10
1 Kai ly khaileaung pri y heng nai kapaleih na bo.
Paleung no-ei naimy kai i tangam nai tangai pi kyh ba.
2 Aw Tameuh, kai i kamngo pajeng moh kyh ba.
Kai i kamngo nai sai thui pi kyh ba.
3 Nang i hina tanrei ana nai ly avo na a?
Nangmy i sa nai sai ai paso y a?
Khumi hawi y nai katauchi ai ly khen i,
panuiyhm ai nai avo y a?
4 Nang ly ati cheaungkhang ai khumichi niu nai kamta, niu teang lawh sai a?
5 Nang i heng nai ly kaichi i heng nai kamta, deung dawi sai a?
6 Hunaibaly ati mana nai y, kai i kamngo awm nai ngireichi hawi,
kai i tamang nai ngiereichi ai chih lawh mo?
7 Kai teng y kamngo by y nai hawi,
kai ai nangmy kiu i nai amimi py, atleu pajau y, nanai nang ly pany nai ne.
8 Nang i kiu my ly kai ai mo-cha palum pi.
Vai, huni kiu my ly kai ai taphra lawh.
9 Nang ly kai ai khaileaung hawi sa palum pi,
nanai pany jo ba.
Kai ai taphra vui iy, spryh lawh hai teang ai a?
10 Nang ly kai i ampo teng y sa thai naira haiho pei iy,
kai ai khumicho amlawn hai;
kai ai amhm i taku theung y angpa hai bo.
11 Nang ly kai i tlang ai hiu hawi athovuichi sa naimy,
huni hiuchi ai ngan hawi peih mym hai bo.
12 Kai ai paheng iy khaw parai nai tamen naira amteng hai ba.
Nangmy khen kry nai deaungkho y kaheng nai ne.
13 Na i py huni neng thym thang y, nang ly kai i tlang tleaung y
patang naira tym hai ai nai, paleung theung y dawn naimy awm, nanai vai, kai pany bo.
14 Nang ly kai i kamngo pahen y naimy khai ai nai,
kai mana khala sa tamang ai mo, nanai khen ajeng ryry lawh nai ne.
15 Kai kamngo sa tamang kyh nai dengdairei,
nang ly kai ai bawi la ryp bo.
Na i py kai, kateng sa nai khala py, kai ly meimai ngo y.
Kai ly paleung atho di iy, kangji nga nai ne.
16 Kai, nang chawn nai khala,
nang ly khrangsi kamta, kai ai preng iy patiu.
Kai i tlang tleaung y no nga hai ai nai, rengrang nairachi malawn py sa.
17 Nang ly kai i molam y avawrei,
hawi y nai pany hai nai keungchi patei.
Kado theu naira ly nawira nawira bo.
Nang ly kai ai avaw avawrei tiu nai ne.
18 Aw Tameuh, nang ly ati mana nai y,
kai ai tapen lawh mo?
Kai ly ami py niu y rai khala my, kadei veng ai nai ngai alam.
19 Amhm taku theung i dengdairei, tapreaung angawm y kachei praw nai ly
tapen y naimy awm nai hawi vanrei lawm ai.
20 Kai i heng nai ly tem ai nai kasa bo ny y a?
Kai ai kaimy tlairei khai su ba!
Heng ai awm rai nai neng kani khala ly amo theu naimy awm ai nai pei ba.
21 Kai ly panum na iy, vengpang naimy khiu cheng nai pri,
kangvang malawn py kaveng lawm iy,
22 vengpang nai pri y kachei ai bo.
Mana khala py vawi ali teang ai ny y leang bo.