4
Phailo tatang hawi tapawp nai amo i phailo
1 Ngai parai naichi awi, phailo bawibawi y ym u moh, phailochi ly Tameuh teng i nai ne mo, ny y mo, nanai cham u; ati mana nai mo nabaly khaileaung pri y ly leu thui tapawp nai neangneangchi theu bo.
2 Nangchi ly hinira y ly Tameuh i Phailo ai pany pajau:Isu Krista ly satla iy ngan lawn, nanai thai hai nai phailo ngierei ly Tameuh teng i nai ne;
3 naibaly Isu ai thai hai y nai phailo ngierei ly Tameuh teng i nai ny y leang; huni ly Krista ai paka nai keung, ang jeu ai nai ly nangchi thai bo; vai py khaileaung pri y awm angchi yb nai ne.
4 Bechi awi, nangchi ly Tameuh i dengdairei ne i, nangmychi y awm nai keung ly khaileaung pri y awm nai keung tleaung y len keh nai deaungkho y, nangchi ly hunichi ai pajau bo.
5 Nichi ly khaileaung pri i nai ne, hunai deaungkho y nichi ly khaileaung pri i nai kamta katheu iy, khaileaung pri ly nichi i leu tangai lawh.
6 Achi ly Tameuh teng i nai ne; Tameuh ai pany nai khumi ly achi i leu tangai; Tameuh teng i nai ny y nai khumi ly achi i leu tangai y leang. Hunira y ly phailo meitang nai hawi, phailo meitang ny y nai py achi pany.
7 Ngai parai naichi awi, atamen u leungtang sina; tamen naira ly Tameuh teng i dengdairei theu nai ne; khumi ami py tamen naira awm nai ngierei ly Tameuh i tapen nai ne, Tameuh ai py pany.
8 Tamen naira by y nai khumi ly Tameuh ai pany y; ati mana nai mo nabaly Tameuh ly tamen naira ne.
9 Hinira y ly Tameuh i tamen naira ly achi i tlang tleaung y amteng bo; achi ly mymy deaungkho y heng thai ai nai Tameuh my mymy i Chapo leaungrei awm khyh nai ai khaileaung pri y ang pato.
10 Hinira y ly tamen naira awm, achi ly Tameuh ai tamen nai ny y leang, mymy ly achi ai ang tamen iy, achi i kamngochi ahui nai langseaung syn naira lawn thai ai nai mymy i Chapo ai ang pato nai teu.
11 Ngai parai naichi awi, Tameuh my hina tanrei achi ai ang tamen baly, achi py atamen u leungrang ai nai tla.
12 Ami py mana khala y py Tameuh ai niu vai y leang: achi ly atamen u leungtang baly Tameuh ly amychi y awm jojo ai i, mymy i tamen naira py amychi y angym teang ai.Ref 4.12: Jh 1.18
13 Mymy ly mymy i Phailo ai achi ai phyrei nga hai chum veng nai deaungkho y, achi ly mymy y awm jojo nai hawi, mymy ly amychi y awm jojo, nanai py achi pany.
14 Naibaly Ampo my chapo ai ly khaileaung pri ai Paheng Keung lawn ai nai ang pato nanai ly achi pany py pany, thai py thai hai bo.
15 Ami py Isu ly Tameuh i Chapo ne, nanai thai hai nai ngierei ly mymy y ly Tameuh my awm jojo i, ni y py Tameuh ly awm jojo teang.
16 Tameuh my amychi i tlang tleaung y tamen naira awm nai ly achi my pany iy, ym py ym nai ne. Tameuh ly tamen naira ne; tamen naira y awm jojo nai khumi ly Tameuh y awm jojo i, Tameuh py ni y awm jojo teang.
17 Achi ly tara chih nai kani y vam parai pa-rei awm thai ai nai achi i tlang tleaung y tamen naira ly angym bo; ati mana nai mo nabaly mymy i awm nai kamta achi ly hini khaileaung pri y awm teang bo.
18 Tamen naira y ly jei ai naira ha py by y leang; tamen naira angym nai my ly jei naira ai patheu nai ne: jei naira y ly pajeng ai naira awm lawh veng; jei nai keung ly tamen naira y angym y leang.
19 Mymy ly achi ai ang tamen man nai deaungkho y achi ly tamen nai ne.
20 Ami my, “Kai ly Tameuh ai tamen,” napi iy, amy i amjo amnau ai niu ngai y baly, mymy ly ka-chawi thui nai teu; amy i amjo amnau niu ryhryh nai ai malawn py tamen y pui baly, Tameuh niu vai y nai ai ipsaly mana tamen thai ai mo?
21 Achi ly mymy teng i dengdairei hini leu pei nai ly awm he; ami py Tameuh ai tamen baly, mymy i amjo amnau ai tamen teang ai nai tla, napi nai ne.