12
Joba
1-2 Nangchi aeu u nai ly khumichi i aeu nai raawi ne.
Nangchi dei nai khala, tau kacheng py nangchi hawi vanrei tama ai.
3 Na i py nangchi ka-tawm,
kai py tau cheng nai ne.
Kai ly ami mana mo i py, nangchi tleaung y theang y leang.
Nangchi thui nai leuchi ai ly khumi lutengchi my pany.
4 Vai ly kai i ahawi ka-dawichi my malawn py,
kai ai ang panui hai bo.
Kai ly hawi nai ne iy, kamngo by y nai khumi lawm i py, kai ai nichi my panui hai.
Na i py vaichi khala, Tameuh ly kai i chiu sa hnei takeng nai ang tangai pi reng nai ne.
5 Ngari kamtang avum y nai khumi ly kai ai thui preaung u bo.
Atheng nai khumi ai atlym pa-rei nui u moh.
6 Kangviu damrachi hawi tameuh by y nai khumichi ly mymychi i atho haiho naini,
a-ym nai khumichi ne i py, tlamsa naimy awm u nai ne.
7 Tavochi hawi tawnbawichi teng i malawn py,
nangchi amtiu ai naira neangneang awm.
8 Kacheng mawi, tui mawichi teng i cheng naira hnei u.
9 Nichi bawibawi ly mymychi ai Areng my sa nai ne, nanai pany u.
10 Heng nai amjy cheaungkhangchi i,
hengra lam patei nai keung ly Tameuh ne.
Khumi luteng i hengra ly mymy i kiu tleaung y awm.
11 Na i py palai ly teicha teinei pateang nai kamta,
kano py leu raawi tangai patawm reng nai ne.
12-13 Miteaung acheang naichi ly tau cheng naira angym;
na i py Tameuh ly tau cheng naira hawi, sa thai naira angym nai ne.
Tameuh ly pany thai praw nai cheng naira hawi
sa thai naira haiho angym nai ne.
14 Tameuh my taphra nai ai ly ami my sa palum teang thai ai mo?
Tameuh my kawm nai khumi ai ly ami my su pajau ai mo?
15 Tameuh my kani nai hai y baly kani khang.
Kani khri pa-rei taawi hai baly tui len nai ne.
16 Tameuh ly sa thai naira haiho len parai nai deaungkho y,
eaung naira nga hai jojo.
Tapawp nai khumi hawi, katapawpra avum nai nini leaung nyhrei malawn py,
mymy i kiu tleaung y awm.
17 Mymy ly peang nai keungchi ai, tau cheng naira dyhp hai iy,
mipui i lu sa naichi ai kamthu kamta sa hai bo.
18 Samrangchi ai samrang i nai pala iy, paeung vui bo
19 Pathyp pi nai keungchi hawi sa thai naira haiho awm nai khumichi ai panem vui bo.
20 Ka-ym awm nai khumichi i labeaung tamym vui iy,
miteaung ka-cheangchi i tau cheng naira la pi veng bo.
21 Sa thai naira awm nai khumichi ai kangji pei iy,
mangchochi i haiho jum hai bo.
22 Mymy ly vengpang nanai meingtymchi ai angvang hai.
23 prichi ai len hai iy khaw hai;
na i py nichi ai sum hai iy phra hai bo.
24 Mymy ly mipui lu sa naichi ai ka-khum lawm hai chum baly,
tawm-mo pany hai y i, lam tamang iy ajau hai.
25 Nichi ly kaveng theung y patham iy, mhm-rah nei ala naichi kamta,
tapai tamang naimy tako u bo.