JOHAN
I CHA PA NAI HAREI
1
Heng nai Leu
1 Angchei kha i dengdairei awm nai, kaichi i kano y thai nai, kaichi i mei y niu nai, khen veangveang iy kaichi i kiu y patham nai Hengra Leu i satang ly:Ref 1.1: Jh 1.1
2 (huni Hengra ly amteng i, kaichi ly niu iy, pany py pany hai, naibaly huni deungtasarei Hengra Ampo teng y awm nai, kaichi teng y amteng nai ly kaichi my kang thui pi nai he;)Ref 1.2: Jh 1.14
3 nangchi py kaichi hawi amkawm teang thai ai nai, huni kaichi i nui nai hawi thai nai ly nangchi teng y kang thui pi nai he; ne, naibaly kaichi hawi amkawm nai ly Ampo hawi, mymy i Chapo Isu Krista hawi amkawm nai ne:
4 hunaibaly kaichi ly kawn angym thai ai nai hini satang takhra takhra tajiu nai ne.
Tameuh ly kangvang ne
5 Naibaly leu taviu nai mymy teng i dengdairei kaichi i thai nai, nangchi teng y kang thui pi pateang ai nai ly hini ne he:
6 Tameuh ly kangvang ne, mymy y ly kaveng pipi by y. Achi ly kaveng y tako dudu nai iy, “Kaichi ly mymy hawi amkawm,” na lawh baly, achi ly ka-chawi thui nai teu, leu meitang py patawm nai ny y leang;
7 na i py mymy ly kangvang y awm nai kamta achi py kangvang y tako baly, achi ly vanrei amkawm leungtang nai ne, naibaly mymy i Chapo Isu i thi my achi i kamngo bawibawi ang pachai pi.
8 “Kaichi ly kamngo by y leang,” napi baly amychi ai atapawp nai teu, leu meitang py achi teng y by y.
9 Achi ly achi i kamngochi ahui baly, mymy ly achi i kamngochi pahen ai nai hawi, achi i hawi y naira bawibawi pachai ai nai py ka-ym nai hawi, hawi nai py ne.
10 Na i py, “Kaichi ly kamngo so y leang,” napi baly mymy ai ka-chawi thui nai keung palawn lawh i, mymy i leu py achi teng y by y.