13
1-2 Huni i awm nai saichi,
vaichi khala kai thai reng nai ne.
Huni bawibawichi kai pany; nangchi pany nai ryrei kai pany.
Kai ly nangchi tleaung y theang nai ny y leang.
3 Na i py kai ly nangchi hawi aei nai ny y;
Tameuh hawi naini a-ei nai teu.
Kai ly kaimy i sa nai sai, mymy teng y amti pi ai ngai.
4 Nangchi ly nangmychi i, tau cheng naira by y nai ai ka-chawi leuchi hawimy tamym u bo.
Nangchi ly mani khumi kano ai py, no hawi pa-rei so thai y nai asi sara hawi atawm.
5 Awm u pypy; huna khala naini nangchi ai khumi kachengchi ne, nanai khumichi my pany u ai.
6 Kai i sa nai sai amti nai neng khala tangai u.
7 Nangchi ly ati mana nai y.
ka-chawi leu thui u lawh mo?
Nangmychi i ka-chawi leuchi ly Tameuh ai amo theu hai ai, nanai athang khai u a?
8 Nangchi ly Tameuh mang y asa naichi ne u a?
Mymy i sa nai sai molam y, tara jeung y seu u ai a?
9 Tameuh ly nangchi i tlang tleaung y hawihai palai ang chih lawh baly,
nangchi teng y hawi naira sai sairei niu na a?
Nangchi ly khumi ai li-tapawp nai kamta,
Tameuh ai li-tapawp pajau ai, nanai athang khai u a?
10 Nangchi ly nangmychi i milei nai sai ai tamym teu i py,
Tameuh ly nangchi ai ang parip ai.
11 Mymy i sa thai naira ly nangchi athengra iy,
kaso theu hai ai.
12 Nangchi i leu kachengchi ly maidym kamta,
ati sai py ny y.
Nangchi i akhi nai leuchi ly aneaung kapan kamta khaw y.
13 Nangchi awm u pypy ly kai ai leu katheu ai nai pei u;
huni bo baly kaimy rara ne sy.
14 Kai ly kaimy i tlang areu ai nai angchi yb teu bo.
15 Kai i vui ly athang khai naira by y bo i,
Tameuh my kai ai dei hai teu i py, ati sai py ny y ai.
Kai ly kaimy i sa nai sai, mymy teng y pany hai ai.
16 Mani khumi hawi y nai py ne sy,
Tameuh i mo y amteng vam y nai deaungkho y,
kai i vam nai sai ly lawira lawitleaung netaing ne lym ai.
17 Kai i thui pachai nai leuchi tangai u.
18 Kai ly kaimy mang teng, nanai apany nai deaungkho y,
kai i sa nai sai amti pi ai nai, angveirym yb nai ne.
19 Aw Tameuh, nang ly kai ai hawi y, nanai neng hai ai a?
Huna ai nabaly kai ly awm pypy iy dei ai nai angvei yb bo.
20 Aw Tameuh, kai i hnei takeng nai sai nyhrei ai pei kyh ba.
Hunaibaly nang i mo i nai kai ly aheu vui ai nai atho so y leang bo.
21 Huni nyhrei ly kai i tlang tleaung y kamngo pajengra i nai anawn pi ai nai hawi, ka-jeirachi kai ai pajei pahyn y ai nai kang takeng.
22 Aw Tameuh, nangmy leu pei manme ba;
kaimy kang pathang teang ai.
Ti y baly kai ai takeng manme ai nai pei iy, nangmy pathang pi ba.
23 Kai ly ati kamngochi hawi tamang naichi kasa nai awm lawh mo?
Kai i tlang tleaung y ati kamngochi hawi neng hai ai mo?
24 Nang ly ati mana nai,
kai teng i nai meimai hi pi vui lawh mo?
Ati mana nai y paleung ka-e kamta, kai ai dawn lawh mo?
25 Nang ly kai ai ati mana nai pajei lawh mo?
Kai ly dengkeaung ngamchy teu;
nang ly chohphi kajei ai tiu nai ne.
26 Nang ly kai ai khri pa-rei ka-awi sa ai nai atho sa bo;
kai deaungdichy khala i sa tamang naichi molam y neng hai bo.
27 Kai i kheu ai deaungki thiu i;Ref 13.27: Job 33.11
kai i kheukanchi khen patawm iy
kai i kheulawichi ai malawn py, khen patawm nai ne.
28 Hunai deaungkho y kai ly dengkeaung karaw kamta py,
mipo my cha nai ateaung kamta py, deihpiu na bo.