3
Tameuh i cho chanauchi
1 Khen cham achi ai Ampo my ang tamen nai ly mana tanrei na mo! Tameuh i chanauchi y ang pathi vui na ly: achi ly huni kamta ne khyp; khaileung pri my ly mymy ai pany y nai deaungho y achi ai py pany y.Ref 3.1: Jh 1.12
2 Ngai parai naichi awi, achi ly vai ly Tameuh i chanauchi ne i, achi ly mana awm ai mo, nanai ly amteng y leang rai. Mymy ly amteng baly achi ly mymy kamta awm ai, nanai ly achi pany; ati mana nai mo nabaly mymy ly awm nai kamta khypkhyp naimy achi ly niu ai.
3 Ami py mymy i tlang tleaung y hini athang khai naira awm nai ngierei ly mymy i chai nai kamta ly apachai jojo teang.
4 Ami py kamngo sa nai ngierei ly reita ai taphra nai keung ne; kamngo ly reita ai taphra nai ne.
5 Mymy ly kamngo la vui ai nai amteng bo, nanai ly nangchi pany; naibaly mymy y ly kamngo ati sai py by y leang.Ref 3.5: Jh 1.29
6 Ami py mymy y awm jojo nai ngierei ly kamngo so y leang; ami py kamngo sa nai ngierei ly mymy ai niu py niu y, pany py pany y.
7 Bechi awi, ami my py nangchi ai tapawp ai nai pei u moh; mymy ly kahawi ne nai kamta, kahawi sa reng nai keung ly kahawi ne teang:
8 kamngo sa nai keung ly diabola i ne: diabola ly angchei kha i dengdairei atiti kamngo sa nai ne. Tameuh i Chapo ly diabola i sa nai sai taphra thai ai nai amteng nai ne.
9 Ami py Tameuh i tapen nai ly Tameuh i ti ly mymy teng y awm jojo nai deaungkho y kamngo so y leang; mymy ly Tameuh i tapen nai ne nai deaungkho y kamngo so py so thai y leang.
10 Hinira y ly Tameuh i chanauchi hawi diabola i chanauchi ly amny nai ne: ami py kahawi so y nai ngierei ly Tameuh i ny y leang, amy i amjo amnau ai tamen y nai khumi py ne teang.
Atamen u leungtang
11 Angchei kha i dengdairei nangchi i thai nai leu taviu nai ly hini ne he; achi ly atamen leungtang ai nai tla, napi nai ly:Ref 3.11: Jh 13.34
12 achi ly Kaina kamta awm ai nai tlo y: mymy ly kamngo sa reng nai keung i khumi ne i, amnau ai padei lawh. Naibaly ni ly mymy ai ati mana nai y padei nai mo? Mymy i atiti sa naichi ly kamngo tla iy, amnau i atiti sa naichi ly kahawi ne nai deaungkho y teu.Ref 3.12: AA 4.8
13 Amjo amnauchi awi, khaileaung pri my nangchi ai niu ngai y baly rengrang ti u moh.
14 Achi ly amjo amnauchi ai tamen nai deaungkho y, dei naira i dengdairei theu iy hengra y kun bo, nanai ly achi pany. Ami py tamen naira by y nai ngierei ly dei naira y awm jojo rai.Ref 3.14: Jh 5.24
15 Ami py amy i amjo amnau ai niu ngai y nai ngierei ly khumi ai padei nai keung ne; naibaly khumi ai padei nai keung ami py deungtasarei hengra ni i paleung theung y awm nai ha py by y leang, nanai ly nangchi pany.
16 Mymy ly achi i vui y mymy i hengra pei vui nai deaungkho y tamen naira ly ati mo, nanai achi pany; achi py amjo amnauchi i vui y achi i hengra pei teang ai nai tla.
17 Na i py ami py khaileaung pri i yhmtheaung awm nai mymy i amjo amnau avaw nai niu iy tamen y pasi lawh baly, mymy y ly Tameuh i tamen naira ly mana awm thai ai mo?
18 Bechi awi, labeaung palai y khyh ny y naimy, atiti sa naira y hawi meitang khyp naira y py tamen u sina.
Tameuh i mo y vam nai
19 Hunira y achi ly leu meitang naira i nai ne, nanai achi pany ai i,
20 achi i paleung my achi ai pasum khala y ly mymy i mei ka-niu y achi i paleung ai amychi my khaw hai ai; ati mana nai mo nabaly Tameuh ly achi i paleung tleaung y len keh i, mymy ly ati cheaungkhang pany.
21 Ngai parai naichi awi, achi i paleung my achi ai pasum y baly, achi ly Tameuh mang y vam nai ne;
22 hunaibaly achi ly mymy i leu pei naichi patawm iy, mymy i mei ka-niu y atiti kawn ai awm naichi sa reng nai deaungkho y, achi i hnei nai ngierei ly mymy teng i dengdairei nga jojo.
23 Achi ly mymy i Chapo Isu Krista i amyn y ym iy, mymy i leu pei nai kamta atamen leungtang ai nai mymy i leu pei nai ne he.Ref 3.23: Jh 13.34, 15.12, 17
24 Mymy i leu pei nai patawm nai khumi ly mymy teng y awm jojo i, mymy py ni teng y awm jojo teang nai ne. Naibaly mymy ly achi teng y awm jojo nanai ly Phailo ang pei naira y ly achi pany.