19
Joba
1-2 Nangchi ly leu khulym hawimy manatan pa-rei, kai i tlang tleaung y ana u ryry ai mo?
3 Nangchi ly kai i tlang tleaung y mei aniu y ryry naimy,
kangji kangai by y na pa-rei thui preaung u bo.
4 Kai, sa tamang lawh teu i baly, huni tamangra my
nangchi i tlang tleaung y, mana patang naira tym hai lawh sai a?
5 Nangchi my nangmychi ai kai tleaung y hawi, nanai athang khai iy
kai ly kamngo awm nai deaungkho y,
hini patang nairachi avum nai ne, nanai dawn u lawh.
6 Huna naichi sa nai keung ly Tameuh ne,
nanai nangchi pany u pajau y nai sai a?
Mymy ly kai ai patiu ai nai deaung pateung yb bo.
7 Kai ly mymy i khrukhra hai nai ai kaei i py
ami py tangai pi y;
leu meitang adyh adawi ai nai takeng i py, ami py thai y.
8 Tameuh my lam paka khyp nai deaungkho y,
kai tako prei ai nai ngo y.
Mymy ly kai i lam veng hai cheng bo.
9 Kai i yhmtheaung katui ngierei la pi pawn iy
kai i tahm py phra hai bo.
10 Mymy ly kai ai atlym hai ai nai cheaungkhangra mang ang sa.
Kai i athang khai naira ai
tangjyn raurei akyn vui i, kai ai jeirawm iy phra hai bo.
11 Tameuh ly khri pa-rei kado theu na i, kai ai ly
mymy i hawi y keh nai paleung ka-e kamta ang khai.
12 Mymy ly kai ai tiu ai nai, mymy i tavaimi pato bo.
Nichi ly tui apaichi tai iy, kai i kanih yhm ai taki naimy tiu u.
13 Tameuh ly kai i amjo amnauchi my,
kai ai ang khai su ai nai sa hai.
Kai ly kaimy i kamnychi mo y malawn py, apany vai y nai kamta lawm hai bo.
14 Kai ly amjo amnau hawi, ahawi ka-dawi py by y leang bo.
15 Kai i yhm y anga reng nai angvynchi ly kai ai tami u veng bo.
Kai i miseaung neampachychi my malawn py,
kai ai apany vai y nai khumi hawi, pri takhra khumi kamta palawn u.
16 Kai i miseaung ly kaimy palau nai khala pathang y;
kai ai sabawm ai nai, niteng y takeng i py ngo y.
17 Kai i aju ly kai i labeaung akam mui nai kham pajau y.
Kai i amjo amnau kypkypchi py, kai i sahawi y awm ai nai ngai u y.
18 Deaungdichi my kai ai niu baly, khumi aniu y nai sa iy panui hai bo.
19 Kai hawi amrawi keh nai ahawi ka-dawichi ly kai ai paso nai ka-dawn hawi khen u.
Kai i khrei keh naichi my malawn py,
kai ai ka-jo hau u.
20 Kai i ngan tlang ly hiu hawi peih awm khyh bo.
Kai ly dei y kyh nai khyh bo.
21 Kai i ahawichi awi! kai ai pahen nai paleung awm u!
Tameuh i kiu ly kai ai ang tabeang bo.
22 Nangchi ly Tameuh kamta,
ati mana nai kai ai pahyp y naimy ana ai nai ngai u lawh mo?
Kai i tlang tleaung y nangchi paleung akawm hai nai ly paleung anyp u y rai a?
23 Vai, kai i thui nai ai record khai iy,
kai i leuchi tajiu pi typ nai awm i khyly,
kangai parai!
24 Ti y baly kai i leuchi khaw hai jo ai nai, lengseaung phei tleaung y thiu iy,
tajiu pi typ nai awm i khyly kangai parai.
25 Na i py kangkhym y ly angjeu iy, asa hai ai nai keung ly
kani pri mang y awm, nanai kai pany bo.
26 Kai i ngan tlangchi ly angvawichi deaungkho y, veaung tlawn na teu i py,
kai ly hini tlang hawimy Tameuh ai niu ai.
27 Kai ly kaimy i mei hawimy, mymy ai kaniu ai.
Kai ly ni i tlang tleaung y meimai ahangkam ai ny y.
Nangchi my,
28 “Ni i tlang tleaung y achi my ati mana ana ai mo?,”
nanai thui u nai deaungkho y, kai ly paleung phra atho di vui bo.
29 Na i py nangchi ly haisau tamo nga ai nai jei u bo.
Tara chih nai keung leaungrei awm,
nanai nangchi pany u ai nai Tameuh i kado theu nai ly
haisau hawi pajeng reng nai ne.