21
Joba
1-2 Kai i leu tangai u; kai paleung awmnem ai nai
hina nai ryrei nga ai avo nai kang hnei nai ne.
3 Kai ai leu katheu ai nai pei u kyh;
kai katheu chum nai khala, nangchi panui hai pajau.
4 Kai hawi ajo nai ly khumi hawi ny y leang;
kai paleung sau pajau y nai molam y, kai teng y leaungsai kakhaw awm.
5 Ati mana kado theu y ai mo? kai ai khen u chum; kai i mo-cha ly
nangchi kiu hawi labeaung tamym vui ai nai pa-rei, kaso theu hai ai.
6 Kai ly kaimy i avum nai saichi adawn cham nai khala,
paleung phra athosi i, kaso theu na bo.
7 Tameuh ly ati mana nai khumi hawi y naichi ai
heng sau hai iy nang chawn hai lawh mo?
8 Nichi ly katu chanauchi nga u naimy, mychi i mei keung y
tleaungri acheang nai niu nai pa-rei, heng sau u bo.
9 Tameuh ly ni i yhm dengtheungchi tlang tleaung y patang naira tym hai y.
Nichi ly jei hyn nai avum u y.
10 Nichi i si, painochi ly peungryh peungryh nai ne.
Rai y naimy chochi tapen
11 Nichi i cho chanauchi ly beram chochi kamta, angpreng amau u.
12 Taro hawi byhlyh katynchi kamlym y lam u.
13 Nichi ly tlamsa naimy tlang tem pa-rei awm iy,
no patang naira avum y naimy awmnem i, dei u bo.
14 Khumi hawi y naichi my Tameuh teng y,
mychi my tlairei awm ai nai hnei u.
Mychi ai mymy ly mana heng ai nai ngai hai mo, nanai pany ai nai ngai u y.
15 Nichi ly Tameuh ai chiu ai nai ngai u y. Mymy teng y
chiu sa hnei takeng nai ly ati sai py ny y, nanai dawn u bo.
16 Nichi ly mychi i haiho hawi eaung naira nga nai ne,
nanai thui u.
Na i py hina nai thui nai ly kai ngai y.
17 Khumi hawi y naichi i maisi yhm, mai dei sai a?
Nichi ly mana khala patang naira avum vai mo?
Tameuh ly kado theu iy,
khumi hawi y naichi ai pajeng nai ne.
18 Ali my hm nai chohphi, ali lengli my pakheang nai choh ali kamta,
nichi teng y mana khala tym ai mo?
19 Tameuh ly ampo i molam y chapo ai pajeng bo, nanai nangchi thui u lawh;
huna nai ly avo y.
Tameuh ly kamngo sa naichi ai naini kamngo vang pajeng sy.
Nichi ai hina nai kamngo pajeng ai ataing nai ly mychi i sa tamang nai molam y ne, nanai pany u sy.
20 Kamngo sa nai khumichi ly ataing khyp nai kamngo pajengra avum u na sy.
Ati cheaungkhang sa thai nai Tameuh i,
kado katheu pajeng nai avum u ai.
21 Khumi ly tlang tem chum nai khala,
my i cho chanauchi i vui paleung mawn a?
22 Khumi ly kani mang ichi ai
tara chih nai Tameuh ai parip pajau na a?
23-24 Khumi phyreichi ly dei ai nai kani tym nai ryrei, no-na by y naimy awm u;
nichi ly amo theu iy paleung kabi by y nai
veung tlang hawi naimy dei u nai ne.
25 Khumi phyreichi ly pipi amo theu y i,
khri pa-rei paleung mawn naimy awm iy dei u bo.
26 Na i py khumi luteng ly dei iy khaileaung y a-up chum baly,
thaideaungchi my tabawm nai avum u bo.
27 Nangchi paleung angai y nai katauchi kai pany.
28 Nangchi my, “Huni kyh keh nai khumi hawi y nai i yhm ly
vai, ma y awm mo?,” nanai deng u.
29 Nangchi ly khuleaung chei nai khumichi hawi,
leu arum u vai y nai sai a?
Nichi my syn teang nai satangchi thai u y a?
30 Tameuh my kado theu i kamngo pajeng nai kani y,
khumi hawi y nai ly awmnem naira nga jojo nai ne.
31 Khumi hawi y nai ai thui tamawn nai khumi,
kamngo hawi kamlau parip ai nai khumi leaungrei py by y.
32 Ni ai tapreaungra tamcheaung khai iy,
tai yb nai angawm y pavum nai khala,
33 khumi sang neangneangchi ly ni i veu pavum u.
Khaileaungbuchi ly ni i veu salo y taphum hawihai bo.
34 Na i py nangchi ly kai ai ati sai py ny y nai leuchi hawi paleung pahawi u lawh ly!
Nangchi patheung u teang nai leuchi ly ka-chawi leu ne!