14
1 Khumichi ly tapen khyp khala i dengdairei atho di u i,
jeaungmang u nai ne.
Nichi ly deung dawi iy, patangra y awm u joja nai ne.
2 Nichi ly kaseaung kamta pau kasa iy, rawm u bo.
Pa-pui kamta tama u reng nai ne.
3 Aw Tameuh, huna nai khumi, kai ai khen patyp i,
tara jeung y chei iy pajeng ai a?
4 Chai y nai khumi theung i, ami nai kachai patheu pajau ai mo?
Ami py patheu pajau y.
5 Khumi ly saneng majirei heng sau ai mo,
lo majirei awm ai mo, nanai khai pi yb nai ne.
Hunichi ai mymy pasym pi yb nai deaungkho y, palai vui pajau y.
6 Ni teng i nai meimai hi vui iy,
my tlairei naini awm hai khyh ba.
Tham nai khumi kamta, kalop ram sa iy awmnem pajau ai nabaly, awmnem ai nai pei kyh ba.
7 Paliu vui chum nai dengkeaung ly athang khai naira awm rai;
huni ly chethe pati iy heng ali teang pajau.
8 Khaileaung theung y tangjynchi ly tangym iy,
miukhiu dei teu i py,
9 tui lei pi baly keung dichy kamta sai pati ai.
10 Na i py khumi ly dei baly, tama pyn ryp veng nai ne.
Dei nai bo y ni ly ma mang y awm mo?
11 Tui leaung y nai tavochi hawi,
tui kang vui nai tuikanchi kamta,
12 khumichi ly dei nai bo y ang thau u bi y leang bo.
Kani khusang awm jo nai ryrei ly nichi anglaw u ai ny y.
Nichi ly i-ngym naira i,
mana khala py ang thau u ai ny y.
13 Mymy ly kai ai tavau pri y heu vui sy.
Nang i kado theu nai rym nai ryrei, kai ai heu vui sy.
Hunaibaly kai ai pany jo ai nai, neng khai pi takhra sy.
14 Khumi dei nai ly heng rai na a?
Na i py kai ly awm nai sai neng kahawi ajeng ai.
Hini ngari kamtang tym nai neng katlen vui nai pa-rei ajeng ai.
15 Hunaibaly mymy ly kai ai palau nai khala, pathang pi ai.
Huna nai khala mymy ly mymy i sa nai kai ai ang khrei ai.
16 Hunaibaly mymy ly kai i kheukan ngiereichi ai khen patawm nai ne.
Na i py kai i kamngochi ai kheulawi padyh iy,
ang khen patawm ai ny y.
17 Mymy ly kai i kamngochi lawi hai iy, ang pahen pi ai.
Kai i sa tamang nai ngiereichi, tama hai pawn ai.
18 Mawichi anawi iy lengseaungchi
asyh pawn nai neng tym ai.
19 Tui ly lengseaungchi tlum hai nai kamta,
khri pa-rei taawi nai kanitui ly khaileaung kalum kathau leaung hai pawn nai kamta,
mymy ly khumichi heng ai nai, athang khai naira tama hai pawn bo.
20 Mymy ly khumichi ai pajau iy, tama hai jo nai ne.
Khumi ly dei nai khala, meimai aneaung vui bo.
21 Ni i chapochi ai tahm pasang nai ai ni ly mana khala py pany y.
Nichi tahm anem u nai khala py, ni ai thui pi ai nai ngo y.
22 Ni ly ngan tlang no nai hawi
paleung si paleung mawn naira naini avum nai ne.