16
Joba
1-2 Hina nai leuchi ai vaichi khala kathui reng nai ne.
Nangchi i paleung pahawi nai ly pahyp y naimy ana naira naini lawm bo.
3 Nangchi ly avawrei hina nai thui ai nai ngai u a?
Avawrei leu kamjau katheu ai nai ngai u lawh a?
4 Kai ly nangchi hawi meingtym angtheung ai nai nga lawh teu i khyly,
nangchi katheu u nai kamta ly kai py katheu pajau nai ne.
Kai ly khumi kacheng kamta, kaimy i lu heng naimy
nangchi ai leu angdeungra anum hai pajau.
5 Kai ly nangchi ai tau kang pei iy, kang khaw hai pajau;
Nangchi awmnemra nga u ai nai avawrei katheu pajau nai ne.
6 Na i py vai, ati mana mo, nanai kang thui pi teu i py, kamran by y.
Kaawm pypy teu i py, kai i no patang naira dam ai ny y.
7 Aw Tameuh, nang ly kai ai patang hai bo;
kai i yhm dengtheungchi ai tama hai pawn bo.
8 Nang ly kai ai patiu vui bo; nang ly kai i paleung ka-e lawm bo.
Kai teng y hiu hawi peih naini awm khyh bo.
Hini molam y thui ai nabaly,
khumichi my kai i tlang tleaung y kamngo awm, nanai thui u nai ne.
9 Tameuh ly kado theu nai deaungkho y, kai i kiu kheuchi ai leng pawn veng bo.
Mymy ly niu ngai y nai paleung hawi, kai ai khen kalingie nai ne.
10 Khumichi ly kai ai cheh;
taki kaleuteu iy kai i tangbeng ai tabeang u.
11 Tameuh ly kai ai khumi hawi y naichi i kiu y au bo.
12 Kai ly awmnem naimy kaawm;
Na i py Tameuh ly kai i kaneaung taau iy,
ang khyh ang pakhau piu bo.
Tameuh ly kai i tlang tleaung y acham ai nai amthiura palawn iy,
13 khuteng taki palyh dengdairei, thailiho hawi ang ko;
Huni thailiho chynchi ly kai ai prileu na pa-rei, tamo nga hai bo.
Na i py mymy ly kai ai pahen y leang rai.
14 Mymy ly kai i tlang tleaung y, avaw avawrei tamo nga hai.
Niu ngai y nai paleung hawi, kado theu thi phui nanai tavaimi sorai kamta, mymy ly kai ai ang tiu bo
15 Kai ly paisiu kanih amchiu iy, vo tangam bo;
sum naimy khaileaung spryh theung y ateh ai nai tla bo.
16 Kai ly meimai paleang na naimy meichi bau iy,
mei tengchi panum na pa-rei, kavo ai nai tla bo.
17 Na i py mani khrukhra nairachi py,
kai so y leang.
Tameuh teng y py paleung kahawi naimy chiu kasa nai ne.
18 Khaileaung awi, kai i tlang tleaung y tym nai, teng y nairachi tamym vui moh!
Adyh adawi naira nga ai nai kai i aeu nai raawi py anawn hai vui moh!
19 Kai mang y asa hai naimy angdo hai kalingie iy, Ref 16.19: Joba 19.25
pany hai nai keung ly kani pri mang y awm.
20 Ahawi kamrawichi ly kai ai cheh u;
Kai ly Tameuh i mo y meikatui tla naimy kaawm bo.
21 Amy i ahawi ka-dawi i vui y awm hai nai khumi kamta, kai i vui Tameuh teng y
ama hai ai nai khumi awm hai i khyly, kangai parai.
22 Kai i heng ai nai sanengchi ly vai, maidenreichy awm khyh nai deaungkho y,
kai ly vawi lam by y nai meingtym mang y, khuleaung amsa nai ne.