai nang dawn bo.
16 Nang katheu veangveang baly, kamran by y leang;
nang ly nangmy ati thui nai mo, nanai pany y nai ly amteng bo.