5
Khaileaung pri y eaung nai
1 Ami py Isu ly Krista ne, nanai ym nai ngierei ly Tameuh i tapen nai ne; ami py ni ai tapen nai keung ai tamen nai ly tapen nai ai py tamen reng.
2 Achi ly Tameuh ai tamen iy, mymy i leu pei naichi patawm khala y ly, achi ly Tameuh i chanauchi ai py tamen, nanai pany.
3 Achi i Tameuh ai tamen nai ly mymy i leu pei nai patawm nai ne; mymy i leu pei nai ly myn kaji pho hai nai ny y leang.Ref 5.3: Jh 14.15
4 Tameuh i tapen nai ly khaileaung pri ai pajau jojo veng; khaileaung pri ai pajau iy eaung naira ly achi i ym naira ne.
5 Isu ly Tameuh i Chapo ne, nanai ym nai keung harei ny y baly khaileaung pri ai pajau nai keung ly ami mo?
Isu Krista satang pany hai nai
6 Tui hawi thi hawi ang jeu nai ly hini Isu Krista ne he; tui hawi harei khyh ny y leang, tui hawi thi hawi py ne.
7 Phailo ly leu meitang ne nai deaungkho y pany hai nai keung ly Phailo ne.
8 Pany hai nai keung thomrei awm, Phailo hawi, tui hawi, thi py; hunichi thomrei ly bomrei adyh nai ne.
9 Achi ly khumi i pany hai naira malawn py tangai baly, Tameuh i pany hai naira ly len keh nai ne; ati mana nai mo nabaly mymy i Chapo i satang ang pany hai nai ly Tameuh i pany hai naira ne he.
10 Tameuh i Chapo ai ym nai khumi ly amy teng y huni pany hai naira awm; Tameuh ai ym y nai khumi ly Tameuh my mymy i Chapo i satang pany hai nai ly ym y nai deaungkho y, ni ai ly ka-chawi thui nai keung palawn nai teu.
11 Tameuh my deungtasarei hengra ang pei i, huni hengra ly mymy i Chapo teng y awm, nanai ly pany hai naira ne he.Ref 5.11: Jh 3.36
12 Chapo ai nga nai keung ly hengra py nga teang, Tameuh i Chapo ai ngo y nai keung ly hengra py ngo y leang.
Deungtasarei hengra
13 Nangchi ly hengra nga bo, nanai apany u thai ai nai, nangchi Tameuh i Chapo i amyn y ym nai keungchi teng y ly hini katajiu nai ne.
14 Achi ly mymy i ngai nai kamta ati py hnei nai ngierei ly ang tangai pi reng, nanai ly mymy i mang y achi i vam naira ne;
15 hunaibaly achi i ati py hnei nai ngierei ly ang tangai pi reng , nanai pany baly mymy teng y achi i atiti hnei nai ly nga bo, nanai achi pany.
16 Ami py amy i amjo amnau ai ly dei ai nai pa-rei ny y nai kamngo sa nai niu i khyly, hnei pi ai nai tla, hunaibaly dei ai nai pa-rei ny y nai kamngo sa nai keung i vui ly hengra ang nga hai ai. Dei ai nai pa-rei kamngo nai awm; huni molam y ly hnei pi ai nai tla kana nai ny y leang.
17 Hawi y naira bawibawi ly kamngo ne: dei ai nai pa-rei ny y nai kamngo py awm.
18 Ami py Tameuh i tapen nai ly kamngo sa nai ny y leang, nanai achi pany; Tameuh teng i awm nai my lyni ai kry jojo i, kamngo sa reng nai keung my ly ni ai nam py nam pajau y leang.
19 Naibaly achi ly Tameuh i ne, nanai hawi khaileaung pri bomrei ly kamngo sa reng nai keung i ngaingai awm, nanai py achi pany.
20 Naibaly achi ly meitang khyp nai keung pany i, mymy i Chapo Isu Krista meitang khyp nai keung y achi awm, nanai ly Tameuh i Chapo ly ang jeu iy achi ai pany thai naira ang nga hai bo. Huni ly Tameuh meitang khyp nai hawi, deungtasarei hengra py ne.
21 Bechi awi, myn y ly amsym u.