20
Zawpha
1-2 Joba awi, kai i paleung ai pachei nai deaungkho y vai, kai ly awm pypy thai y i, kang pathang pi ai.
3 Nang i katheu nai leuchi ly khumi aniu y nai leuchi ne.
Na i py nang ai mana kang pathang ai mo, nanai kai pany.
4 Jangni jangkhawn y, khaileaung pri y
khumi awm angchei khala i dengdairei,
5 khumi hawi y nai ngiereichi ly neng kasau amo theu naimy, awm ai nai nga, nanai by awm y nai ly nang pany.
6 Ni i sa thai naira ly kani khusang y khrairei asang iy,
ni i lu py tamai y angteu na;
7 na i py ni ly spryh kamta ahei phro vui ai.
Ni ai pany nai khumichi ly
ni i tym nai meingtym deng iy, adawn pasym u ai.
8 Ni ly vum y amang amang nai kamta tami veng ai.
Khumichi ly mo mang y mana khala py, niu u ai ny y.
9 Ni ai niu reng nai mei ly niu ali bi ai nai ngo y ai;
ni ly my i meingtym i nai tama vui ai.
10 Ni i chapochi py, khumi kamawnchi teng i lawm vui nai vawnsaichi ai, pe u ali teang ai nai tla.
11 Ni i tlang ly ka-veang thym ngan tlang y awm vai teu i py,
kra y naimy spryh kamta lawm vui ai.
12-13 Ni ly hawi y sa nai ai, hawi pany nai deaungkho y
my i palai tleaung y khai iy khreip, nanai pa-rei hawi pany thai nai ne.
14 Na i py huni teicha ly kajeu theung y tym nai khala,
deira thailai kamta kho ai.
15 Khumi hawi y nai ly my i paviu nai vawnsaichi paleu ali teang ai.
Hunichi ai Tameuh ly ni i taku theung i nai patheu pi vui ai.
16 Khumi hawi y nai i pajawn nai ly dei asi atawm;
Huni ly pavui kangso my patiu nai kamta, ni ai dei hai ai.
17 Ni ly olive asitui leaung nai tavochi,
kanutui hawi khawihang leaung nai
micheaungchi niu ai ny y leang bo.
18 Ni ly my i lop-pan iy,
nga nai vawnsai ngiereichi ai khai su ai nai tla ai.
19 Ni ly khumi kamawnchi ai ana iy tahm khai y naimy, ami i sa yb nai
yhm hlauchi lawm vui nai deaungkho y, my i yhmtheaung katui amtym ai ny y.
20 Ni i ngai phi ala nai ly mana khala py dam pajau y.
21 Ni i cha nei nai khala, ati sai py kamlai khai vai y.
Hunai deaungkho y ni i yhmtheaung katui ly akan ai ny y.
22 Ni ly yhmtheaung katui khri pa-rei, nang chawn nai neng khala py,
paleung bi naira khrikhri pa-rei avum ai.
23 Ni i cha ai ngai nai ngierei cho palai sy!
Tameuh ly khri pa-rei kado theu nai y,
ni ai kamngo vang pajeng ai.
24 Ni ly tamo haisau bo i nai tleaung ai nai angpreng nai khala,
kheupaja thailiho hawi ko nai, prileu nai avum ai.
25 Thailiho chyn ly ni i tlang prileu vui ai;
amchai na nai thailiho chyn meaung i nai, thichi leaung ai.
Huna nai khala ni ly jei hyn naimy kaso theu ai.
26 Ni i pateung achu nai vawnsai ngiereichi ly tama pawn ai;
khumi my paeng y nai mai ly ni hawi ni i
yhm dengtheung bawibawichi ai kang vui ai.
27 Ni i kamngo ai kani khusang my patei iy,
khaileaung my pany hai ai.
28 Tameuh i kado theu nai neng kani y,
ni i awm nai vawnsai ngiereichi ly taphra naira avum ai.
29 Huni ly khumi hawi y naichi i khym taham ne.
Huni ly nichi i vui Tameuh my, khai pi yb nai khym taham ne.