2
Leu pei nai kangtha
1 Bechi awi, nangchi ly kamngo so y ai nai hini leu ly nangchi teng y katajiu nai he. Ami py kamngo sa lawh baly, achi i Ampo teng y thui pi nai keung Isu Krista kahawi awm;
2 ni ly achi i kamngochi ahui nai langseaung syn naira ne; achi i harei khyh py ny y i, khaileaung pri bawibawichi i vui py ne teang.
3 Naibaly achi ly mymy i leu pei naichi patawm nai ne baly, achi ly hunira y ly mymy ai pany, nanai amny mang.
4 Mymy i leu pei naichi patawm y pui naimy, “Mymy ai kapany,” napi nai khumi ly ka-chawi thui nai teu, leu meitang py mymy teng y by y.
5 Na i py ami py mymy i leu patawm nai ngierei ly Tameuh ai tamen naira ly mymy teng y angym tatang nai bo. Achi ly hinira y mymy teng y awm, nanai apany nai ne.
6 “kai ly mymy teng y kaawm jojo,” napi nai khumi ly mymy i tako nai kamta khyp my tako teang ai nai tla.
7 Ngai parai naichi awi, leu pei nai kangtha ly nangchi teng y kang tajiu y leang; leu pei nai kangngym, angchei kha i dengdairei nangchi i nga nai katajiu nai teu; huni leu pei nai kangngym ly nangchi i thai angchi yb chum veng nai leu ne.Ref 2.7: Jh 13.34
8 Ne mang ly leu pei nai kangtha katajiu pi bo, kaveng ly tama dudu nai deaungkho y hawi, kangvang tatang ly vai ly angvang nai deaungkho y py, huni ly mymy y hawi nangmychi y py meitang ne.
9 Amy i amjo amnau ai niu ngai y pui iy, “Kai ly kangvang y awm,” napi lawh nai khumi ly vai khrairei kaveng y awm jo rai.
10 Amy i amjo amnau ai tamen nai khumi ly kangvang y awm i, mymy y ly atlym naira ha py by y leang.
11 Na i py amy i amjo amnau ai niu ngai y nai khumi ly kaveng y awm iy, kaveng y tako nai py ne teang; kaveng my ly mymy i mei ai paju hai nai deaungkho y mymy ly amy i tako ai nai lam py pany y.
12 Bechi awi, mymy i amyn deaungkho y nangchi i kamngochi pahen chum nai y, nangchi teng y katajiu nai he.
13 Ngaaichi awi, nangchi ly angchei kha i dengdairei awm nai ai pany nai deaungkho y nangchi teng y katajiu nai he. Thawndeangchi awi, nangchi ly kamngo sa reng nai keung ai pajau nai deaungkho y nangchi teng y katajiu nai he. Bechi awi, nangchi ly Ampo ai pany nai deaungkho y nangchi teng y katajiu nai chy bo.
14 Ngaaichi awi, nangchi ly angchei kha i dengdairei awm nai ai pany nai deaungkho y ngngchi teng y katajiu nai chy bo. Thawndeangchi awi, nangchi ly ham i, Tameuh i leu ly nangmychi y awm jojo iy, kamngo sa reng nai keung ai ly pajau nai deaungkho y nangchi teng y katajiu nai chy bo.
15 Khaileaung pri ai ly tamen u moh, khaileaung pri i atiti awm nairachi ai py tamen u moh. Khumi ami py khaileaung pri ai tamen baly, Ampo ai tamen naira ly mymy teng y by y.
16 Khaileaung pri y awm nai bawibawi ly tlang i ngai phi teng y naira hawi, mei i ngai phi teng y naira hawi, heng nai sala i tahm apasang naira py Ampo teng i nai theu nai ny y leang, khaileaung pri i nai theu nai teu.
17 Khaileaung pri hawi, huni i ngai phi teng y nairachi raurei py tama dudu nai ne; na i py Tameuh i kangai sa nai keung ly deungtasarei awm jojo ai.
Krista i paleung ka-e
18 Bechi awi, kangkhym kangtem i neng ly tym bo; Krista ai paka nai keung ang jeu ai, nanai nangchi i thai nai kamta ly vai py Krista ai paka nai keung neangneangchi ang theu nai bo; hunai deaungkho y kangkhym kangtem i neng ly tym bo, nanai achi pany bo.
19 Nichi ly achi theung i dengdairei theu bo, na i py nichi ly achi i khumi tatang ny y leang; nichi ly achi i khumi tatang ne i khyly achi teng y ang awm jojo ai bo; na i py nichi bawibawi ly ha py achi i khumi tatang ny y leang, nanai hawihai palai amteng thai ai nai ang theu pi veng nai bo.
20 Na i py nangchi ly khumi Kachai teng i dengdairei rimui paju nai nga i, ati cheaungkhang angym pa-rei pany u nai ne.
21 Nangchi ly leu meitang pany y nai deaungkho y katajiu nai ny y leang, nangchi ly pany nai deaungkho y hawi, leu meitang i nai ka-chawi tlen py theu vai y nai deaungkho y py katajiu nai teu.
22 Isu ly Krista ny y , nanai thui nai keung bo y ka-chawi si keh nai ly ami awm jau mo? Ampo hawi Chapo ai ym y nai keung ly Krista ai paka nai keung ne.
23 Ami py Chapo ai ym y nai ngierei ly Ampo by y; Chapo ai ym nai ly Ampo py awm.
24 Nangchi i angchei kha i dengdairei thai nai ly nangmychi y awm jojo sy. Nangchi i angchei kha i dengdairei thai nai ly nangmychi y awm jojo baly, nangchi py Chapo y hawi Ampo y py awm jojo ai.
25 Naibaly mymy kypkyp i achi ai adeu hai nai ly deungtasarei hengra ne he.
26 Nangchi ai ang tapawp ai tau nai keungchi i satang ly nangchi teng y katajiu nai ne.
27 Na i py nangchi ly mymy teng i dengdairei rimui paju nai nga nai ly nangmychi y awm jojo i, nangchi ai ly ami py patiu ai nai aly ngai y leang; mymy i rimui paju nai my ly atiti bawibawi ang patiu nai deaungkho y hawi, teng parai nai ne iy ka-chawi py ny y nai y, huni my ang patiu nai kamta ly mymy y awm u jojo.
28 Hunaibaly bechi awi, mymy ly amteng iy py achi ly mymy i mo y kaji y nai vam parai pa-rei my awm pajau thai ai nai, mymy y awm u jojo.
29 Mymy ly kahawi ne, nanai nangchi pany baly ami py kahawi sa nai ngierei ly mymy i tapen nai ne, nanai nangchi pany mang.