11
Zopha
1-2 Leu neangneang katheu nai ly tlau y naimy awm ai nai avo na a?
Leu peung nai tleirei ly amy i kamngo lawi pajau na a?
3 Joba awi, kaichi ly nang ai leu pathang teang pajau na a?
Nang i katheu ngaulau nai molam y kaichi awm pypy ai,
nanai nang athang khai a?
4 Nangmy, “Kai i katheu nai leuchi ly teng;
kai ly Tameuh i mo y kamngo by y,” nanai thui lawh.
5 Tameuh my nang ai leu pei teang ai nai kangai hai lawh ly!
6 Mymy i cheng nai ly thiu parai nai sai, khumichi i cheng naira hawi pho pajau y na pa-rei,
thiu parai naichi ly nang teng y ang thui pi ai mang.
Tameuh ly nang i tlang tleaung y pajeng ai ataing nanai teu i py,
nang ai kamngo pajeng nai ly di hai ai.
7 Nang ly Tameuh i sa thai naira hawi
nang parai nai sai ai pata pajau na a?
8 Kani khusang malawn py, Tameuh ai pajyh patleh pajau y;
na i py nang ly kani mang y tym thai y leang.
Tameuh ly tavau pri satang pany;
na i py nang ly pany y leang.
9 Tameuh i nang parai nai sai ly khaileaung pri tleaung y kau i,
suida pangli tleaung y py kau.
10 Tameuh ly nang ai ang patiu iy angchih lawh baly,
mymy ai ami paka pajau ai mo?
11 Tameuh ly awm ngaulau nai khumichi ai pany;
nichi i hawi y sa nai saichi py niu se nai ne.
12 Keaungngo kano kasau karam ly neaung hawi nai keaungngo kano kasaucho
tapen khala naini, khumi hawi y nai ly tau cheng ai.
13 Joba awi, nang ly paleung amtlau iy, Tameuh teng y ahihawi ba.
14 Hawi y naichi ai nang i yhm i nai patheu pawn veng ba.
15 Naibaly vam parai nai hawi my, mipui theung y tahm awm naimy abawi pajau ai.
16 Huna nai khala nang ly jangni y avum nai, tui my lemheu nai ai tami veng nai kamta,
amy i ngari kamtangchi py tami veng ai.
17 Nang i heng nai ly kanithun teng nai kani tleaung y malawn py,
angvang keh ai.
Veng nai neng py khutawi mo kamta, angvang phang ai.
18 Nang ly tlamsa naimy awm iy, athang khai naira awm ai.
Tameuh ly nang ai ang kry iy, ka-kawm rym hai ai.
19 Nang ly mani paleung ka-e ai py, jei hyn ai ny y.
Khumi mipuichi malawn py, nang teng y kasabawmra hnei u ai.
20 Na i py khumi hawi y naichi ly paleung phra athosi nimy,
lawi tleaungra lam hau i py, niu u ai ny y.
Nichi i athang khai naira harei ly dei naira ne.