51
Jerusalem mary i vui awm hai nem nai leuchi
1 Areng my,
“Nangchi atleu naira nga ai ngai nai khumichi awi,
kasabawmra hnei ai nai kai teng y jeu nai khumichi awi, kai i leu tangai u.
Nangchi ai thiu nai lengseaung ai khen u.
Nangchi ai tai nai lengseaung kho ai khen u.
2 Nangchi i amsi sangum Abraham hawi
Sarah nini i satang dawn pany jo ba.
Abraham ai kaimy palau nai thym khala y, ni ly cho chanau by y.
Na i py kai ly ni ai cho chanau amtheaung hai iy,
ni i kangpreangchi peung hai nai ne.
3 “Kai ly Jerusalem mary hawi huni mary i phra seaungkhrang nai
yhm hlaura y awm nai khumichi ai kapahen ai.
Jerusalem mary ly daichi ka-vym lawm teu i py,
kai ly huni ai Eden akho kamta, Areng i akho lawm hai ai.
Huni meingtym y awm nai khumichi ly amo theu naimy,
palo nai khulym thui nai tarawi y, kai ai kawn nai leu thui u ai.
4 “Kai i khumichi awi, kai i leu tangai u.
Kai i thui nai leu tangai u.
Kai ly khumi cheng cheaungkhangchi ai thui parip iy,
kai i reita leuchi ly nichi i vui kangvang lawm ai.
5 Kai ly jeu hawi kaliki iy nichi ai atleu ai.
Kai i eaung naira nga ai nai neng ly kasa bo.
Khumi cheng cheaungkhangchi ai, kaimy kypkyp my peang ai.
Pri takhra i khumichi ly kai, jeu ai nai ajeng u nai ne.
Mymychi ai atleu ai, nanai athang khai nai hawimy, nichi ly kai ai ajeng u bo.
6 Kani khusang ai khen ang deng u; khaileaung ai py khen u!
Kani khusang ly maikhyh kamta tama vui ai.
Khaileaung ly ateaung tangym nai kamta phra dudu ai.
Hini khaileaung i khumi bawibawichi py, pathau kamta dei be ai.
Na i py kai i atleu naira ly deungtasarei awm jojo ai.
Kai i eaung naira ly mana khala py phra ai ny y.
7 “Leu meitang pany nai khumichi awi,
kai i patiu pi nai leu ai dawn thleng nai khumichi awi, kai i thui nai leu tangai u.
Nangchi ai kangji kangai pei iy, khumichi my thui tamawn nai khala jei u mo?
8 Huna nai khumichi ly thaikem my cha nai ateaung kamta tama vui ai!
Na i py kai i hawi naira ly deungtasarei awm jojo ai.
Kai i sa thai nai atleu naira py, deungtasarei awm jojo ai,” napi.
9 Aw Areng, ang thau ly kaichi ai sabawm ba!
Nang i sa thai nai haiho hawimy, kaichi ai atleu kyh ba.
Angthau ly jangni jangkhawn i kamta, sa thai naira tym hai ba.
Pangli naka pui Rahabi ai tameang piupa nai keung py nang ne.
10 Mymy atleu pi nai khumichi angpeang thai ai nai
pangli tui kang hai iy,
lam sa pi nai keung ly nang ne.
11 Nangmy atleu pi chum nai khumichi ly
khri pa-rei amo theu naimy
khulym thui iy Jerusalem mary y tym u ai.
Nichi ly deungtasarei amo theu u ai i,
deungtasarei paleung si vo tangam nai avum u ai ny y.
12 Areng my,
“Nangchi ai atho kawi angym hai nai keung ly kai ne.
Acha keung tanrei heng sau khyh nai
dei thai nai amjy khumi ai, nangchi ly ati mana nai jei u nai mo?
13 Kani khusang ai khiu tapai iy, khaileaung y langdeng pala nai
nangchi ai sa nai keung Areng ai
nangchi ly tami veng bo sai a?
Nangchi ai pahyp y naimy ana nai khumichi,
nangchi ai tamyh pawn ai nai angveirym nai khumichi ai
ati mana nai y nangchi ly jei u lyhlyh naimy awm u lawh mo?
Nangchi i kado theu nai ly nangchi ai mana khala py, ka-jeira tym hai pajau y leang.
14 Theaung tla nai khumichi ly kra y naimy law tleaung u ai.
Khumichi ly theaung theung y dei y naimy,
mychi i ngai nai teicha teinei ngiereichi nga u ai.
15 “Kai ly nangchi i Areng Tameuh ne.
Pangli tui ai kaimy lilu iy,
tui sampyh kamsauchi lawm hai ai.
Kai i amyn ly ati cheaungkhang sa thai nai Areng ne na a!
16 Kai ly kani khusang ai khiunote 51:16 khiu; Hebrai leu y pati, nanai sai ne.tapai iy,
khaileaung y langdeng pala nai ne.
Jerusalem mary i khumichi teng y, ‘Nangchi ly kai i khumichi ne na a!
Kai ly kaimy i reita nangchi teng y kang pei iy,
kiu hawi nangchi ai ama hai bo,’ nanai kang thui pi,” napi.
Jerusalem mary i ngari kamtang rym nai
17 Aw Jerusalem mary, anglaw jau!Ref 51:17: Amt 14:10, 16:19
Amymy ai apalaw ly ang thau jau!
Areng my kado theu nai deaungkho y,
nang ai pei nai khaura i pajeng nai kreip hang nang ly nei bo.
Huni ai nei nai deaungkho y pavui tapai nai ne.
18 Nang ai lam patei pi ai nai khumi leaungrei py by y.
Nang i chengchi theung y nang ai
kiu hawi ang pahawi ai nai khumi leaungrei py by y.
19 Nang ly ka-jeira phy nyhrei avum bo.
Nang i pri ly tavai takai molam y phra pawn bo.
Nang i mary i khumichi py, teicha teinei alam u bo.
Nang ai tamen nai paleung ang khai nai leaungrei py by y.
20 Nang i khumichi ly atho di nai molam y,
lam sangum tleirei y atlym u bo.
Nichi ly mawi sara i pyra y man nai sisiu kamta atawm ai.
Nichi ly Tameuh i kado theu nai haiho avum u ai.
21 Patang naira avum nai, nangchi Jerusalem mary i khumichi awi,
nei cha ala nai kamta pavui tapai u nai khumichi awi,
22 Nangchi i Areng Tameuh ly nangchi ai ang kry iy,
“Kaimy nangchi teng y kado katheu ang pei nai khau ly
nangchi teng i nai kang la pi ali teang ai.
Nangchi ai pavui tapai hai nai kreip hang ly
nangchi nei u ali bi ai ny y.
23 Huni kreip hang ly nangchi ai pahyp y naimy ana nai khumichi,
nangchi ai lam y atlym hai iy, spryh kamta
kheu hawi chiu nai khumichi teng y kapei ai,” napi.