JOHAN
I CHA PA NAI HYHREI
1
1 Miteaung keh my ly vawi nai neampachy hawi mymy i chanauchi teng y pa nai:
Achi teng y awm jo nai hawi, deungtasa khrairei awm jo ai nai leu meitang deaungkho y nangchi ai meitang khyp naimy kang tamen nai ne:
2 naibaly kaimy leaungrei khyh ny y leang, leu meitang pany nai ngiereichi py ne teang:
3 leu meitang hawi tamen naira deaungkho y Ampo Tameuh hawi, Ampo i Chapo Isu Krista teng i dengdairei py tamen naira hawi, pahen naira hawi, awmnem naira py achi teng y awm ai mang.
Leu meitang hawi tamen naira
4 Achi ly Ampo teng i dengdairei leu nga nai kamta ly, nang i chanau amichi mo ly leu meitang y tako nai kaniu nai deaungkho y khri pa-rei kakawn na.
5 Naibaly lo awi, nang teng y leu pei nai kangtha tajiu nai kamta ny y naimy, angchei kha i dengdairei achi i nga nai kamta katajiu nai teu, achi ly tamen leungtang ai nai kang takeng nai he.Ref 5: Jh 13.34, 15.12, 17
6 Naibaly mymy i leu pei nai kamta achi i tako veangveang nai ly tamen naira ne; nangchi ly hunira y tako veangveang ai nai, angchei kha i dengdairei nangchi i pany nai leu pei nai ly huni ne ho.
7 Isu Krista ly tlang y ang jeu, nanai thai hai y nai tapawp nai keung neangneangchi ly khaileaung pri y theu u bo. Hunai kamta khumi ly tapawp nai keung hawi Krista ai paka nai keung ne.
8 Kaichi i sa nai angchichi ly nangchi tamo y naimy, kawn nai vang kangym nga u thai ai nai hawihai atyp u.
9 Ami py Krista i patiu nai leu y awm jo y iy katlen vui nai keung ngierei teng y ly Tameuh by y:huni patiu nai leu y awm jo nai keung ly, huni khumi kypkyp teng y ly Ampo hawi Chapo py awm abom mei nai ne.
10 Ami py huni patiu nai leu y syn y naimy nangchi teng y ang jeu lawh baly, nangchi i yhm y ango hai moh ly, leu kahawi py pavum u moh;
11 ati mana nai mo nabaly leu kahawi pavum nai keung ly ni i atiti hawi y sa naira y abawi teang nai ne.
Kangkhym i Leu
12 Kai ly nangchi teng y leu neangneang thui ai nai awm nai deaungkho y cha-ku y hawi cha tui y tajiu ai nai ngai y leang; na i py nangchi ly kawn angym u thai ai nai kai ly nangchi teng y kang jeu iy, mo atha naimy arum ai nai athang kakhai nai ne.
13 Ngamnau neampachy vawi nai i chanauchi my nangchi teng y kawn nai leu ang thui pi mang.