15
Pa-nyh i Arum Nai
Eliphe
1-2 Nang ly ati sai py ny y nai leu katheu lawh; Joba awi! nang ly ati sai py ny y nai leu katheu lawh ly!
3 Mani khumi kacheng py nang kamta,
katheu ai ny y.
Hina nai ati sai py ny y nai leuchi ly nangmy ai ama hai ai ny y.
4 Amychi ngai nai kamta sa pajau ai nabaly,
ami py Tameuh ai tahm khai naimy jei kaji ai ny y .
Ami py mymy teng y chiu sa u ai ny y leang bo.
5 Nang i hawi y nai sai ly nangmy i katheu nai leuchira my amteng nai ne.
Nang ly leu ali alawi katheu kawp naichi hawimy abyh iy awm bo.
6 Nang ai kang thui tamawn ai nai ngai y;
nangmy i katheu nai leu my,
nangmy ai ang thui tamawn nai bo.
7 Nang ly tapen manme nai khumi a?
Mawichi ai Tameuh my sa nai thym khala, nang ly awm a?
8 Tameuh i sa nai ka-dawnchi nang thai sai a?
Nangmy leaungrei tau cheng khyh a?
9 Nang i pany nai ngiereichi, kaichi py pany teang.
10 Kaimychi i tau cheng nai ly nang i ampo tleaung y saneng len nai khumi,
sam pau nai khumichi teng i amtiu nai ne.
11 Nang i tlang tleaung y Tameuh my paleung ang pahawi nai ly ati mana nai y akhi vui lawh mo?
Kaichi ly mymy i jeng y,
nang ai leu kanemchi kang thui pi bo.
12 Ati mana nai y nang ly paleung kaso theu naimy kado theu iy,
kaichi ai khen seaungphai lawh mo?
13 Tameuh ai ati mana nai kado theu hai iy, hina nai katheu lawh mo?
14 Khumi ly meitang khyp, kamngo by y a?Ref 15.14-16: Joba 25.4-6
Ami nai Tameuh i mo y khumi kahawi lawm pajau ai mo?
15 Tameuh ly mymy i kani pri amtaw thau naichi ai malawn py, ym y nai ne.
Nichi malawn py, mymy i mo y kamngo by y naichi ny y.
16 Khumi ly kamngo ai tui kamta teaung reng;
khumi ly meitang khyp, hawi y nai sa reng i, amso ngai ai nai hawi.
17 Joba awi, vai, kai i pany nai kamta, kang thui pi nai tangai ba.
18 Khumi kachengchi ly mychi i amsi pajochi teng i dengdairei,
amtiu nai leu meitangchi ai
apha y naimy kai ai patiu pi nai ne.
19 Nichi i awm nai pri y, cheng takhra khumichi by y nai deaungkho y,
nichi ai Tameuh hawi taprei vui ai nai, khumi leaungrei py by y.
20 Khumi takhrachi ai pahyp y naimy ana reng nai, khumi hawi y naichi ly
heng nai sala ryrei y patang naira avum ai.
21 Ni ly ka-jei awm nai raawichi thai naimy, phrumai by y leaung bo, nanai
athang awm nai neng khala y, kangviu damrachi my tiu nai avum ai.
22 Khumi ai padei nai keung ly ni ai ajeng rym nai ne i,
ni ly kaveng theung i nai law tleaung ai nai athang khaira by y.
23 Langnachi ly ni i veu cha ai nai, ajeng u rym nai ne.
Ni ly mymy khym taham kasi avum ai, nanai apany.
24 Tavai atiu ai nai angveirym nai samrang kamta,
ka-jeira my ni ai tiu ai nai ajeng rym nai ne.
25 Hini ly Tameuh ai kiu pahyn nai khumi,
ati cheaungkhang sa thai nai keung ai amtang nai khumi i,
avum ai nai khym taham kasi ne.
26-27 Huni khumi ly paleung len i tiu bo;
paleung tang naimy amy i khupui syn iy,
Tameuh ai tiu ai nai angpreng bo.
28 Ni ly marychi hawi yhmkeungchi preang pawn iy,
khai su nai yhmchira y athum bo.
Na i py huni mary, huni yhmchi ly tavai takai molam y phra ai.
29 Ni i nang chawn nai ly akan ai ny y;
ni i amtym nai mani yhmtheaung katuichi py akan ai ny y.
Ni i pa-pui malawn py tama vui ai.
30 Ni ly kaveng theung i nai tleaung ai ny y.
Changpichi ai mai my kang iy,
pauchi ali theung y akheang pawn nai
dengkeaung keung hawi atawm ai.
31 Ni ly hawi y naira ai a-ym iy, ka-khum sa lawh baly
ka-mang lai naini amtym ai.
32 Ni ly neng tym y naimy jeirawm vui ai; dengkeaung changpi kamta
deirawm naimy, mana khala py sai angpho ai ny y.
33 Ni ly myn y rai khala athai vui taru nai kreip angjyn hawi,
pauchi vui pawn nai Olive keungchi hawi atawm ai.
34 Tameuh by y nai khumichi ly katu chanauchi sa u ai ny y.
Un tangka hawi yhmchi ly mai y kang vui ai.
35 Nichi ly amichi ai patang hai ai nai dawn tau naimy, hawi y sa nai khumichi lawm u ai.
Nichi i paleung pathym ly avawrei li-tapawp nai hawimy kawi nanai ne.